New 3 Hours IT Rules / ସୋସିଆଲ ମିଡିଆ ଉପରେ ବାଜିଲା ସରକାରୀ ଛାଟ; ୩ ଘଣ୍ଟା ମଧ୍ୟରେ ହଟିବ ବିବାଦୀୟ ବିଷୟବସ୍ତୁ

IT rules amended content takedown: ଡିଜିଟାଲ୍ ସ୍ପେସ୍ ଏବଂ ସୋସିଆଲ ମିଡି଼ଆକୁ ଅଧିକ ସୁରକ୍ଷିତ ଏବଂ ଉତ୍ତରଦାୟୀ କରିବା ପାଇଁ ଭାରତ ସରକାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଦ୍ୱାରା ଜାରି ହୋଇଥିବା ନୂତନ ନିର୍ଦ୍ଦେଶନାମା ଅନୁଯାୟୀ, ସୋସିଆଲ ମିଡି଼ଆ ଏବଂ ଡିଜିଟାଲ୍ ପ୍ଲାଟଫର୍ମ ରିପୋର୍ଟ ପାଇବାର ମାତ୍ର ୩ ଘଣ୍ଟା ମଧ୍ୟରେ ସେମାନଙ୍କର ପ୍ଲାଟଫର୍ମ୍ରୁ ଯେକୌଣସି ଧରଣର ବିବାଦୀୟ, ଆପତ୍ତିଜନକ, ଅବୈଧ କିମ୍ବା ସମ୍ବେଦନଶୀଳ ବିଷୟବସ୍ତୁ ହଟାଇବାକୁ ବାଧ୍ୟତାମୂଳକ କରାଯାଇଛି। ପୂର୍ବରୁ, ସୋସିଆଲ ମିଡିଆ କମ୍ପାନୀ ଅଭିଯୋଗ ପାଇବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ୨୪ ଘଣ୍ଟାରୁ ୩୬ ଘଣ୍ଟା ସମୟ ନେଉଥିଲା। ହେଲେ ଏହି ସମୟସୀମା ବର୍ତ୍ତମାନ ମାତ୍ର ୩ ଘଣ୍ଟାକୁ ହ୍ରାସ କରାଯାଇଛି।

ସରକାରଙ୍କ ଯୁକ୍ତି: କିଛି ମିନିଟ୍ ମଧ୍ୟରେ ଲକ୍ଷ ଲକ୍ଷ ଲୋକଙ୍କ ପାଖରେ ପହଞ୍ଚିଯାଏ ସୋସିଆଲ ମିଡ଼ିଆ ବିଷୟବସ୍ତୁ
କେନ୍ଦ୍ର ସରକାରଙ୍କ କହିବା ଅନୁସାରେ ଡିଜିଟାଲ୍ ଯୁଗରେ, ଯେକୌଣସି ଡିପ୍ ଫେକ୍ କିମ୍ବା ଭ୍ରାମକ ଭିଡିଓ କିଛି ମିନିଟ ମଧ୍ୟରେ ଲକ୍ଷ ଲକ୍ଷ ଲୋକଙ୍କ ପାଖରେ ପହଞ୍ଚିପାରେ। ଏହି ଦ୍ରୁତ ପ୍ରସାର ଜଣେ ବ୍ୟକ୍ତିଙ୍କ ସମ୍ମାନ, ସାମାଜିକ ସଦ୍ଭାବ ଏବଂ ଜନ ସୁରକ୍ଷା ପାଇଁ ଅପୂରଣୀୟ କ୍ଷତି କରିଥାଏ। ଏହି ୩ ଘଣ୍ଟାର ସମୟସୀମା ଆରମ୍ଭରୁ ଆପତ୍ତିଜନକ ବିଷୟବସ୍ତୁର ପ୍ରସାରକୁ ରୋକିବାରେ ଅତ୍ୟନ୍ତ ପ୍ରଭାବଶାଳୀ ହେବ। ସରକାରଙ୍କ ଅନୁଯାୟୀ ୩ ଘଣ୍ଟା ମଧ୍ୟରେ ବିଷୟବସ୍ତୁ ହଟାଇବା ନିୟମ କଡ଼ାକଡ଼ି ଭାବରେ ଲାଗୁ କରାଯିବ। ଡିପଫେକ୍ ଏବଂ ଏଆଇ-ଜେନେରେଟେଡ୍ ବିଷୟବସ୍ତୁ ଉପରେ ସତର୍କ ନଜର ରଖାଯିବ।

ଏହା ସହ ପଢନ୍ତୁ: ହ୍ୱାଟ୍ସଆପ୍-ଟେଲିଗ୍ରାମର ନୂତନ ଫିଚର ଉପରେ ସରକାରଙ୍କ ନଜର; ୨୦ ଦିନ ମଧ୍ୟରେ ଆସିପାରେ ବଡ଼ ନିଷ୍ପତ୍ତି

ଏହି ବିଷୟବସ୍ତୁକୁ ଏବେ ସୋସିଆଲ ମିଡିଆରୁ ତୁରନ୍ତ ହଟାଇବାକୁ ହେବ
ଜଣେ ବ୍ୟକ୍ତିଙ୍କ ପ୍ରତିଛବିକୁ ବଦନାମ କରୁଥିବା ନକଲି ଫଟୋ କିମ୍ବା ଭିଡିଓ
ଶିଶୁ ଯୌନ ନିର୍ଯାତନା ସାମଗ୍ରୀ (CSAM): ଛୋଟ ପିଲାଙ୍କ ଜଡିତ ଯେକୌଣସି ଆପତ୍ତିଜନକ ବିଷୟବସ୍ତୁ
ଗୋପନୀୟତା ଉଲ୍ଲଂଘନ କ୍ଷେତ୍ରରେ: ସମ୍ମତି ବିନା ସେୟାର କରାଯାଇଥିବା ବ୍ୟକ୍ତିଗତ ଏବଂ ଅଶ୍ଳୀଳ ସାମଗ୍ରୀ
ସୁରକ୍ଷା ଏବଂ ଶାନ୍ତି ପ୍ରତି ବିପଦ କ୍ଷେତ୍ରରେ: ଦେଶର ସାର୍ବଭୌମତ୍ୱ ଏବଂ ଆଇନ ଶୃଙ୍ଖଳାକୁ ପ୍ରଭାବିତ କରୁଥିବା ଭ୍ରାମକ ଖବର ଉଲ୍ଲଂଘନ ପାଇଁ

ନିୟମ ଉଲ୍ଲଂଘନ ପାଇଁ ନିଆଯିବ କଠୋର କାର୍ଯ୍ୟାନୁଷ୍ଠାନ
ସରକାର ସ୍ପଷ୍ଟ କରିଛନ୍ତି ଯେ ୩ ଘଣ୍ଟା ସୀମା ପାଳନ ନ କରୁଥିବା ସୋସିଆଲ ମିଡ଼ିଆ ପ୍ଲାଟଫର୍ମ ସୂଚନା ପ୍ରଯୁକ୍ତିବିଦ୍ୟା (IT) ଆଇନର ଧାରା ୭୯ ଅନୁଯାୟୀ ଆଇନଗତ ସୁରକ୍ଷା ହରାଇବେ। ଯାହର ଫଳସ୍ୱରୂପ, ସମ୍ପୃକ୍ତ କମ୍ପାନୀ ମଧ୍ୟସ୍ଥିଙ୍କ ମାଧ୍ୟମରେ ନୁହେଁ ବରଂ ସିଧାସଳଖ ଆଇନଗତ ଏବଂ ଫୌଜଦାରୀ କାର୍ଯ୍ୟାନୁଷ୍ଠାନର ସାମ୍ନା କରିବେ।