ବିଦେଶରୁ ଫେରୁଥିବା ଯାତ୍ରୀଙ୍କ ପାଇଁ ଖୁସି ଖବର । ବୃଦ୍ଧି ପାଇଲା ସୁନା ଓ ସାମଗ୍ରୀ ଆଣିବାର 'ଡ୍ୟୁଟି-ଫ୍ରି' ସୀମା । ଫେବୃଆରୀ ୨ ତାରିଖରୁ ସମଗ୍ର ଦେଶରେ ନୂତନ 'ବ୍ୟାଗେଜ୍ ନିୟମ ୨୦୨୬' ଲାଗୁ ହୋଇଛି । କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ- CBIC ପକ୍ଷରୁ ଏନେଇ ବିଜ୍ଞପ୍ତି ଜାରି ହୋଇଛି । ଫଳରେ ଏବେ ବିଦେଶରୁ ଭାରତ ଫେରୁଥିବା ଯାତ୍ରୀମାନେ ଅଧିକ ମୂଲ୍ୟର ସାମଗ୍ରୀ ବିନା କୌଣସି କଷ୍ଟମ୍ସ ଡ୍ୟୁଟି ବା ଶୁଳ୍କରେ ଆଣିପାରିବେ ।

ଭାରତୀୟ ନାଗରିକ, ଭାରତୀୟ ବଂଶୋଦ୍ଭବ ପର୍ଯ୍ୟଟକ କିମ୍ବା ବୈଧ ଭିସା ଥିବା ବିଦେଶୀ ନାଗରିକ ଏବେ ୭୫,୦୦୦ ଟଙ୍କା ପର୍ଯ୍ୟନ୍ତ ସାମଗ୍ରୀ ବିନା ଶୁଳ୍କରେ ଆଣିପାରିବେ । ପୂର୍ବରୁ ଏହି ସୀମା ୫୦,୦୦୦ ଟଙ୍କା ଥିଲା । ବିଦେଶୀ ପର୍ଯ୍ୟଟକଙ୍କ ପାଇଁ ଏହି ସୀମା ୨୫,୦୦୦ ଟଙ୍କା ରଖାଯାଇଛି । ସୁନା କଏନ କିମ୍ବା ସୁନା ବିସ୍କୁଟ କ୍ଷେତ୍ରରେ ଏହି ନିୟମ ଲାଗୁ ହେବ ନାହିଁ । କଏନ ଓ ବିସ୍କୁଟ ଆକାରରେ ସୁନା ଆଣିଲେ ଶୁଳ୍କ ଦେବାକୁ ଯଦି ଜଣେ ଭାରତୀୟ ନାଗରିକ ବିଦେଶରେ ୧ ବର୍ଷରୁ ଅଧିକ ସମୟ ରହି ଫେରୁଛନ୍ତି, ତେବେ ସେମାନଙ୍କ ପାଇଁ ସୁନା ଗହଣା ଆଣିବା ସୀମାକୁ ଦ୍ୱିଗୁଣିତ କରାଯାଇଛି । ​

ମହିଳା ଯାତ୍ରୀ ସାଥିରେ ୪୦ ଗ୍ରାମ ଶୁଳ୍କମୁକ୍ତ ସୁନା ଗହଣା ଓ ​ପୁରୁଷ ଯାତ୍ରୀ ୨୦ ଗ୍ରାମ ଶୁଳ୍କମୁକ୍ତ ସୁନା ଗହଣା ଆଣିପାରିବେ । ଏହି ଗହଣା କେବଳ ବ୍ୟକ୍ତିଗତ ବ୍ୟବହାର ପାଇଁ ହେବା ଉଚିତ, ବିକ୍ରୟ ପାଇଁ ନୁହେଁ। ୧୮ ବର୍ଷରୁ ଅଧିକ ବୟସର ଯେକୌଣସି ଯାତ୍ରୀ ନିଜ ସହିତ ଗୋଟିଏ ନୂଆ ଲ୍ୟାପଟପ୍ କିମ୍ବା ନୋଟପ୍ୟାଡ୍ ବିନା କୌଣସି ଶୁଳ୍କରେ ଆଣିପାରିବେ । ସେହିପରି ବିଦେଶୀ କିମ୍ବା ଭାରତୀୟ ମୁଦ୍ରା ଆଣିବା ବା ନେବା କ୍ଷେତ୍ରରେ FEMA ବା ବୈଦେଶିକ ମୁଦ୍ରା ପରିଚାଳନା ନିୟମ, ୨୦୧୫ ପାଳନ କରିବାକୁ ପଡ଼ିବ ।