ମଧ୍ୟପ୍ରଦେଶ ସତନା ଜିଲ୍ଲାରେ ଗତ ୬ ମାସ ପୂର୍ବେ ଘଟିଥିଲା ଭୟଙ୍କର ଘଟଣା । ଜଣେ HIV ସଂକ୍ରମିତ ରକ୍ତ ଦେଇ ୭ଜଣ ଥାଲାସେମିଆ ଶିଶୁଙ୍କୁ ଏଚଆଇଭି ପଜିଟିଭ୍ କରିଥିଲା । ଏବେ ଏହି ଘଟଣାକୁ ୬ ମାସ ବିତିଯାଇଥିଲେ ସୁଦ୍ଧା ଶିଶୁଙ୍କ ଶରୀରରେ ରକ୍ତ ଦ୍ଵାରା ଭାଇରସ ଛାଡ଼ିଥିବା ସମ୍ଭାବ୍ୟ ଏକାଧିକ ରକ୍ତଦାତାଙ୍କ ଏଯାଏଁ ପତ୍ତା ମିଳୁନାହିଁ, ଯାହାକି ଏକ ଚିନ୍ତାଜନକ ସାର୍ବଜନୀନ ସ୍ଵାସ୍ଥ୍ୟ ସଙ୍କଟରେ ପରିଣତ ହୋଇଛି । ଅନ୍ୟପଟେ ମୂଳ ଏଚଆଇଭି ସଂକ୍ରମିତ ବିଷୟରେ ବି ଜଣାପଡ଼ିନାହିଁ ।

ଏହି ମାରାତ୍ମକ ଭାଇରସରେ ସଂକ୍ରମିତ ହୋଇଥିବା ବ୍ୟକ୍ତିଙ୍କୁ ଯଦି ଶୀଘ୍ର ଚିହ୍ନଟ ନ କରାଯାଏ, ତେବେ ଏଚଆଇଭି ପଜିଟିଭଙ୍କ ସଂଖ୍ୟା ବୃଦ୍ଧି ପାଇପାରେ । ତଦନ୍ତକାରୀ ଦଳ ଗତ ୫ ମାସ ହେଲାଣି, ସନ୍ଦିଗ୍ଧ ରକ୍ତଦାତାଙ୍କୁ ଖୋଜିବାରେ ଲାଗିଛି, ହେଲେ ଏଯାବତ ବିଫଳ ରହିଛି । ମଧ୍ୟପ୍ରଦେଶ ସରକାର ମେ ୫ ତାରିଖରେ ଯାଞ୍ଚ ପ୍ରକ୍ରିୟାକୁ ଆହୁରି ତ୍ଵରାନ୍ବିତ କରିବାକୁ ନିର୍ଦ୍ଦେଶ ଦେଇଥିଲେ । ରାଜ୍ୟସ୍ତରୀୟ ଅଧିକାରୀଙ୍କୁ ମିଶାଇ ଏକ ମିଳିତ ଟିମ ବି ଗଠନ କରାଯାଇଛି ।

• ୧୯୬ ଲୋକଙ୍କ ତାଲିକା ପ୍ରସ୍ତୁତ

ସ୍ଵାସ୍ଥ୍ୟ ଅଧିକାରୀମାନେ ଏକ ୧୯୬ ଜଣିଆ ତାଲିକା ପ୍ରସ୍ତୁତ କରିଛନ୍ତି, ଏମାନେ ସେହି ସମୟ ମଧ୍ୟରେ ରକ୍ତଦାନ କରିଛନ୍ତି ଯେତେବେଳେ ୬ ଶିଶୁଙ୍କୁ ରକ୍ତର ଆବଶ୍ୟକ ଥିଲା । ଏଯାବତ ୮୦ରୁ ଅଧିକ ରକ୍ତଦାତାଙ୍କୁ ଚିହ୍ନଟ କରାଯାଇ ସେମାନଙ୍କ ସ୍ଵାସ୍ଥ୍ୟାବସ୍ଥା ଯାଞ୍ଚ କରାଯାଇଛି, କିନ୍ତୁ ସେମାନେ HIV ନେଗେଟିଭ୍ ଆସିଛନ୍ତି । କିନ୍ତୁ ବାକି ରକ୍ତାଦାତାଙ୍କ ପତ୍ତା ମିଳୁନାହିଁ, ଯାହାକି ଚିନ୍ତା ବଢାଇଛି । ଅଧିକାରୀଙ୍କ କହିବା କଥା ହେଉଛି ୪୧ ଜଣ ରକ୍ତଦାତାଙ୍କ ଆଦୌ ପତ୍ତା ମିଳୁନାହିଁ, କାରଣ ରେକର୍ଡରେ ଦିଆଯାଇଥିବା ଫୋନ ନମ୍ବର ଭୁଲ୍ କିମ୍ବା ଏବେ କାମ କରୁନାହିଁ । ଅଧିକାରୀମାନେ ଯୋଗାଯୋଗ କରିଥିବା ୧୫ ଜଣ ବ୍ୟକ୍ତି HIV ପରୀକ୍ଷା କରିବାକୁ ମନା କରିଦେଇଛନ୍ତି, ସେମାନେ ଦାବି କରିଛନ୍ତି ଯେ ସେମାନେ ଆଜି ସୁଦ୍ଧା କେବେହେଲେ ରକ୍ତଦାନ କରିନାହାନ୍ତି ।

ପଢନ୍ତୁ ଏହି ଖବର: ୭ ବର୍ଷିୟ ଶିଶୁ କେମିତି ହେଲେ HIV ପଜିଟିଭ୍ ? ସନ୍ଦେହ ଘେରରେ ବ୍ଲଡ୍‌ ବ୍ୟାଙ୍କ୍‌

• ନକଲି ପରିଚୟ ଦେଇ ରକ୍ତଦାନ

ଅଧିକାରୀମାନେ ଏବେ ସନ୍ଦେହ କରୁଛନ୍ତି ଯେ କିଛି ରକ୍ତଦାତା ନିଜର ନକଲି ପରିଚୟ, ଭୁଲ ଫୋନ ନମ୍ବର ଦେଇ ରକ୍ତଦାନ କରିଛନ୍ତି । ମଧ୍ୟପ୍ରଦେଶ ରାଜ୍ୟ ଏଡ୍ସ ନିୟନ୍ତ୍ରଣ ସୋସାଇଟିର ଅତିରିକ୍ତ ନିର୍ଦ୍ଦେଶକ ମୋନାଲ ସିଂହ କହିଛନ୍ତି ଯେ ସ୍ଵାସ୍ଥ୍ୟ ଅଧିକାରୀମାନେ ସେହି ସମୟରେ ରକ୍ତଦାନ କରିଥିବା ପ୍ରତ୍ୟେକ ବ୍ୟକ୍ତିବିଶେଷଙ୍କ ନିକଟରେ ପହଞ୍ଚିବା ଲାଗି ଯଥାସମ୍ଭବ ଚେଷ୍ଟା କରୁଛନ୍ତି । ସେ କହିଛନ୍ତି ଯେ ଯେଉଁ ବ୍ୟକ୍ତିମାନେ HIV ପରୀକ୍ଷା କରିବାକୁ ମନା କରୁଛନ୍ତି, ସେମାନେ ହୁଏତ ଭୟଭୀତ ଅଛନ୍ତି କିମ୍ବା ସେମାନଙ୍କ ଫୋନ ନମ୍ବର, ପରିଚୟ ଦେଇ ତାଙ୍କର କୌଣସି ସମ୍ପର୍କୀୟ ରକ୍ତଦାନ କରିଛନ୍ତି । ପ୍ରାୟ ୪୧ ଲୋକଙ୍କ ଫୋନ ନମ୍ବର ଭୁଲ୍ ଅଛି, ଯେଉଁମାନଙ୍କୁ ଚିହ୍ନଟ କରାଯାଇନାହିଁ । ଏବେ ମୂଳ ଏଚଆଇଭି ସଂକ୍ରମିତ ଦାତାଙ୍କୁ ଖୋଜିବା ପ୍ରକ୍ରିୟା ଜାରି ରହିଛି ।