India Poverty Decline / ଭାରତରେ ଦ୍ରୁତ ଗତିରେ କମୁଛି ଦାରିଦ୍ର୍ୟ, ପ୍ରାୟ ୫୦ କୋଟି ଲୋକଙ୍କ ଜୀବନରେ ଆସିଲା ବଡ଼ ପରିବର୍ତ୍ତନ

ଭାରତ ପାଇଁ ଆସିଛି ଏକ ଖୁସି ଖବର। ଦେଶରେ ଦ୍ରୁତ ଗତିରେ ହ୍ରାସ ପାଉଛି ଦାରିଦ୍ର୍ୟ । ବିଶ୍ୱ ବ୍ୟାଙ୍କର ନୂତନ ରିପୋର୍ଟ ଅନୁଯାୟୀ, ଗତ ୧୨ ବର୍ଷ ମଧ୍ୟରେ ଭାରତରେ କୋଟି କୋଟି ଲୋକ ଦାରିଦ୍ର୍ୟରୁ ମୁକ୍ତ ହୋଇଛନ୍ତି । ଦାରିଦ୍ର୍ୟ ହ୍ରାସ କ୍ଷେତ୍ରରେ ଭାରତର ଏହି ସଫଳତାକୁ ବିଶ୍ୱସ୍ତରରେ ଏକ ବଡ଼ ଉପଲବ୍ଧି ଭାବେ ଦେଖାଯାଉଛି ।
ବିଶ୍ୱ ବ୍ୟାଙ୍କ ପକ୍ଷରୁ ପ୍ରକାଶିତ 'ଇଣ୍ଡିଆ ପଭର୍ଟି ଆଣ୍ଡ ଇକ୍ୱିଟି ବ୍ରିଫ୍-ଅକ୍ଟୋବର ୨୦୨୬' ରିପୋର୍ଟରେ ଭାରତର ଦାରିଦ୍ର୍ୟ ହ୍ରାସ ସମ୍ପର୍କରେ ଏହି ତଥ୍ୟ ସାମ୍ନାକୁ ଆସିଛି । ରିପୋର୍ଟ ଅନୁଯାୟୀ, ୨୦୧୧ ମସିହାରେ ଭାରତର ୫୭.୭ ପ୍ରତିଶତ ଲୋକ ଦାରିଦ୍ର୍ୟ ସୀମା ତଳେ ରହୁଥିବା ବେଳେ ୨୦୨୩ ମସିହାରେ ଏହି ହାର ହ୍ରାସ ପାଇ ୧୬.୧ ପ୍ରତିଶତରେ ପହଞ୍ଚିଛି ।

ସବୁଠାରୁ ବଡ଼ କଥା ହେଉଛି, ଏହି ୧୨ ବର୍ଷ ମଧ୍ୟରେ ପ୍ରାୟ ୪୯.୬ କୋଟି ଲୋକ ଦାରିଦ୍ର୍ୟରୁ ମୁକ୍ତ ହୋଇଛନ୍ତି । ଏହା ସହିତ ଦିନକୁ ୩ ଡଲାର ଆୟ ସୀମା ଆଧାରରେ ମପାଯାଉଥିବା ଚରମ ଦାରିଦ୍ର୍ୟ ହାର ମଧ୍ୟ ୨୦୧୧ର ୨୭.୧ ପ୍ରତିଶତରୁ ହ୍ରାସ ପାଇ ୨୦୨୩ରେ ମାତ୍ର ୨.୬ ପ୍ରତିଶତକୁ ଖସିଆସିଛି ।

ରିପୋର୍ଟରେ କୁହାଯାଇଛି ଯେ, ଭାରତ ଆର୍ଥିକ ଏବଂ ଅଣ-ଆର୍ଥିକ ଉଭୟ କ୍ଷେତ୍ରରେ ଦାରିଦ୍ର୍ୟ ହ୍ରାସ କରିବାରେ ଉଲ୍ଲେଖନୀୟ ଅଗ୍ରଗତି କରିଛି । ରୋଜଗାର ସୁଯୋଗରେ ବୃଦ୍ଧି, ସରକାରୀ କଲ୍ୟାଣକାରୀ ଯୋଜନା ଏବଂ ଖାଦ୍ୟ ସବସିଡି ଭଳି ସାମାଜିକ ସୁରକ୍ଷା ବ୍ୟବସ୍ଥା ଏହି ସଫଳତାର ପ୍ରମୁଖ କାରଣ ବୋଲି ଆଶା କରାଯାଉଛି ।

କେବଳ ସେତିକି ନୁହେଁ, ଆଗାମୀ ଦିନରେ ମଧ୍ୟ ଦାରିଦ୍ର୍ୟ ହାର ଆହୁରି କମିବ ବୋଲି ବିଶ୍ୱ ବ୍ୟାଙ୍କ ଆକଳନ କରିଛି । ୨୦୨୬ ମସିହାରେ ଦାରିଦ୍ର୍ୟ ହାର ୧୪.୨ ପ୍ରତିଶତ ରହିବାକୁ ଥିବା ବେଳେ ୨୦୨୮ ସୁଦ୍ଧା ଏହା ୧୨.୧ ପ୍ରତିଶତକୁ ହ୍ରାସ ପାଇପାରେ । ରୋଜଗାରରେ ବୃଦ୍ଧି ଏବଂ ସାମାଜିକ ସୁରକ୍ଷା ଯୋଜନାର ସମ୍ପ୍ରସାରଣ ଏହି ଲକ୍ଷ୍ୟ ହାସଲରେ ସହାୟକ ହେବ ବୋଲି ରିପୋର୍ଟରେ ଆଶା ପ୍ରକାଶ କରାଯାଇଛି ।

ଏହି ସଫଳତାକୁ ନେଇ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମଧ୍ୟ ପ୍ରତିକ୍ରିୟା ରଖିଛନ୍ତି । ସରକାରଙ୍କ ନିରନ୍ତର ନୀତିଗତ ପ୍ରୟାସ ଏବଂ ଜନକଲ୍ୟାଣକାରୀ ଯୋଜନାର ସ୍ପଷ୍ଟ ପରିଣାମ ଏବେ ଦେଖିବାକୁ ମିଳୁଛି ବୋଲି ସେ କହିଛନ୍ତି । ଏହା ଦେଶରେ ସମାବେଶୀ ବିକାଶ ଏବଂ ଅଧିକ ଆର୍ଥିକ ସୁଯୋଗ ସୃଷ୍ଟି କରିବାରେ ସହାୟକ ହେଉଛି ।
ତେବେ ବିଶ୍ୱ ବ୍ୟାଙ୍କର ଏହି ରିପୋର୍ଟ ଭାରତର ଆର୍ଥିକ ଏବଂ ସାମାଜିକ ବିକାଶକୁ ନେଇ ଏକ ନୂଆ ଆଶା ସୃଷ୍ଟି କରିଛି। ଆଗାମୀ ବର୍ଷଗୁଡ଼ିକରେ ଏହି ଅଗ୍ରଗତି କେତେଦୂର ଜାରି ରହୁଛି, ତାହା ଉପରେ ଏବେ ସମସ୍ତଙ୍କ ନଜର ।