ଭାରତ ଏକ ବିବିଧତାର ଦେଶ ହେଉଥିବା ସତ୍ତ୍ୱେ ଏହାର ଏକତା ହିଁ ତାହାର ସବୁଠୁ ବଡ଼ ଶକ୍ତି । ଭାରତର ବିଭିନ୍ନ ପ୍ରାନ୍ତରେ ବହୁ ପ୍ରକାର ଭାଷା ପ୍ରଚଳିତ ସଂସ୍କୃତି, ପରମ୍ପରା ଓ ଭାଷା ଭିନ୍ନ ଥିଲେ ମଧ୍ୟ ଭାରତୀୟ ଏକ ବୋଲି କହିଛନ୍ତି ହିମାଚଳ ପ୍ରଦେଶର ରାଜ୍ୟପାଳ କବିନ୍ଦର ଗୁପ୍ତା l

ସେ କହିଛନ୍ତି, ଦେଶର ବିଭିନ୍ନ ପ୍ରାନ୍ତରେ ଭାଷା, ସଂସ୍କୃତି ଓ ପରମ୍ପରା ଭିନ୍ନ ହୋଇଥିଲେ ମଧ୍ୟ ଆମେ ସମସ୍ତେ ଭାରତୀୟ ଏବଂ ଏହା ହିଁ ଆମ ଦେଶର ସୌନ୍ଦର୍ଯ୍ୟ । ପ୍ରଧାନମନ୍ତ୍ରୀଙ୍କ ''ଏକ ଭାରତ, ଶ୍ରେଷ୍ଠ ଭାରତ" ଦୃଷ୍ଟିକୋଣ ଏପରି କାର୍ଯ୍ୟକ୍ରମ ମାଧ୍ୟମରେ ପ୍ରତିଫଳିତ ହେଉଥିବା ସେ ଉଲ୍ଲେଖ କରିଛନ୍ତି ।

Press Information Bureauର ତତ୍ତ୍ୱାବଧାନରେ ହିମାଚଳ ପ୍ରଦେଶ ଗସ୍ତରେ ଥିବା ଓଡ଼ିଶାର ସାମ୍ବାଦିକ ପ୍ରତିନିଧି ଦଳ ସୋମବାର ଲୋକଭବନରେ ରାଜ୍ୟପାଳଙ୍କ ସହ ସୌଜନ୍ୟମୂଳକ ସାକ୍ଷାତ କରିଥିଲେ । ସେମାନେ ରାଜ୍ୟର ସଂସ୍କୃତି ଓ ପରମ୍ପରା ସମ୍ପର୍କରେ ଅନୁଭବ ବାଣ୍ଟିଥିଲେ ।

ରାଜ୍ୟପାଳ କହିଛନ୍ତି, ହିମାଚଳ ପ୍ରଦେଶରେ ଅଟଳ ସୁଡ଼ଙ୍ଗ ସହିତ ଅନ୍ୟାନ୍ୟ ଭିତ୍ତିଭୂମି ବିକାଶ କାର୍ଯ୍ୟ ଦ୍ରୁତ ଗତିରେ ଚାଲିଛି। ସେହିପରି ଜମ୍ମୁ-କାଶ୍ମୀରରେ ମଧ୍ୟ ସଡ଼କ, ସୁଡ଼ଙ୍ଗ, ବିମାନ ଓ ରେଳ ସଂଯୋଗ ବୃଦ୍ଧି ପାଇଛି । ଯାହା ସୀମାନ୍ତ ଅଞ୍ଚଳକୁ ମୁଖ୍ୟଧାରା ସହିତ ଯୋଡ଼ି ଦେଉଛି ।

ସେ ଆହୁରି କହିଛନ୍ତି, ରାଜ୍ୟର ଅର୍ଥନୀତିକୁ ସୁଦୃଢ଼ କରିବା ପାଇଁ ସ୍ଥାନୀୟ ଉତ୍ପାଦ ଓ ଔଷଧୀୟ ଉଦ୍ଭିଦ ଚାଷକୁ ପ୍ରୋତ୍ସାହନ ଦେବା ଆବଶ୍ୟକ । ଏହା ସହିତ ନିଶାମୁକ୍ତ ହିମାଚଳ ଓ ପ୍ରାକୃତିକ କୃଷିକୁ ଆହୁରି ଆଗକୁ ବଢ଼ାଇବା ଉପରେ ଜୋର ଦେଇଛନ୍ତି । ପର୍ଯ୍ୟଟନକୁ କ୍ରୀଡା, ବିଶେଷକରି ଶୀତକାଳୀନ କ୍ରୀଡା ସହ ଯୋଡ଼ିବା ଓ ଯୁବକମାନଙ୍କୁ ଦକ୍ଷତା ବିକାଶ ମାଧ୍ୟମରେ ନୂଆ ଦିଗ ଦେବା ଉପରେ ସେ ଗୁରୁତ୍ୱ ଦେଇଛନ୍ତି ।

ଏହି ଅବସରରେ ପିଆଇବିର ସହକାରୀ ନିର୍ଦ୍ଦେଶକ ସଂଜୀବ ଶର୍ମା ରାଜ୍ୟପାଳଙ୍କୁ ସମ୍ମାନିତ କରିଥିଲେ । ପ୍ରତିନିଧି ଦଳ ଲୋକଭବନ ପରିଦର୍ଶନ କରି ଏହାର ଐତିହ୍ୟ କକ୍ଷ ଦେଖି ପ୍ରଭାବିତ ହୋଇଥିଲେ । ରାଜ୍ୟପାଳଙ୍କ ସଚିବ ସି.ପି. ବର୍ମା ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।