S-400 Air Defense System: ଆସନ୍ତା ମାସ ପ୍ରାରମ୍ଭରେ ଭାରତକୁ ମିଳିବାକୁ ଯାଉଛି ଚତୁର୍ଥ ଏସ-୪୦୦ ୟୁନିଟ୍। ଋଷିଆ ଦ୍ୱାରା ବିକଶିତ ଏହି ବାୟୁ ପ୍ରତିରକ୍ଷା ପ୍ରଣାଳୀ ଅପରେସନ ସିନ୍ଦୁର ସମୟରେ ପାକିସ୍ତାନ ଦ୍ୱାରା ବାୟୁ ମାର୍ଗରେ ହୋଇଥିବା ସମସ୍ତ ଆକ୍ରମଣକୁ ପଣ୍ଡ କରି ଦେଇଥିଲା। ଚତୁର୍ଥ ଏସ-୪୦୦ ୟୁନିଟ୍ ମିଳିବା ପରେ ଦେଶର ବାୟୁସୀମା ସୁରକ୍ଷାକୁ ଆହୁରି ମଜବୁତ କରିବ। ଗତ ୨୦୧୮ ଅକ୍ଟୋବରରେ ଭାରତ, ଏହାର ପାରମ୍ପରିକ ସହଯୋଗୀ ଋଷିଆ ସହିତ ୫ ଏସ-୪୦୦ ବାୟୁ ପ୍ରତିରକ୍ଷା ପ୍ରଣାଳୀ କ୍ରୟ କରିବା ପାଇଁ ୫ ବିଲିୟନ ଡଲାର ମୂଲ୍ୟର ଚୁକ୍ତି ସ୍ୱାକ୍ଷର କରିଥିଲା। ଯାହା ମଧ୍ୟରୁ ତିନୋଟି ପୂର୍ବରୁ ପ୍ରଦାନ କରାଯାଇସାରିଛି। ଏହି ବାୟୁ ପ୍ରତିରକ୍ଷା ପ୍ରଣାଳୀର ବିତରଣ ପାଇଁ ନୂତନ ସମୟ ସୀମା ଅନୁଯାୟୀ ପଞ୍ଚମ ୟୁନିଟ୍ ନଭେମ୍ବର ସୁଦ୍ଧା ପ୍ରଦାନ କରାଯିବ।

ଅପରେସନ ସିନ୍ଦୁର ବେଳେ ଚମତ୍କାର ଦେଖାଇଥିଲା ଏସ-୪୦୦
ଅପରେସନ ସିନ୍ଦୁର ସମୟରେ ଏସ-୪୦୦ ବାୟୁ ପ୍ରତିରକ୍ଷା ପ୍ରଣାଳୀ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଗତ ମାସରେ ଭାରତ, ଋଷିଆ ପାଖରୁ ଏସ୍-୪୦୦ ବାୟୁ ପ୍ରତିରକ୍ଷା ପ୍ରଣାଳୀର ଆଉ ପାଞ୍ଚଟି ୟୁନିଟ୍ କ୍ରୟ କରିବାକୁ ଅନୁମୋଦନ କରିଥିଲା। ଯାହା ପରେ ମୋଟ ସଂଖ୍ୟା ବୃଦ୍ଧି ପାଇ ୧୦ ହୋଇଛି। ରିପୋର୍ଟ ଅନୁଯାୟୀ, ଏହି ବାୟୁ ପ୍ରତିରକ୍ଷା ପ୍ରଣାଳୀର ଚତୁର୍ଥ ୟୁନିଟ୍ ଋଷିଆ ପଠାଇ ସାରିଥିବା ବେଳେ ଆଗାମୀ କିଛି ଦିନ ମଧ୍ୟରେ ଦେଶରେ ପହଞ୍ଚିବ। ଭାରତ ପ୍ରାୟ ୮ ବର୍ଷ ପୂର୍ବରୁ ଏସ-୪୦୦ ବାୟୁ ପ୍ରତିରକ୍ଷା ପ୍ରଣାଳୀ କ୍ରୟ କରିବା ପାଇଁ ଋଷିଆ ସହିତ ଚୁକ୍ତି ସ୍ୱାକ୍ଷର କରିଥିଲା। ସେହି ସମୟରେ ଆମେରିକା, ଋଷିଆ ପାଖରୁ ଏହି ହତିଆର କ୍ରୟ କରୁଥିବା ନେଇ ଭାରତ ବିରୋଧରେ ପ୍ରତିବନ୍ଧକ ଲଗାଇବାକୁ ଧମକ ଦେଇଥିଲା।

ପୁନର୍ବାର ଆମେରିକା ସାଜିବ କି ବାଧକ?
ଆମେରିକା କହିଥିଲା ​​ଯେ ଏହି ଭାରତ-ଋଷିଆ ମଧ୍ୟରେ ହୋଇଥିବା ଚୁକ୍ତିକୁ ଅନୁଧ୍ୟାନ କରି ସାରିବା ପରେ ଯାଇ ଭାରତ ବିରୋଧରେ "କାଟସ" (CAATSA) ଆଇନ ଅନୁଯାୟୀ ପ୍ରତିବନ୍ଧକ ଲଗାଇପାରେ। ସୂତ୍ରରୁ ମିଳିଥିବା ଖବର ଅନୁଯାୟୀ ଭାରତ, ଆମେରିକା ଦ୍ୱାରା ଲଗାଯିବାକୁ ଥିବା ପ୍ରତିବନ୍ଧକରୁ କୌଣସି ଆଶ୍ୱସ୍ତି ଆଶା କରେ ନାହିଁ। କାରଣ ଏହି ନୂତନ କ୍ରୟ ପୂର୍ବରୁ ହୋଇଥିବା କ୍ରୟର ଏକ ଅନୁଗାମୀ କ୍ରମ। ଭାରତୀୟ ବାୟୁସେନା ଗତ ବର୍ଷ ମେ ୭-୧୦ ତାରିଖ ମଧ୍ୟରେ ପାକିସ୍ତାନ ସହିତ ଲଢେଇ ଜାରି ରଖିଥିବା ବେଳେ ଏସ-୪୦୦ ବାୟୁ ପ୍ରତିରକ୍ଷା ପ୍ରଣାଳୀର ବ୍ୟାପକ ଭାବରେ ବ୍ୟବହାର କରିଥିଲା।

ବିଶ୍ୱର ସବୁଠାରୁ ଉନ୍ନତ ବାୟୁ ପ୍ରତିରକ୍ଷା ପ୍ରଣାଳୀ ମଧ୍ୟରୁ ଅନ୍ୟତମ ଏସ-୪୦୦
ଅପରେସନ ସିନ୍ଦୁର ଶେଷ ହେବାର ମାତ୍ର ସପ୍ତାହ ପରେ, ଏସ-୪୦୦ ବାୟୁ ପ୍ରତିରକ୍ଷା ପ୍ରଣାଳୀର ଆଉ ଏକ ବ୍ୟାଚ୍ କ୍ରୟ କରିବା ପାଇଁ ଏକ ପ୍ରସ୍ତାବ ଦିଆଯାଇଥିଲା। ଋଷିଆ ଏହି ପ୍ରଣାଳୀକୁ କିପରି ପରିଚାଳନା କରାଯିବା ସେଥିପାଇଁ ଭାରତୀୟ ସୈନ୍ୟ ଗୋଷ୍ଠୀକୁ ତାଲିମ ଦେଇସାରିଛି। ଏସ-୪୦୦ ପ୍ରଣାଳୀକୁ ଋଷିଆର ସବୁଠାରୁ ଉନ୍ନତ ଏବଂ ଦୀର୍ଘ ଦୂରଗାମୀ ବାୟୁ ପ୍ରତିରକ୍ଷା ପ୍ରଣାଳୀ ଭାବରେ ବିବେଚନା କରାଯାଏ। ପହଲଗାମ ଆତଙ୍କବାଦୀ ଆକ୍ରମଣ ପରେ, ଭାରତ ପାଖରେ ରହିଥିବା ଚାରୋଟି ଏସ-୪୦୦ ପ୍ରଣାଳୀ ଅପରେସନ ସିନ୍ଦୂର ସମୟରେ ସେମାନଙ୍କର ଅସାଧାରଣ ପ୍ରତିଭା ଦେଖାଇଥିଲେ। ଯାହା ପାକିସ୍ତାନରେ ଆତଙ୍କବାଦୀ ଶିବିରକୁ ଧ୍ୱଂସ କରିଥିଲା।