Nightclub Incident / ନାଇଟ୍ କ୍ଲବରେ ମହିଳାଙ୍କୁ ଦୁଷ୍କର୍ମ ଓ ମାଡ଼, ଭିଡିଓ ହେଲା ଭାଇରାଲ

ନାଇଟ୍ କ୍ଲବରେ ଜଣେ ମହିଳାଙ୍କୁ ଆକ୍ରମଣ ଏବଂ ଦୁଷ୍କର୍ମର ଆସିଛି ସାଂଘାତିକ ଅଭିଯୋଗ । କ୍ଲବର ବାଉନ୍ସରମାନେ ତାଙ୍କୁ ଉଲଗ୍ନ କରି ମାଡ଼ ମାରିଥିବା ଅଭିଯୋଗ ହୋଇଛି। ଘଟଣାର ଭିଡିଓ ଏବେ ଭାଇରାଲ ହୋଇଛି। ଭିଡିଓ ଭାଇରାଲ ହେବା ପରେ ପୋଲିସ ମାମଲାକୁ ଗୁରୁତ୍ୱର ସହ ନେଇ ତଦନ୍ତ ଆରମ୍ଭ କରିଛି।

ଗୁରୁବାର ବିଳମ୍ବିତ ରାତିରେ ଆସାମର ଗୌହାଟିର ଖାନପାରା ଅଞ୍ଚଳର ଏକ ନାଇଟ୍ କ୍ଲବରେ ଘଟିଛି ଦୁର୍ଭାଗ୍ୟଜନକ ଘଟଣା। ଯେଉଠି କ୍ଲବର ବାଉନ୍ସରମାନେ ଜଣେ ମହିଳାଙ୍କୁ ଉଲଗ୍ନ କରି ମାଡ଼ ମାରିଥିବା ଅଭିଯୋଗ ହୋଇଛି। ଭାଇରାଲ୍ ଭିଡିଓରେ ଜଣେ ମହିଳା ପାର୍କିଂ ଅଞ୍ଚଳରେ ତଳେ ପଡ଼ିଥିବା ବେଳେ କିଛି ଲୋକ ତାଙ୍କୁ ମାଡ଼ ମାରୁଥିବା ଦେଖାଯାଉଛି। ଭିଡିଓରେ ଦୁଇଜଣ ମହିଳା ତାଙ୍କୁ ଲାତ ମାରୁଥିବା ଏବଂ ନିକଟରେ ଅନେକ ପୁରୁଷ ଠିଆ ହୋଇଥିବା ଦେଖାଯାଉଛି। ତେବେ ଭିଡିଓର ସମ୍ପୂର୍ଣ୍ଣ ପରିପ୍ରେକ୍ଷିତ ଓ ଘଟଣାର ପ୍ରକୃତ କ୍ରମ ତଦନ୍ତ ପରେ ସ୍ପଷ୍ଟ ହେବ।

କ୍ଲବ ଭିତରେ ବଚସା ପରେ ବଢ଼ିଲା ବିବାଦ

ପ୍ରାଥମିକ ସୂଚନା ଅନୁସାରେ, ମହିଳା ଜଣକ କିଛି ବନ୍ଧୁଙ୍କ ସହ କ୍ଲବକୁ ଆସିଥିଲେ। କ୍ଲବ ଭିତରେ ତାଙ୍କର ଜଣେ ବାଉନ୍ସରଙ୍କ ସହ ବଚସା ହୋଇଥିବା ଜଣେ ସୁରକ୍ଷାକର୍ମୀ ଦାବି କରିଛନ୍ତି। ଏହି ସମୟରେ ମହିଳା ଜଣକ ଏକ ବିୟର ବୋତଲରେ ବାଉନ୍ସରଙ୍କୁ ଆଘାତ କରିଥିବା ମଧ୍ୟ ସୁରକ୍ଷାକର୍ମୀ ଦାବି କରିଛନ୍ତି।

ପଢନ୍ତୁ ଏହି ଖବର: କାରରେ CNG ଭରିବା ବେଳେ ସାବଧାନ, ହେଉଛି ଭୟଙ୍କର ବିସ୍ଫୋରଣ

ଏହାପରେ ଅନ୍ୟ ବାଉନ୍ସରମାନେ ମହିଳାଙ୍କୁ ଧରି କ୍ଲବର ଚତୁର୍ଥ ମହଲାରୁ ପାର୍କିଂ ଅଞ୍ଚଳକୁ ନେଇଯାଇଥିବା କୁହାଯାଇଛି। ପାର୍କିଂ ଅଞ୍ଚଳକୁ ନେବା ପରେ ତାଙ୍କ ସହ ମାଡ଼ ମାରିବା ଏବଂ ପୋଷାକ ଖୋଲିଦେବା ଭଳି ଅଭିଯୋଗ ଆସିଛି। ତେବେ ଝଗଡ଼ା କିପରି ଆରମ୍ଭ ହୋଇଥିଲା ଏବଂ ଘଟଣା ସମୟରେ ପ୍ରକୃତରେ କ’ଣ ଘଟିଥିଲା, ତାହା ଏବେ ପୋଲିସ ତଦନ୍ତର ପରିସରରେ ରହିଛି।

ଭାଇରାଲ୍ ଭିଡିଓରେ ସମ୍ପୁର୍ଣ୍ଣ ଘଟଣା

ଘଟଣାର ଜଣେ ପ୍ରତ୍ୟକ୍ଷଦର୍ଶୀ ମୋବାଇଲ୍ ଫୋନରେ ଭିଡିଓ ରେକର୍ଡ କରିଥିବା ଜଣାପଡ଼ିଛି। ଭିଡିଓରେ ମହିଳା ଜଣକ ମାଟିରେ ପଡ଼ିଥିବା ବେଳେ କିଛି ମହିଳା ତାଙ୍କୁ ଆକ୍ରମଣ କରୁଥିବା ଦୃଶ୍ୟ ରହିଛି। ଅନ୍ୟ ଏକ ଭିଡିଓରେ ଜଣେ ପୁରୁଷ ମହିଳାଙ୍କୁ ଉଠାଇ ନେବାକୁ ଚେଷ୍ଟା କରୁଥିବା ଦେଖାଯାଉଛି। କିଛି ସମୟ ପରେ ଏକ କାର୍ ଦୃଶ୍ୟକୁ ଆଢ଼ୁଆଳ କରିଦେଉଛି। ପରେ ସେହି ମହିଳା ଆଉ କ୍ୟାମେରାରେ ଦେଖାଯାଉନଥିବା ବେଳେ କିଛି ଲୋକ ପରସ୍ପର ମଧ୍ୟରେ କଥାବାର୍ତ୍ତା କରୁଥିବା ଦେଖାଯାଉଛି।

ମ୍ୟାନେଜରଙ୍କୁ ପଚରାଉଚରା, ତଦନ୍ତ ଜାରି

ଘଟଣା ପରେ ପୋଲିସ କ୍ଲବର ପରିଚାଳକଙ୍କୁ ପଚରାଉଚରା ପାଇଁ ଅଟକ ରଖିଥିବା ଜଣାପଡ଼ିଛି। ପୋଲିସ ଘଟଣା ସମ୍ପର୍କିତ ଭିଡିଓ, CCTV ଫୁଟେଜ୍ ଏବଂ ଅନ୍ୟ ପ୍ରମାଣ ଯାଞ୍ଚ କରୁଛି। ଘଟଣାରେ ସମ୍ପୃକ୍ତ ମହିଳାଙ୍କ ପରିଚୟ ଏପର୍ଯ୍ୟନ୍ତ ସାର୍ବଜନୀନ ହୋଇନାହିଁ। ପୋଲିସ ପକ୍ଷରୁ କୁହାଯାଇଛି ଯେ ଆବଶ୍ୟକ ପଡ଼ିଲେ ମହିଳାଙ୍କ ଅଭିଯୋଗ ବିନା ମଧ୍ୟ ନିଜଆଡ଼ୁ ମାମଲା ରୁଜୁ କରାଯାଇପାରେ।ଘଟଣା ପରେ କ୍ଲବଟି ବନ୍ଦ ରହିଛି।  କ୍ଲବ ପରିଚାଳନା ପକ୍ଷରୁ ଏପର୍ଯ୍ୟନ୍ତ ଏନେଇ କୌଣସି ବିବୃତ୍ତି ଆସିନାହିଁ। ମହିଳାଙ୍କ ସହ ଘଟିଥିବା ଘଟଣାର ସମ୍ପୂର୍ଣ୍ଣ ସତ୍ୟ ତଦନ୍ତ ପରେ ହିଁ ସ୍ପଷ୍ଟ ହେବ।