Alcohol Dispute / କମ୍ ପଡ଼ିଲା ମଦ, ଆଉ ପିଇବାକୁ ଜିଦ୍‌ ଧରିଲା ସ୍ତ୍ରୀ, ତାପରେ...

ପେରୁଙ୍ଗୁଡ଼ି,୦୭/୧୦ : ମଦ କିଣିବାକୁ ନେଇ ଆରମ୍ଭ ହୋଇଥିଲା ସାମାନ୍ୟ ଯୁକ୍ତିତର୍କ। କିନ୍ତୁ କିଛି ସମୟ ମଧ୍ୟରେ ସେହି ସାମାନ୍ୟ ଯୁକ୍ତିତର୍କ  ଏମିତି ଏକ ଉଗ୍ରରୂପ ନେଇଥିଊ। ଯାହାର ପରିଣାମ ଚିନ୍ତା କଲେ ବି ଲୋମ ଟାଙ୍କୁରି ଉଠିବ। ମଦ କିଣିବାକୁ ନେଇ ବିବାଦ ପରେ ଜଣେ ବ୍ୟକ୍ତି ନିଜ ସ୍ତ୍ରୀଙ୍କୁ ହତ୍ୟା କରିଥିବା ଅଭିଯୋଗ ତାମିଲନାଡୁର ପେରୁଙ୍ଗୁଡି ଅଞ୍ଚଳରୁ ସାମ୍ନାକୁ ଆସିଛି। ଘଟଣା ପରେ ଅଭିଯୁକ୍ତ ସ୍ୱାମୀଙ୍କୁ ପୋଲିସ ଗିରଫ କରିଛି।

ପୋଲିସ ସୂଚନା ଅନୁସାରେ, ମୃତ ମହିଳାଙ୍କ ନାମ ସୁଧା ଏବଂ ତାଙ୍କ ବୟସ ୨୮ ବର୍ଷ। ଅଭିଯୁକ୍ତ ସ୍ୱାମୀ ଲୋଗାନାଥନଙ୍କ ବୟସ ୩୮ ବର୍ଷ। ସେ କଲ୍ଲୁକୁଟ୍ଟାଇ ଅଞ୍ଚଳରେ ଡେଲିଭରି କର୍ମଚାରୀ ଭାବେ କାମ କରୁଥିଲେ। ପ୍ରାୟ ୮ ବର୍ଷ ହେବ ଲୋଗାନାଥନ ଓ ସୁଧାଙ୍କ ବିବାହ ହୋଇଥିଲା। ତେବେ ଦମ୍ପତିଙ୍କର କୌଣସି ସନ୍ତାନ ନଥିଲେ।

ପୋଲିସର କହିବା ଅନୁସାରେ, ରବିବାର ରାତିରେ ଦମ୍ପତି ଘରେ ଏକାଠି ମଦ୍ୟପାନ କରୁଥିଲେ। କିଛି ସମୟ ପରେ ସୁଧା ଆହୁରି ମଦ ଆଣିବାକୁ ତାଙ୍କ ସ୍ୱାମୀଙ୍କୁ କହିଥିଲେ। ଲୋଗାନାଥନ ତାଙ୍କୁ କହିଥିଲେ ଯେ ସରକାରୀ ମାଲିକାନାରେ ଥିବା TASMAC ମଦ ଦୋକାନ ବନ୍ଦ ହୋଇଯାଇଛି। ତେଣୁ ଆଉ ମଦ ମିଳିବା ସମ୍ଭବ ନୁହେଁ। କିନ୍ତୁ ଏହାକୁ ନେଇ ସୁଧା ଜିଦ୍ ଧରିଥିବା ଅଭିଯୋଗ ହୋଇଛି। ଦୋକାନ ବନ୍ଦ ହୋଇଯାଇଥିଲେ ମଧ୍ୟ କଳାବଜାରରୁ ମଦ କିଣି ଆଣିବାକୁ ସେ ସ୍ୱାମୀଙ୍କୁ କହିଥିଲେ। ଏହି କଥାକୁ ନେଇ ଉଭୟଙ୍କ ମଧ୍ୟରେ ପ୍ରଥମେ ଯୁକ୍ତିତର୍କ ଏବଂ ପରେ ତୀବ୍ର ଝଗଡ଼ା ହୋଇଥିଲା।

ପୋଲିସର ପ୍ରାଥମିକ ତଦନ୍ତ ଅନୁସାରେ, ଝଗଡ଼ା ସମୟରେ ଲୋଗାନାଥନ ନିୟନ୍ତ୍ରଣ ହରାଇଥିଲେ। ଅଭିଯୋଗ ହୋଇଛି ଯେ ସେ ସୁଧାଙ୍କ ଉପରେ ଆକ୍ରମଣ କରିଥିଲେ ଏବଂ ପରେ ତାଙ୍କ ସ୍କାର୍ଫ ବ୍ୟବହାର କରି ତାଙ୍କୁ ହତ୍ୟା କରିଥିଲେ। ଘଟଣା ପରେ ଘରେ ହିଁ ସୁଧାଙ୍କ ମୃତ୍ୟୁ ହୋଇଥିବା ପୋଲିସ କହିଛି।

ପଢନ୍ତୁ ଏହି ଖବର: ବିବାଦୀୟ ରିଲ୍ସ କରିବା ପଡ଼ିଲା ମହଙ୍ଗା, ବନ୍ଧାହେଲେ କଣ୍ଟେଣ୍ଟ କ୍ରିଏଟର ସିମରନ୍

ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି, ଅଭିଯୋଗ ଅନୁସାରେ ଘଟଣା ପରେ ଲୋଗାନାଥନ ଘରେ ହିଁ ଶୋଇପଡ଼ିଥିଲେ। ସୋମବାର ସକାଳେ ଉଠିବା ପରେ ସେ ନିଜ ସ୍ତ୍ରୀ ମୃତ ଥିବା ଦେଖିଥିଲେ। ଏହାପରେ ସେ ଘରକୁ ବନ୍ଦ କରି ସେଠାରୁ ବାହାରି ଯାଇଥିବା ପୋଲିସ କହିଛି। ସୂଚନା ଅନୁସାରେ, ଘରୁ ବାହାରିବା ପରେ ଲୋଗାନାଥନ ତାରାମଣୀ ଅଞ୍ଚଳରେ ବୁଲୁଥିଲେ। ପରେ ସେ ସୈଦାପେଟ ଅଞ୍ଚଳକୁ ଯାଇଥିଲେ। ସେଠାରେ ଜଣେ ପରିଚିତ ବ୍ୟକ୍ତିଙ୍କୁ ସେ ନିଜ ସ୍ତ୍ରୀଙ୍କୁ ହତ୍ୟା କରିଥିବା କଥା କହିଥିବା ଜଣାପଡ଼ିଛି। ଏହି ସୂଚନା ମିଳିବା ପରେ ଘଟଣାଟି ପୋଲିସ ନଜରକୁ ଆସିଥିଲା। ଥୋରାଇପାକ୍କମ୍ ପୋଲିସ ତୁରନ୍ତ ସୈଦାପେଟ ଅଞ୍ଚଳରେ ପହଞ୍ଚି ଲୋଗାନାଥନଙ୍କୁ ଧରିଥିଲା। ପରେ ତାଙ୍କୁ ହତ୍ୟା ମାମଲାରେ ଗିରଫ କରାଯାଇଥିଲା।

ଅନ୍ୟପଟେ, ପୋଲିସ ଘରୁ ସୁଧାଙ୍କ ମୃତଦେହ ଉଦ୍ଧାର କରି ପୋଷ୍ଟମର୍ଟମ୍ ପାଇଁ ପଠାଇଛି। ଘଟଣାସ୍ଥଳରୁ ଆବଶ୍ୟକ ପ୍ରମାଣ ସଂଗ୍ରହ କରାଯାଉଛି। ତେବେ କେବଳ ମଦ କିଣିବାକୁ ନେଇ ହୋଇଥିବା ବିବାଦ ହିଁ ଏହି ହତ୍ୟାକାଣ୍ଡର ଏକମାତ୍ର କାରଣ କି, ନା ଏହା ପଛରେ ଆଉ କୌଣସି ବ୍ୟକ୍ତିଗତ କାରଣ ରହିଛି, ସେନେଇ ପୋଲିସ ତଦନ୍ତ ଜାରି ରଖିଛି। ଏହି ଘଟଣାକୁ ନେଇ ପେରୁଙ୍ଗୁଡି ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ଦାମ୍ପତ୍ୟ ଜୀବନର ଏକ ବିବାଦ କିପରି ଏକ ଭୟଙ୍କର ଅପରାଧର ରୂପ ନେଲା, ତାହା ଏବେ ତଦନ୍ତର ମୁଖ୍ୟ ପ୍ରସଙ୍ଗ ପାଲଟିଛି। ପୋଲିସ ଅଭିଯୁକ୍ତଙ୍କୁ ପଚରାଉଚରା କରି ଘଟଣାର ପୂରା କ୍ରମ ଏବଂ ହତ୍ୟା ପଛର ପ୍ରକୃତ କାରଣ ଜାଣିବାକୁ ଚେଷ୍ଟା କରୁଛି।