Argus News - ISIକୁ ଭାରତର ଗୁପ୍ତ ତଥ୍ୟ ଦେଉଥିଲେ ଓକିଲ; ୱାଘା ବର୍ଡରରୁ ଆଣୁଥିଲେ ବ୍ୟାଗ ଭର୍ତ୍ତି ଟଙ୍କା

ନୂଆଦିଲ୍ଲୀ: ଭାରତରେ କରୁଥିଲେ ଓକିଲାତି । ଆଉ ପାକିସ୍ତାନକୁ ଯୋଗାଉ ଦେଉଥିଲେ ଗୁପ୍ତ ତଥ୍ୟ । ପାକିସ୍ତାନର ଗୁଇନ୍ଦା ସଂସ୍ଥା ISIକୁ ଦେଉଥିଲେ ଖବର । ଗୁରୁଗ୍ରାମର ଓକିଲ ରିଜୱାନଙ୍କୁ ଗିରଫ କରିଛି ସୁରକ୍ଷା ଏଜେନ୍ସି । ଅଭିଯୋଗ ଅନୁସାରେ, ରିଜୱାନ କୁଆଡ଼େ ଭାରତର ଗୁପ୍ତ ତଥ୍ୟ ପାକିସ୍ତାନକୁ ଦେଉଥିଲେ ।

ଏଥିପାଇଁ ପ୍ରାୟ ୭ ଥର ଅମ୍ରିତସର ଗସ୍ତ କରିଥିଲେ ରିଜୱାନ । ସେଠାରୁ ବ୍ୟାଗ୍ ଭର୍ତ୍ତି ଟଙ୍କା ନେଇ ଗୁରୁଗ୍ରାମ ଫେରୁଥିଲେ । ପାକିସ୍ତାନ ପାଇଁ ଗୁପ୍ତଚର ମାମଲାରେ ଗିରଫ ରିଜୱାନଙ୍କ ଅନ୍ୟତମ ଓକିଲ ସାଥୀ ମୁସାରଫ ଓରଫ୍ ପରଭେଜ୍ ଖୋଲିଛି ରିଜୱାନଙ୍କ ପାକିସ୍ତାନ ପ୍ରେମର ପେଡ଼ି ।

ଗିରଫ ମୁସାରଫଙ୍କ ଅନୁସାରେ, ୨୦୨୨ରେ ସୋହନା କୋର୍ଟରେ ଓକିଲାତି ଅଭ୍ୟାସ ବେଳେ ରିଜୱାନଙ୍କ ସହ ତାଙ୍କର ବନ୍ଧୁତା ହୋଇଥିଲା । ଏହାପରେ ମୁସାରଫ ନୁହ କୋର୍ଟରେ ଓ ରିଜୱାନ ଗୁରୁଗ୍ରାମରେ ଓକିଲାତି ଅଭ୍ୟାସ କରିଥିଲେ । କୋର୍ଟ ବଦଳିବା ପରେ ଦୁହେଁ ସମ୍ପର୍କରେ ଥିଲେ ଏବଂ ଅନେକ ସମୟରେ ଡିଲ୍ ପାଇଁ ଏକାଠି ହେଉଥିଲେ ।

ଏଥିସହ ପଢ଼ନ୍ତୁ: ମହଙ୍ଗା ପଡ଼ିଲା 'ଗୁଳି କରିଦେବି' ମନ୍ତବ୍ୟ; ପ୍ରଦୀପ ମାଝୀଙ୍କ ନାଁରେ ଥାନାରେ ଏତଲା

ମୁସାରଫ ପୋଲିସକୁ ଦେଇଥିବା ସୂଚନା ଅନୁସାରେ, ଉଭୟ ଗତ ଜୁଲାଇରେ କାର୍ ଯୋଗେ ୱାଘା ବର୍ଡରକୁ ଯାଇଥିଲେ । ସ୍ଵର୍ଣ୍ଣ ମନ୍ଦିର ଦର୍ଶନ ପରେ ବାଇକ୍‌ରେ ଆସିଥିବା ୨ ଜଣଙ୍କ ଠାରୁ ରିଜୱାନ ଆଣିଥିଲେ ଟଙ୍କା ଭର୍ତ୍ତି ବ୍ୟାଗ୍ । ତେବେ ଟଙ୍କା ନେଇ ଆସିଥିବା ଦୁଇଜଣ କିଏ ତାହା ମୁସାରଫ କହିପାରିନି ।

ଅମ୍ରିତସରରୁ ଘରକୁ ଫେରିବା ବାଟରେ କାର୍ ଦୁର୍ଘଟଣାଗ୍ରସ୍ ହୁଏ । ଫଳରେ ଦୁହେଁ ସେଇଠି କାର୍ ଛାଡ଼ିଦେଇ ଟ୍ରେନ୍ ଯୋଗେ ଫେରି ଆସନ୍ତି । ପୁଣି ଅଗଷ୍ଟ ୧ରେ ଦୁର୍ଘଟଣାଗ୍ରସ୍ତ କାର୍ ଆଣିବାକୁ ଯାଆନ୍ତି ଦୁଇ ଓକିଲ ବନ୍ଧୁ । ଅମ୍ରିତସରରେ ସନ୍ଧ୍ୟାରେ ହୋଟେଲ୍ ନେବା ପରେ ରାତିରେ ରିଜୱାନ ପଳାଏ । କହିକି ଯାଏ ସେ ଆହୁରି ଟଙ୍କା ନେଇ ଆସିବ ।

ଜେରା ବେଳେ ମୁସାରଫ କହିଛି, "ରିଜୱାନ ପ୍ରାୟ ୭ ଥର ଅମ୍ରିତସର ଯାଇଛି ଟଙ୍କା ସଂଗ୍ରହ ପାଇଁ । କେତେବେଳେ ସ୍କର୍ପିଓ ତ କେବେ ସ୍କୋଡା କାର୍‌ରେ ଟଙ୍କା ନେଇ ଆସୁଥିଲା ।" ସେପଟେ ୪୧ ଲକ୍ଷ ନଗଦ ଆଣିଥିବା ରିଜୱାନ ମଧ୍ୟ ମାନିଛି । ଆଉ ସେହି ଟଙ୍କାକୁ ରିଜୱାନ ଅଜୟ ଅରୋରାଙ୍କୁ ଦେଇଥିଲା ।

ତଦନ୍ତ ବେଳେ ଜଣାପଡ଼ିଛି ରିଜୱାନ ନାଁରେ ୨ଟି ବ୍ୟାଙ୍କ ଆକାଉଣ୍ଟ ରହିଛି । ଗୋଟିଏ ବ୍ୟାଙ୍କ ଆକାଉଣ୍ଟ ପଞ୍ଜାବ ନ୍ୟାସନାଲ ବ୍ୟାଙ୍କରେ ତଉରୁରେ ରହିଛି । ଅନ୍ୟଟି ରହିଛି ସୋହନାର ଇଣ୍ଡସଇଣ୍ଡ ବ୍ୟାଙ୍କରେ ।

ଏଥିସହ ପଢ଼ନ୍ତୁ: ଖୋର୍ଦ୍ଧା ଜିଲ୍ଲାରେ ସର୍ବାଧିକ ଜାଲ୍‌ ରାସନ କାର୍ଡ ହିତାଧିକାରୀ: ଯୋଗାଣମନ୍ତ୍ରୀ

ତେବେ ଦେଣନେଣ ସୀମା ବାହାରେ କାରବାର ପରେ ପଞ୍ଜାବ ନ୍ୟାସନାଲ ବ୍ୟାଙ୍କରେ ଥିବା ଆକାଉଣ୍ଟଟି ବନ୍ଦ ହୋଇ ଯାଇଛି । ଯାହାକି ଦର୍ଶାଉଛି ହାୱଲା ମାଧ୍ୟମରେ କୋଟି କୋଟି ଟଙ୍କା ପାକିସ୍ତାନରୁ ଆସିଛି ରିଜୱାନ ଆକାଉଣ୍ଟକୁ । ଆଉ ସେହି ଟଙ୍କାର ସିଂହଭାଗ ପଞ୍ଜାବରେ ଆତଙ୍କବାଦୀ ନେଟୱର୍କ ସୁଦୃଢ଼ କରିବାକୁ ଉପଯୋଗ କରାଯାଇଥିବା ତଦନ୍ତକାରୀ ଅଧିକାରୀ ସୂଚନା ଦେଇଛନ୍ତି ।

ତେବେ ରିଜୱାନ ଆକାଉଣ୍ଟରେ ମୋଟ କେତେ ଟଙ୍କା ଜମା ହୋଇଛି ସେନେଇ ସଠିକ୍ ତଥ୍ୟ ଜାଣିନଥିବା କହିଛି ମୁସାରଫ । ତେବେ ରିଜୱାନର ଲାପଟପ୍ ଏବଂ ଫୋନ୍‌ରୁ ତଦନ୍ତକାରୀ ସଂସ୍ଥା ସନ୍ଦିଗ୍ଧ ଦେଣନେଣ ପାଇଛି । ପ୍ରଥମ ନୁହ ପୋଲିସ ମୁସାରଫକୁ ଧରିଥିଲା । ତାର ୪ ଦିନ ପରେ ଧରାପଡ଼ିଛି ରିଜୱାନ ।

ଏହି ମାମଲାରେ ନୁହ ପୋଲିସର ସ୍ଵତନ୍ତ୍ର ତଦନ୍ତକାରୀ ଦଳ ଅମ୍ରିତସରରୁ ଆଉ ୩ ଜଣଙ୍କୁ ଗିରଫ କରିଛି । ଗିରଫମାନେ ହେଲେ ସନ୍ଦୀପ ସିଂହ ଓରଫ ଗଗନ, ଅମନଦୀପ ସିଂହ ଓ ଜାସ୍କରନ ସିଂହ । ଏମାନଙ୍କ ସହାୟତାରେ ପାକିସ୍ତାନରୁ ଆସୁଥିବା କୋଟି କୋଟି ଟଙ୍କା ରିଜୱାନ ଆକାଉଣ୍ଟରେ ଜମା କରାଯାଇଥିଲା ।