Pregnant Woman Delivery / ଦେବଦୂତ ସାଜିଲେ ଦୁଇ ପୋଲିସ କର୍ମଚାରୀ… ରାସ୍ତା କଡ଼ରେ ଗର୍ଭବତୀଙ୍କ ପ୍ରସବ କରାଇଲେ

ବିପଦ ସମୟରେ ଦେବଦୂତ ସାଜିଲା ଖାକି ପୋଷାକ। ରାସ୍ତା କଡ଼ରେ ପ୍ରସବ ଯନ୍ତ୍ରଣାରେ ଛଟପଟ ହେଉଥିବା ଜଣେ ଗର୍ଭବତୀ ମହିଳାଙ୍କ ପାଇଁ ଭଗବାନ ସାଜି ପହଞ୍ଚିଲେ ଦୁଇ ପୋଲିସ କର୍ମଚାରୀ। ଡାକ୍ତରଖାନା ପହଞ୍ଚିବା ସମ୍ଭବ ନଥିବାରୁ ରାସ୍ତା କଡ଼ରେ ହିଁ ପ୍ରସବ କରାଇ ମାନବିକତାର ଏକ ଅନନ୍ୟ ଉଦାହରଣ ସୃଷ୍ଟି କଲେ। ହରିୟାଣାର ଗୁରୁଗ୍ରାମରେ ଘଟିଥିବା ଏହି ଘଟଣା ଏବେ ସମସ୍ତଙ୍କ ହୃଦୟ ଜିତୁଛି।

ହରିୟାଣାର ଗୁରୁଗ୍ରାମ ସ୍ଥିତ ସେକ୍ଟର ୬୮ରେ ମାନବିକତା ଏବଂ ପୋଲିସର ତତ୍ପରତାର ଏକ ପ୍ରେରଣାଦାୟକ ଉଦାହରଣ ଦେଖିବାକୁ ମିଳିଥିଲା। M3M ମରିନା ନିକଟରେ ରାସ୍ତା କଡ଼ରେ ଜଣେ ଗର୍ଭବତୀ ମହିଳା ପ୍ରସବ ଯନ୍ତ୍ରଣାରେ ଛଟପଟ ହେଉଥିଲେ; ତାଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିଲା। ସେଠାରେ ଚା’ ଦୋକାନ ଚଳାଉଥିବା ଉର୍ମିଳା ନାମ୍ନୀ ଜଣେ ସ୍ଥାନୀୟ ମହିଳା ଏହା ଦେଖିବା ପରେ ତୁରନ୍ତ ପୋଲିସ କଣ୍ଟ୍ରୋଲ ରୁମ୍‌କୁ ଫୋନ୍ କରି ସାହାଯ୍ୟ ମାଗିଥିଲେ। ଖବର ପାଇବା ମାତ୍ରେ, ପୋଲିସର 'ଏମର୍ଜେନ୍ସି ରେସ୍ପନ୍ସ ଭେଇକିଲ୍' (ERV-235) ଦଳ ଦିଲ୍ଲୀ-ଏନସିଆର୍ (Delhi-NCR) ଅଞ୍ଚଳର ପ୍ରବଳ ଟ୍ରାଫିକ୍ ଭିତର ଦେଇ ମାତ୍ର ୫ ରୁ ୭ ମିନିଟ୍ ମଧ୍ୟରେ ଘଟଣାସ୍ଥଳରେ ପହଞ୍ଚି ଯାଇଥିଲେ।

ପରିସ୍ଥିତିର ଗମ୍ଭୀରତାକୁ ହୃଦୟଙ୍ଗମ କରି, ଇଏଚ୍‌ସି (EHC) ସନ୍ଦୀପ ଏବଂ ଗାଡ଼ି ଚାଳକ କନଷ୍ଟେବଳ ସନ୍ଦୀପ ବୁଝିପାରିଲେ ଯେ, ମହିଳାଙ୍କୁ ଡାକ୍ତରଖାନା ନେବା ବିପଜ୍ଜନକ ହୋଇପାରେ, କାରଣ ଯେକୌଣସି ମୁହୂର୍ତ୍ତରେ ପ୍ରସବ ହୋଇପାରେ। ତେଣୁ, ତାଙ୍କୁ ସ୍ଥାନାନ୍ତର କରିବାର ବିପଦ ନ ନେଇ, ଉଭୟ ପୋଲିସ ଅଧିକାରୀ ସେହି ସ୍ଥାନରେ ହିଁ ପରିସ୍ଥିତିକୁ ନିଜ ନିୟନ୍ତ୍ରଣକୁ ନେଇଥିଲେ।

ସେମାନେ ଚା’ ବିକାଳି ଉର୍ମିଳା ଏବଂ ସେଠାରେ ଉପସ୍ଥିତ ଥିବା ଅନ୍ୟ ସ୍ଥାନୀୟ ମହିଳାମାନଙ୍କ ସହାୟତାରେ ଏକ ସୁରକ୍ଷା ବଳୟ ସୃଷ୍ଟି କରିଥିଲେ। ଏହି ମହିଳାମାନଙ୍କ ସହଯୋଗ ଏବଂ ପୋଲିସର ତୁରନ୍ତ ନିଷ୍ପତ୍ତି ଯୋଗୁଁ, ରାସ୍ତା କଡ଼ରେ ସୁରକ୍ଷିତ ଭାବେ ପ୍ରସବ କାର୍ଯ୍ୟ ସମ୍ପନ୍ନ ହୋଇଥିଲା ଏବଂ ପରେ ନବଜାତକର କାନ୍ଦ ଶୁଣିବାକୁ ମିଳିଥିଲା। ପ୍ରସବ ପରେ ନବଜାତ ଶିଶୁ ଓ ମା’ଙ୍କୁ ସଂକ୍ରମଣରୁ ରକ୍ଷା କରିବା ଏବଂ ସେମାନଙ୍କୁ ପ୍ରସବ ପରର ଯତ୍ନ ନେବାପାଇଁ ଉକ୍ତ ଦୁଇ ପୋଲିସ ଅଧିକାରୀ ତୁରନ୍ତ ସେମାନଙ୍କୁ ନିଜ ପିସିଆର୍ (PCR) ଗାଡ଼ିରେ ବସାଇ ବାଦଶାହପୁର ସ୍ଥିତ ଏକ ଡାକ୍ତରଖାନାକୁ ନେଇଗଲେ। ମେଡିକାଲରେ ପହଞ୍ଚିବା ପରେ ପୂରା ସ୍ଥିତିକୁ ଦେଖିବା ପରେ ମା’, ଛୁଆ ଉଭୟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା।
 

ଏହି ସାହସୀ ପୋଲିସ ଅଧିକାରୀମାନେ ରାସ୍ତାରେ ଦୁଇଟି ଜୀବନ ବଞ୍ଚାଇବା ପାଇଁ ଯେପରି ତତ୍ପରତା ଓ ବିବେକବୁଦ୍ଧି ପ୍ରଦର୍ଶନ କଲେ, ତାହାକୁ ସମସ୍ତେ ପ୍ରଶଂସା କରୁଛନ୍ତି; ସେମାନେ ସତେ ଯେପରି ରକ୍ଷାକର୍ତ୍ତା ଦୂତ ଭଳି କାର୍ଯ୍ୟ କରିଛନ୍ତି।