ହାଇଦ୍ରାବାଦ ରେଲଓ୍ବ ଷ୍ଟେସନରେ ଟଳିଗଲା ବଡ଼ ଅଘଟଣ । ଟ୍ରେନ୍ ଛାଡିବା ପୂର୍ବରୁ ଷ୍ଟେସନରେ ହଠାତ୍ ଦେଖିବାକୁ ମିଳିଲା ଭୟଙ୍କର ନିଆଁ । ହାଇଦ୍ରାବାଦ ରେଲୱେ ଷ୍ଟେସନରେ ଜୟପୁର ସ୍ପେଶାଲ୍ ଟ୍ରେନ୍‌ର ଏକ ଖାଲି କୋଚ୍‌ରେ ଲାଗିଗଲା ଭୟଙ୍କର ନିଆଁ । ଯାହାଫଳରେ ଷ୍ଟେସନ ପରିସରରେ କିଛି ସମୟ ପାଇଁ ଆତଙ୍କ ଖେଳିଯାଇଥିଲା ।

ଶୁକ୍ରବାର ହାଇଦ୍ରାବାଦ-ଜୟପୁର ଟ୍ରେନର ତିନି-ସ୍ତରୀୟ ଏସି କୋଚ୍‌ର B1 ଏବଂ B2 କୋଚ୍‌ରେ ଅଗ୍ନିକାଣ୍ଡ ଘଟି ଷ୍ଟେସନ ପରିସରରେ ଆତଙ୍କ ସୃଷ୍ଟି ହୋଇଥିଲା । ସନ୍ଧ୍ୟା ୭ଟାରେ ଟ୍ରେନଟି ହାଇଦ୍ରାବାଦରୁ ଜୟପୁର ଯିବାକୁ ପ୍ରସ୍ତୁତ ହେଉଥିବା ସମୟରେ ଏହି ଅଘଟଣା ଘଟିଥିଲା ।

ରେଳବାଇର ସୂଚନା ଅନୁଯାୟୀ, ଅଗ୍ନିଶମ ବାହିନୀର କର୍ମଚାରୀମାନେ ତୁରନ୍ତ ନିଆଁକୁ ନିୟନ୍ତ୍ରଣ କରିଥିଲେ । ଅଗ୍ନିକାଣ୍ଡ ସମୟରେ କୋଚ୍‌ ଖାଲି ଥିବାରୁ କୌଣସି ଯାତ୍ରୀ ଆହତ ହୋଇ ନଥିଲେ । ତେବେ ଅଗ୍ନିକାଣ୍ଡର କାରଣ ଜାଣିବା ପାଇଁ ତଦନ୍ତ କରାଯାଉଛି। ଘଟଣା ସମ୍ପର୍କରେ ସୂଚନା ପାଇବା ପରେ ଅଗ୍ନିଶମ ବାହିନୀ ଟିମ୍‌ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ ।

ନିଆଁ ଲିଭାଇବା ପାଇଁ ତିନୋଟି ଅଗ୍ନିଶମ ବାହିନୀ ଗାଡ଼ି ନିୟୋଜିତ କରାଯାଇଥିଲା । ବହୁତ ପ୍ରୟାସ ପରେ ଅଗ୍ନିଶମ କର୍ମଚାରୀମାନେ ନିଆଁକୁ ନିୟନ୍ତ୍ରଣ କରିବାରେ ସଫଳ ହୋଇଥିଲେ ଏବଂ ଏହାକୁ ଅନ୍ୟ କୋଚକୁ ବ୍ୟାପିବାରୁ ରୋକିଥିଲେ । ରେଳ ଅଧିକାରୀଙ୍କ ଅନୁଯାୟୀ, ସମୟୋଚିତ ପଦକ୍ଷେପ ଯୋଗୁଁ ଏକ ବଡ଼ ଦୁର୍ଘଟଣା ଏଡାଇ ଦିଆଯାଇଥିଲା ।