Meta AI Age Detection / ଇନଷ୍ଟାଗ୍ରାମରେ ଆଉ ବୟସ ଲୁଚାଇ ପାରିବେନି ନାବାଳକ, AI ଜରିଆରେ ହେବ ବୟସ ଯାଞ୍ଚ

ସୋସିଆଲ ମିଡିଆରେ ନାବାଳକଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦେଇ ବଡ଼ ପଦକ୍ଷେପ ନେଇଛି ମେଟା । ଏଣିକି ଇନଷ୍ଟାଗ୍ରାମରେ ନିଜର ପ୍ରକୃତ ବୟସ ଲୁଚାଇବା ସହଜ ହେବ ନାହିଁ । କାରଣ, କିଶୋର ଓ ନାବାଳକ ବ୍ୟବହାରକାରୀଙ୍କୁ ଚିହ୍ନଟ କରିବା ପାଇଁ ମେଟା AI ଆଧାରିତ ବୟସ ଆକଳନ ପ୍ରଯୁକ୍ତିକୁ ବିଶ୍ୱବ୍ୟାପୀ ସମ୍ପ୍ରସାରଣ କରିବାକୁ ଯୋଜନା କରିଛି ।

ଏହି ନୂତନ ପ୍ରଯୁକ୍ତି ଜରିଆରେ ୟୁଜର୍ସଙ୍କ ପ୍ରୋଫାଇଲ୍, ପୋଷ୍ଟ, କମେଣ୍ଟ ଓ ବାୟୋକୁ ବିଶ୍ଳେଷଣ କରାଯିବ । ଏହା ସହ ଫଟୋ ଓ ଭିଡିଓରେ ଥିବା ଭିଜୁଆଲ୍ ସଙ୍କେତକୁ ମଧ୍ୟ ଆଧାର କରି ବୟସ ଆକଳନ କରିବ AI । ଜନ୍ମଦିନ ପାଳନ ସମ୍ପର୍କିତ ପୋଷ୍ଟ ସହ ଅନ୍ୟାନ୍ୟ ସଙ୍କେତକୁ ମଧ୍ୟ ଯାଞ୍ଚ କରାଯିବ। ଫଳରେ ଜନ୍ମତାରିଖରେ ମିଥ୍ୟା ତଥ୍ୟ ଦେଇ ୧୮ ବର୍ଷରୁ ଅଧିକ ବୟସ ଦର୍ଶାଉଥିବା ନାବାଳକଙ୍କୁ ଚିହ୍ନଟ କରିବା ସହଜ ହେବ ।

ମେଟାର ଏହି ପଦକ୍ଷେପ ଅନୁସାରେ, ୧୩ରୁ ୧୭ ବର୍ଷ ବୟସର ବ୍ୟବହାରକାରୀଙ୍କୁ ସ୍ୱୟଂଚାଳିତ ଭାବେ ଇନଷ୍ଟାଗ୍ରାମର 'ଟିନ୍ ଆକାଉଣ୍ଟ' ବ୍ୟବସ୍ଥାରେ ରଖାଯିବ । ଏହି ଆକାଉଣ୍ଟରେ ରହିବ ଅଧିକ ସୁରକ୍ଷା ବ୍ୟବସ୍ଥା । ଅଜଣା ବ୍ୟକ୍ତିଙ୍କଠାରୁ ମେସେଜ୍ ଆସିବା ଉପରେ କଟକଣା ରହିବ । ଅଶ୍ଳୀଳ ଓ ଅପମାନଜନକ କମେଣ୍ଟକୁ ମଧ୍ୟ ସ୍ୱୟଂଚାଳିତ ଭାବେ ଲୁଚାଇ ରଖାଯିବ। ଏହା ସହ ଆକାଉଣ୍ଟଗୁଡ଼ିକ ଡିଫଲ୍ଟ ଭାବେ ପ୍ରାଇଭେଟ୍ ରହିବ ।

ଅନ୍ୟପକ୍ଷରେ, ୧୩ ବର୍ଷରୁ କମ୍ ପିଲାଙ୍କୁ ଇନଷ୍ଟାଗ୍ରାମରେ ଆକାଉଣ୍ଟ ଖୋଲିବାକୁ ଅନୁମତି ନାହିଁ । ବିଶ୍ୱର ବିଭିନ୍ନ ଦେଶରେ କିଶୋରଙ୍କ ସୋସିଆଲ ମିଡିଆ ବ୍ୟବହାରକୁ ନେଇ କଡ଼ା ନିୟମ ଲାଗୁ ହେଉଥିବା ବେଳେ ମେଟାର ଏହି ପଦକ୍ଷେପକୁ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି । ତେବେ ଇନଷ୍ଟାଗ୍ରାମ ପରେ ଆଗାମୀ ଦିନରେ ମେଟାର ଅନ୍ୟ ଏକ ସୋସିଆଲ ମିଡିଆ ପ୍ଲାଟଫର୍ମ 'ଥ୍ରେଡ୍ସ'ରେ ମଧ୍ୟ ଏଭଳି ବୟସ ଯାଞ୍ଚ ବ୍ୟବସ୍ଥା ଲାଗୁ ହେବାର ସମ୍ଭାବନା ରହିଛି ।