IndiGo Emergency Landing / ମଝି ଆକାଶରେ ବିମାନରେ ତ୍ରୁଟି, ଅଳ୍ପକେ ବର୍ତ୍ତିଲେ ୧୯୨ ଯାତ୍ରୀ

ପୁଣେରୁ ଗୁଆହାଟୀ ଯାଉଥିବା ଇଣ୍ଡିଗୋର ଏକ ବିମାନ (ଫ୍ଲାଇଟ୍ ନମ୍ବର 6E 0623) ରବିବାର ସକାଳେ ପୁଣେ ବିମାନବନ୍ଦରରେ ଜରୁରୀ ଅବତରଣ କରିଛି । ବିମାନରେ ମୋଟ ୧୯୨ ଜଣ ଯାତ୍ରୀ ଓ କ୍ରୁ ସଦସ୍ୟ ଥିଲେ । ଉଡ଼ାଣ ଭରିବା ପରେ ବିମାନର ଲ୍ୟାଣ୍ଡିଂ ଗିୟର୍ ଭିତରକୁ ଯାଇନଥିବାରୁ ଏହି ଜରୁରୀ ଅବତରଣ କରାଯାଇଥିଲା। ତେବେ ସୌଭାଗ୍ୟବଶତଃ ସମସ୍ତ ୧୯୨ ଜଣ ସୁରକ୍ଷିତ ଅଛନ୍ତି ।

ଘଟଣା ସମ୍ପର୍କରେ ସୂଚନା ମିଳିବା ପରେ ପୁଣେ ବିମାନବନ୍ଦର ପ୍ରଶାସନ ATC, ଇଣ୍ଡିଗୋ ଏବଂ ଅନ୍ୟ ସମ୍ପୃକ୍ତ ଏଜେନ୍ସିଗୁଡ଼ିକ ସହ ସମନ୍ୱୟ ରକ୍ଷା କରିଥିଲା। ଭାରତୀୟ ବାୟୁସେନା (IAF) ପକ୍ଷରୁ ଫୁଲ୍ ଏମର୍ଜେନ୍ସି ଘୋଷଣା କରାଯାଇଥିଲା । ଏହାପରେ ଜରୁରୀକାଳୀନ ପ୍ରକ୍ରିୟା ଆରମ୍ଭ ହେବା ସହ ଅଗ୍ନିଶମ ବାହିନୀ, ଆମ୍ବୁଲାନ୍ସ ଏବଂ ଅନ୍ୟ ଉଦ୍ଧାରକାରୀ ଦଳକୁ ହାଇ ଆଲର୍ଟରେ ରଖାଯାଇଥିଲା ।

ରନୱେ ଉପରେ କମ୍ ଉଚ୍ଚତାରେ ଉଡ଼ିଲା ବିମାନ

ସତର୍କତାମୂଳକ ପଦକ୍ଷେପ ସ୍ୱରୂପ ବିମାନଟିକୁ ରନୱେ ଉପରେ କମ୍ ଉଚ୍ଚତାରେ ଉଡ଼ାଯାଇଥିଲା । ଏହାଦ୍ୱାରା ଲ୍ୟାଣ୍ଡିଂ ଗିୟର୍‌ର ସ୍ଥିତି ଯାଞ୍ଚ କରାଯାଇଥିଲା । ଏହାପରେ ସକାଳ ୯ଟା ୦୪ ମିନିଟ୍‌ରେ ବିମାନଟି ପୁଣେ ବିମାନବନ୍ଦରରେ ସୁରକ୍ଷିତ ଭାବେ ଅବତରଣ କରିଥିଲା ।

ଅବତରଣ ପରେ ବିମାନରେ ଏରୋବ୍ରିଜ୍ ସଂଯୋଗ କରାଯାଇଥିଲା ଏବଂ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବାହାର କରାଯାଇଥିଲା । ପରେ ତିନୋଟି ଅଗ୍ନିଶମ ଗାଡ଼ି ଓ ଦୁଇଟି ଆମ୍ବୁଲାନ୍ସ ସହାୟତାରେ ବିମାନଟିକୁ 'ବେ ନମ୍ବର ୭'କୁ ନିଆଯାଇଥିଲା । ବିମାନ ସୁରକ୍ଷିତ ଥିବା ନିଶ୍ଚିତ ହେବା ପରେ ସକାଳ ୯ଟା ୧୦ ମିନିଟ୍‌ରେ ATC ପକ୍ଷରୁ ଫୁଲ୍ ଏମର୍ଜେନ୍ସି ପ୍ରତ୍ୟାହାର କରାଯାଇଥିଲା ।

ପୁଣେ ବିମାନବନ୍ଦର ପ୍ରଶାସନ କହିଛି ଯେ, ଏହି ସମ୍ପୂର୍ଣ୍ଣ ଅପରେସନ୍ ଭାରତୀୟ ବାୟୁସେନା, ATC, ଇଣ୍ଡିଗୋ ଏବଂ ଅନ୍ୟ ଜରୁରୀକାଳୀନ ଏଜେନ୍ସିଗୁଡ଼ିକର ସହଯୋଗରେ ସଫଳତାର ସହ ସମ୍ପନ୍ନ ହୋଇଛି। ଏହି ସମୟରେ ଯାତ୍ରୀ ଓ କ୍ରୁ ସଦସ୍ୟଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦିଆଯାଇଥିଲା । ଅନ୍ୟପକ୍ଷରେ, ଏହି ଘଟଣାକୁ ନେଇ ଇଣ୍ଡିଗୋ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ବୟାନ ଜାରି କରାଯାଇନାହିଁ ।