India China Relation / ସଧୁରୁଛି ସମ୍ପର୍କ; LAC ଅଞ୍ଚଳରେ ହ୍ରାସ ପାଇଛି PLA ମୁତୟନ

ବିଗତ କିଛି ବର୍ଷ ଧରି ଉତ୍ତେଜନା ପୂର୍ଣ୍ଣ ରହିଥିବା ଭାରତ-ଚୀନ୍ ସମ୍ପର୍କ ସୁଧୁରୁଥିବା ଭଳି ମନେ ହେଉଛି। ଭାରତୀୟ ପ୍ରତିରକ୍ଷା ମନ୍ତ୍ରଣାଳୟର ଏକ ବିବୃତ୍ତି ଅନୁଯାୟୀ, ଗତ ବର୍ଷ ପ୍ରକୃତ ନିୟନ୍ତ୍ରଣ ସୀମାରେଖା (Line of Actual Control) ଠାରେ ଚୀନୀ ସେନା, ପିପୁଲ୍ସ ଲିବରେସନ ଆର୍ମୀ (PLA) ମୁତୟନ ହ୍ରାସ ପାଇଛି। ମନ୍ତ୍ରଣାଳୟ ଏହା ମଧ୍ୟ କହିଛି ଯେ ଭାରତ-ଚୀନ୍ ମଧ୍ୟରେ ଚାଲିଥିବା ଆଲୋଚନା ଦେଶର ଉତ୍ତର ସୀମାରେ ସକାରାତ୍ମକ ପରିବର୍ତ୍ତନ ଏବଂ ସ୍ଥିରତା ଆଣିଛି।

ପ୍ରତିରକ୍ଷା ମନ୍ତ୍ରଣାଳୟର ସାମ୍ପ୍ରତିକ ବାର୍ଷିକ ରିପୋର୍ଟ ଦର୍ଶାଇଛି ଯେ, ଗତ ବର୍ଷ ଉତ୍ତର ଭାଗରେ PLA (Peoples Liberation Army) ସୈନ୍ୟ ମୁତୟନରେ ଏକ ଗୁରୁତ୍ୱପୂର୍ଣ୍ଣ ହ୍ରାସ ଘଟିଛି।" ୨୦୨୫-୨୬ ରିପୋର୍ଟ ଅନୁଯାୟୀ, ଚୀନ୍ PLA, LAC ଠାରେ ଦଶଟି ମିଳିତ ଅସ୍ତ୍ରଶସ୍ତ୍ର ବ୍ରିଗେଡ୍ ମୁତୟନ କରିଥିଲା। ଯେତେବେଳେ ସୀମାରୁ ଦୂରରେ ପାରମ୍ପରିକ ତାଲିମ କ୍ଷେତ୍ରରେ ଆଉ ଦଶଟି ବ୍ରିଗେଡ୍ ମୁତୟନ କରାଯାଇଥିଲା।

ଏହା ସହ ପଢନ୍ତୁ: ଅନନ୍ୟ ସାମରିକ ପରମ୍ପରା; ନେପାଳୀ ସେନା ଜେନେରାଲ ହେଲେ ଭାରତୀୟ ସେନା ମୁଖ୍ୟ ଧିରଜ ସେଠ

ଯାହାର ଅର୍ଥ ହେଉଛି ଗତ ବର୍ଷ, LAC ଠାରେ ପ୍ରାୟ ୪୦ ହଜାରରୁ ୫୦ ହଜାର ଚୀନୀ ସୈନ୍ୟ ମୁତୟନ କରାଯାଇଥିଲା। ସମାନ ସଂଖ୍ୟାକ ସୈନ୍ୟ ନିର୍ଦ୍ଦିଷ୍ଟ ତାଲିମ କ୍ଷେତ୍ରରେ ମଧ୍ୟ ନିୟୋଜିତ ହୋଇଥିଲେ। ୩୨୩ ପୃଷ୍ଠାର ଏହି ରିପୋର୍ଟ, ଗତ ବର୍ଷ LAC ଠାରେ ନିୟୋଜିତ PLA ସୈନିକଙ୍କ ସଂଖ୍ୟା ପ୍ରଦାନ କରିନାହିଁ। ହେଲେ ତଥାପି ଉଭୟ ପକ୍ଷ ୨୦୨୪ ଅକ୍ଟୋବର ବେଳକୁ ସମସ୍ତ ବିବାଦୀୟ ସ୍ଥାନରୁ ସୈନିକଙ୍କୁ ହଟାଇବା ପାଇଁ ରାଜି ହେବା ପୂର୍ବରୁ, କେବଳ ଲଦାଖ ସେକ୍ଟର ଠାରେ ଏହି ସଂଖ୍ୟା ୬୦ ହଜାରରୁ ଅଧିକ ହେବ ବୋଲି ଆକଳନ କରାଯାଇଥିଲା। ଏହି ଚୁକ୍ତିନାମା ୪ ବର୍ଷରୁ ଅଧିକ ସମୟ ଧରି ଚାଲିଥିବା ଏକ ଗତିରୋଧର ଅନ୍ତ ଘଟାଇଥିଲା। ଯାହା ଉଭୟ ଦେଶ ମଧ୍ୟରେ ସମ୍ପର୍କକୁ ୬ ଦଶନ୍ଧି ମଧ୍ୟରେ ସର୍ବନିମ୍ନ ସ୍ତରରେ ପହଞ୍ଚାଇ ଦେଇଥିଲା।

କ'ଣ ରହିଛି ଉତ୍ତର ସୀମାରେ ବର୍ତ୍ତମାନର ସ୍ଥିତି?
ଗତ ବର୍ଷ ଉତ୍ତର ସୀମାରେ, ଚୀନ୍ ଦ୍ୱାରା ନିୟୋଜିତ PLA ସୈନିକଙ୍କ ସଂଖ୍ୟାରେ ଏକ ଗୁରୁତ୍ୱପୂର୍ଣ୍ଣ ହ୍ରାସ ଘଟିଥିଲା। ପ୍ରକୃତ ନିୟନ୍ତ୍ରଣ ରେଖା (LAC) ସହିତ ପ୍ରତ୍ୟେକ ଅଞ୍ଚଳରେ ଏବଂ ପାରମ୍ପରିକ ତାଲିମ କ୍ଷେତ୍ରରେ ଦଶଟି ମିଳିତ ଅସ୍ତ୍ରଶସ୍ତ୍ର ବ୍ରିଗେଡ ଆକାର ପର୍ଯ୍ୟନ୍ତ ବାହିନୀ ନିୟୋଜିତ କରାଯାଇଥିଲା। LAC ସ୍ଥିତ ସମସ୍ତ ସେକ୍ଟର ଠାରେ ଭାରତୀୟ ସେନା ନିୟୋଜନ ଶକ୍ତିଶାଳୀ ହେବା ସହ ଏହା ଏକ ମଜବୁତ ସ୍ଥିତିରେ ରହିଛି। ଯିଏ ଯେକୌଣସି ପ୍ରକାରର ଅପ୍ରତ୍ୟାଶିତ ପରିସ୍ଥିତିର ମୁକାବିଲା କରିବାକୁ ପ୍ରସ୍ତୁତ।