Love Marriage Ban / ଏହି ଗାଁରେ ପ୍ରେମ ବିବାହ ନିଷେଧ, ଜାଣନ୍ତୁ କାହିଁକି ଗାଁ ଲୋକେ ନେଇଛନ୍ତି ଏପରି ନିଷ୍ପତ୍ତି

ଚଣ୍ଡିଗଡ଼: ଭାରତରେ ଏକାଧିକ ଧର୍ମର ଲୋକେ ବସବାସ କରନ୍ତି । ବିଭିନ୍ନ ଅଞ୍ଚଳରେ ଭିନ୍ନ ଭିନ୍ନ ନିୟମ, ଚାଲିଚଳଣି ରହିଥାଏ । ଆମ ଦେଶର ଉତ୍ତରାଞ୍ଚଳ ରାଜ୍ୟରେ ଏପରି ଏକ ଗାଁ ଅଛି ଯେଉଁଠି ପ୍ରେମ ବିବାହ କରିବା ସମ୍ପୂର୍ଣ୍ଣ ନିଷେଧ । ଏହି ଆଧୁନିକ ଯୁଗରେ ମଧ୍ୟ ଏଠାକାର ଲୋକେ ଏହି ନିୟମକୁ ପାଳନ କରିବାକୁ ବାଧ୍ୟ । ତେବେ ଏହା ପଛର କାରଣ କଣ ? ଆପଣ ବି ଜାଣିଲେ ଆଶ୍ଚର୍ଯ୍ୟ ହେବେ ।

• ହରିୟାଣାରେ ଅଛି ଏପରି ଗାଁ

ହରିୟାଣାର ହିସାର ଜିଲ୍ଲାର ଆର୍ଯ୍ୟନଗର ଗାଁର ଗ୍ରାମବାସୀମାନେ ଏପରି ବଡ଼ ନିଷ୍ପତ୍ତି ନେଇଛନ୍ତି । ଏକ ବୈଠକରେ ଗାଁ ଲୋକେ ଗାଁରେ ପ୍ରେମ ବିବାହକୁ ନିଷେଧ କରିବାକୁ ନିଷ୍ପତ୍ତି ନେଇଛନ୍ତି । ଗାଁ ଲୋକଙ୍କ କହିବା ଅନୁଯାୟୀ, ନିକଟ ଅତୀତରେ ଘଟିଥିବା ତିନି-ଚାରିଟି ପ୍ରେମ ବିବାହ ପରେ ସାମାଜିକ ଢାଞ୍ଚା ବଜାୟ ରଖିବା ଲକ୍ଷ୍ୟରେ ଏହି ପଦକ୍ଷେପ ନିଆଯାଇଛି । ତଥାପି ଗାଁ ଲୋକଙ୍କ ଏହି ନିଷ୍ପତ୍ତି ଏବଂ ଏହାର ପ୍ରକୃତ କାରଣ ସମ୍ପର୍କରେ ସ୍ଥିତି ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

• କାହିଁକି ନିଷ୍ପତ୍ତି ନିଆଗଲା ?

ସ୍ଥାନୀୟ ଲୋକଙ୍କ ମତରେ, ଗାଁରେ ପ୍ରେମ ବିବାହକୁ ସାମୂହିକ ଭାବରେ ବିରୋଧ କରାଯାଇଥିଲା ଏବଂ ଏପରି ବିବାହକୁ ନିରୁତ୍ସାହିତ କରିବା ପାଇଁ ନିଷ୍ପତ୍ତି ନିଆଯାଇଥିଲା । ଗାଁ ଲୋକେ ଏହା ମଧ୍ୟ କୁହନ୍ତି ଯେ ଯଦି କୌଣସି ଯୁବକ କିମ୍ବା ଯୁବତୀ ସେମାନଙ୍କ ପରିବାରର ଇଚ୍ଛା ବିରୁଦ୍ଧରେ ବିବାହ କରନ୍ତି, ତେବେ ପରିବାର ଦାୟୀ ହେବା ଉଚିତ୍ ନୁହେଁ । ଅନ୍ୟପକ୍ଷରେ ଗାଁ ମୁଖ୍ୟ ରତନ ଲାଲ ଏହି ବିଷୟରେ କୌଣସି ମତାମତ ଦେବାକୁ ମନା କରିଦେଇଛନ୍ତି।

• କଣ କହିଲେ ସରପଞ୍ଚ ?

ଗତ ରବିବାର ଏହି ଗାଁରେ ଏକ ବୈଠକ ବସିଥିଲା । ପ୍ରାୟ ୧୦୦୦ ଲୋକ ଏକାଠି ହୋଇଥିଲେ । ବୈଠକରେ ଗାଁର ସରପଞ୍ଚ ରତନ ସିଂହ ଏହି ବୈଠକରେ ଉପସ୍ଥିତ ଥିଲେ ବି ଏହି ବିବାଦିତ ନିଷ୍ପତ୍ତିଠାରୁ ନିଜକୁ ଦୂରେଇ ରଖିଛନ୍ତି । ଏହି ନିଷ୍ପତ୍ତିରେ ପଞ୍ଚାୟତର କୌଣସି ଭୂମିକା ନାହିଁ । ଏହାକୁ ସାମାଜିକ ସ୍ତରରେ ନିଆଯାଇଛି ।

ପଢନ୍ତୁ ଏହି ଖବର: ଦେଶର ପ୍ରଥମ ଗାଁ; ଯେଉଁଠୁ ସ୍ୱାର୍ଗଯାତ୍ରା କରିଥିଲେ ପାଣ୍ଡବ, ବର୍ଷକୁ ୬ ମାସ ପାଇଁ ହୋଇଯାଏ ନିର୍ଜନ

• ନିଜ ଜୀବନସାଥୀ ନିଜେ ବାଛିହେବ କି ନାହିଁ ?

ପଞ୍ଜାବ ଓ ହରିୟାଣା ହାଇକୋର୍ଟଙ୍କ ବରିଷ୍ଠ ଓକିଲ କମଳ ଆନନ୍ଦଙ୍କ କହିବାନୁସାରେ, ଭାରତୀୟ ସମ୍ବିଧାନର ଧାରା ୨୧ ଅନୁସାରେ, ପ୍ରତ୍ୟେକ ନାଗରିକ ନିଜ ପସନ୍ଦ ମୁତାବକ ନିଜର ଜୀବନସାଥୀ ବାଛିପାରିବେ । ସେ ସ୍ପଷ୍ଟ କରିଛନ୍ତି ଯେ ଗାଁରେ ନିଆଯାଇଥିବା ଏପରି ନିୟମର କୌଣସି ଆଇନଗତ ମାନ୍ୟତା ନାହିଁ । ଯଦି ଏପରି କେହି କରନ୍ତି, ତେବେ ଭାରତୀୟ ଦଣ୍ଡ ସଂହିତା ଅନୁସାରେ ଏପରି ଲୋକଙ୍କ ବିରୁଦ୍ଧରେ ଡରାଇବା-ଧମକାଇବା ଓ ଅପରାଧିକ ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ।