ଭାରତୀୟ ରେଳ ଲକ୍ଷାଧିକ ଲୋକଙ୍କ ପାଇଁ ପାଲଟିଛି ଜୀବନରେଖା । ପ୍ରତିଦିନ ଲକ୍ଷ ଲକ୍ଷ ଲୋକ ଏହା ମାଧ୍ୟମରେ ନିଜର ଗନ୍ତବ୍ୟସ୍ଥଳରେ ପହଞ୍ଚିଥାନ୍ତି । କମ୍ ଭଡ଼ା ସତ୍ତ୍ୱେ ଏବେ ବି ଏମିତି କିଛି ଯାତ୍ରୀ ଅଛନ୍ତି, ଯେଉଁମାନେ ବିନା ଟିକେଟ୍‌ରେ ଯାତ୍ରା କରନ୍ତି । କିନ୍ତୁ ଏବେ ଏଭଳି ବିନା ଟିକେଟ୍‌ରେ ଯାଉଥିବା ଯାତ୍ରୀମାନେ ଅଡ଼ୁଆରେ ପଡ଼ିପାରନ୍ତି ।

ଭାରତୀୟ ରେଳବାଇ ଯାତ୍ରୀମାନଙ୍କ ପାଇଁ ନିୟମକୁ ପୂର୍ବ ଅପେକ୍ଷା ଆହୁରି କଠୋର କରିଛି । ଏବେ ବିନା ବୈଧ ଟିକେଟ୍‌ରେ ଧରାପଡ଼ିଲେ ପୂର୍ବପେକ୍ଷା ଦୁଇଗୁଣା ଜରିମାନା ଦେବାକୁ ପଡ଼ିବ । ଆଜିଠାରୁ ଲାଗୁ ହୋଇଥିବା ଏହି ନୂଆ ନିୟମ ଯାତ୍ରୀଙ୍କ ମଧ୍ୟରେ ଶୃଙ୍ଖଳା ବଜାୟ ରଖିବା ସହ ବିନା ଟିକେଟ୍ ଯାତ୍ରାକୁ ରୋକିବା ଲକ୍ଷ୍ୟ ନେଇ ଆସିଛି ।

ନୂତନ ରେଳ ନିୟମ ଅନୁଯାୟୀ, ପବ୍ଲିକ୍ ଟ୍ରଷ୍ଟ ଆଇନ ୨୦୨୬ ଅଧୀନରେ ରେଳବାଇ ଆଇନ ୧୯୮୯ର ଧାରା ୧୩୭ ଏବଂ ୧୩୮ ସଂଶୋଧନ କରାଯାଇଛି । ଏହା ଅନୁଯାୟୀ, ବିନା ଟିକେଟ୍ କିମ୍ବା ପୂର୍ବରୁ ବ୍ୟବହୃତ ଟିକେଟ୍ ସହିତ ଯାତ୍ରା କରିବା ଏବେ ଏକ ଅପରାଧ ଭାବରେ ବିବେଚନା କରାଯିବ । ଧରାପଡ଼ିଲେ ଯାତ୍ରୀମାନଙ୍କୁ କେବଳ ସମ୍ପୂର୍ଣ୍ଣ ଭଡ଼ା ନୁହେଁ ବରଂ ଏକ ପୃଥକ ଜରିମାନା ମଧ୍ୟ ଦେବାକୁ ପଡିବ । ପୂର୍ବରୁ ଜରିମାନା ୨୫୦ ଥିଲା । କିନ୍ତୁ ବର୍ତ୍ତମାନ ନୂଆ ସର୍ବନିମ୍ନ ଜରିମାନା ୫୦୦ କରାଯାଇଛି ।

କେଉଁ କ୍ଷେତ୍ରରେ ଜରିମାନା ଲାଗୁ ହେବ ?

• ଯଦି ଜଣେ ଯାତ୍ରୀ ବିନା ଟିକେଟରେ ଯାତ୍ରା କରୁଥିବା ଧରାପଡ଼େ

• ଯଦି ଜଣେ ଯାତ୍ରୀ ପୁରୁଣା ଟିକେଟ୍ ସହିତ ଯାତ୍ରା କରନ୍ତି, ତେବେ ଜରିମାନା ଲାଗୁ ହେବ

• କିମ୍ବା ଯଦି କେହି ଅବୈଧ ଟିକେଟ୍ ସହିତ ଯାତ୍ରା କରନ୍ତି

ରେଳବାଇ ସ୍ପଷ୍ଟ କରିଛି ଯେ ଜରିମାନା ନ ଦେଲେ ସେମାନଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ । କେବଳ ଏତିକି ନୁହେଁ, ଉଲ୍ଲଂଘନକାରୀଙ୍କୁ ଛଅ ମାସ ପର୍ଯ୍ୟନ୍ତ ଜେଲଦଣ୍ଡ ମଧ୍ୟ ହୋଇପାରେ । ରେଳବାଇ ଯାତ୍ରୀମାନଙ୍କୁ ବିନା ଟିକେଟ୍‌ରେ ଯାତ୍ରା ନ କରିବାକୁ ଅପିଲ୍ କରିଛି ।