IPS Nupur Prasad / IPS ନୁପୁରଙ୍କୁ ମିଳିବ ରାଷ୍ଟ୍ରପତି ପଦକ; ସୁଶାନ୍ତ ସିଂ ରାଜପୁତଙ୍କ ମାମଲାର କରିଥିଲେ ଯାଞ୍ଚ

ନୂଆଦିଲ୍ଲୀ: ସ୍ଵାଧୀନତା ଦିବସ ୨୦୨୬ରେ ଦେଶ ସେବାରେ ଉତ୍କୃଷ୍ଟ ଯୋଗଦାନ ଦେଇଥିବା ପୋଲିସ କର୍ମଚାରୀଙ୍କୁ ସମ୍ମାନିତ କରାଯିବ । ଏମାନଙ୍କ ମଧ୍ୟରେ ଅଛନ୍ତି ବରିଷ୍ଠ ଆଇପିଏସ ଅଫିସର ନୁପୁର ପ୍ରସାଦ । ତାଙ୍କୁ 'ମେଡାଲ୍ ଫର୍ ମେରିଟେରିୟସ ସର୍ଭିସ' ପାଇଁ ସମ୍ମାନିତ କରାଯିବ । ୨୦୦୭ ବ୍ୟାଚ୍‌ର ଏହି ଆଇପିଏସ ଅଫିସର ଚର୍ଚ୍ଚିତ ହତ୍ୟାକାଣ୍ଡ ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ମାମଲାର ମଧ୍ୟ ଯାଞ୍ଚ କରିଥିଲେ । ସିବିଆଇରେ ନିଜ କାର୍ଯ୍ୟକାଳ ପୂରା କରିବା ପରେ ସେ ନିକଟରେ ଦିଲ୍ଲୀ ପୋଲିସରେ ସାମିଲ ହୋଇଛନ୍ତି । ବର୍ତ୍ତମାନ ସେ ଆର୍ଥିକ ଅପରାଧ ଶାଖା (EOW)ରେ ଯୁଗ୍ମ ପୋଲିସ କମିଶନର ଦାୟିତ୍ଵ ତୁଲାଉଛନ୍ତି ।

• ନୁପୁରଙ୍କୁ ରାଷ୍ଟ୍ରପତି ପଦକ

ରାଷ୍ଟ୍ରପତି ପଦକ ପୋଲିସ କର୍ମଚାରୀମାନଙ୍କୁ ସେମାନଙ୍କର ଉତ୍କୃଷ୍ଟ ତଦନ୍ତ ଦକ୍ଷତା, ଅପରାଧ ନିୟନ୍ତ୍ରଣ, ସାର୍ବଜନୀନ ସେବା, ଆଇନ ଶୃଙ୍ଖଳା ବଜାୟ ରଖିବା ଏବଂ ପ୍ରଶାସନିକ ଦକ୍ଷତା ପାଇଁ ପ୍ରଦାନ କରାଯାଏ । ନୁପୁରଙ୍କ କ୍ୟାରିୟର ସମୟରେ ସେ ଦିଲ୍ଲୀ ପୋଲିସ, ସିବିଆଇ, ଅରୁଣାଚଳ ପ୍ରଦେଶ ଏବଂ ପଶ୍ଚିମବଙ୍ଗରେ ଅନେକ ଜଟିଳ ମାମଲା ସମାଧାନ କରିଥିଲେ । ଅପରାଧ ନିୟନ୍ତ୍ରଣ ସହିତ ସେ ମହିଳାଙ୍କ ଆତ୍ମରକ୍ଷା, ଯୁବ ବିକାଶ, ସାଇବର ସୁରକ୍ଷା ଏବଂ ନିଶା ନିବାରଣ ସହିତ ଜଡ଼ିତ ସାମାଜିକ ଅଭିଯାନରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି ।

• ସୁଶାନ୍ତ ରାଜପୁତ ମାମଲାର ତଦନ୍ତ କରିଥିଲେ

ବଲିଉଡ ଅଭିନେତା ତଥା ଟେଲିଭିଜନର ଜଣେ ଲୋକପ୍ରିୟ କଳାକାର ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ମାମଲା ବେଶ ଆଲୋଚନାର ବିଷୟ ପାଲଟିଥିଲା । ଏହି ମାମଲାର ତଦନ୍ତ ସମୟରେ ନୁପୁର ପ୍ରସାଦ ମଧ୍ୟ ଖବରରେ ଥିଲେ । ଜୁନ ୨୦୨୦ରେ ମୁମ୍ବାଇରେ ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ଜାତୀୟ ସ୍ତରରେ ଆଲୋଚନାର ବିଷୟ ଥିଲା । ଅଗଷ୍ଟ ୨୦୨୦ରେ ଯେତେବେଳେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ତଦନ୍ତ ସିବିଆଇକୁ ହସ୍ତାନ୍ତର କରାଯାଇଥିଲା, ନୁପୁର ପ୍ରସାଦ ଏହି ହାଇ-ପ୍ରୋଫାଇଲ୍ ହତ୍ୟା ମାମଲାର ଦାୟିତ୍ୱ ନେଇଥିଲେ । ତାଙ୍କ ତତ୍ତ୍ୱାବଧାନରେ ସିବିଆଇର ସ୍ଵତନ୍ତର୍ ଟିମ ସାକ୍ଷୀଙ୍କ ବୟାନ, ଫୋରେନସିକ୍ ରିପୋର୍ଟ ଏବଂ ଡାକ୍ତରୀ ପ୍ରମାଣକୁ ସତର୍କତାର ସହିତ ଯାଞ୍ଚ କରିଥିଲା । ୨୦୨୫ରେ ସିବିଆଇ ଏହି ମାମଲାରେ ଏକ କ୍ଲୋଜର ରିପୋର୍ଟ ଦାଖଲ କରିଥିଲା, ଯାହା ସ୍ପଷ୍ଟ କରିଥିଲା ​​ଯେ ତଦନ୍ତରେ ଷଡ଼ଯନ୍ତ୍ର, ହତ୍ୟା କିମ୍ବା ଆତ୍ମହତ୍ୟା ପାଇଁ ପ୍ରୋତ୍ସାହନର କୌଣସି ପ୍ରମାଣ ମିଳିନାହିଁ ।

• ଶାହଦରାର ପ୍ରଥମ ମହିଳା ଡିସିପି

ସିବିଆଇରେ ନିଯୁକ୍ତି ପୂର୍ବରୁ ନୁପୁର ପ୍ରସାଦ ଦିଲ୍ଲୀ ପୋଲିସରେ ଅନେକ ଗୁରୁତ୍ୱପୂର୍ଣ୍ଣ ପଦବୀରେ ରହିଥିଲେ । ତାଙ୍କୁ ଦିଲ୍ଲୀର ନବଗଠିତ ଶାହଦରା ଜିଲ୍ଲାର ପ୍ରଥମ ମହିଳା ଡେପୁଟି କମିଶନର ଅଫ୍ ପୋଲିସ (DCP) ଭାବରେ ମଧ୍ୟ ନିଯୁକ୍ତି ଦିଆଯାଇଥିଲା । ସେ ସେଠାରେ ପୋଲିସ ଗଠନ ପାଇଁ ଏକ ଦୃଢ଼ ମୂଳଦୁଆ ସ୍ଥାପନ କରିଥିଲେ ଏବଂ ଡ୍ରଗ୍ସ ନେଟୱାର୍କ ଏବଂ ଅବୈଧ ଜୁଆ ବିରୁଦ୍ଧରେ କଠୋର ଅଭିଯାନ ଆରମ୍ଭ କରିଥିଲେ ।

ପଢନ୍ତୁ ଏହି ଖବର: ଲାଲକିଲ୍ଲାରେ ମୋଦିଙ୍କ ନୂଆ ଲୁକ୍; ବନ୍ଧେଜ୍ ପଗଡି ପଛରେ କଣ ରହିଛି ଦେଶକୁ ବାର୍ତ୍ତା ?

ଉତ୍ତର ଦିଲ୍ଲୀର DCP ଭାବରେ, ସେ ଲାଲକିଲ୍ଲାରେ ସ୍ୱାଧୀନତା ଦିବସ ପାଳନ ଏବଂ ଦିଲ୍ଲୀ ବିଶ୍ୱବିଦ୍ୟାଳୟ ନିର୍ବାଚନ ଭଳି ପ୍ରମୁଖ ସାର୍ବଜନୀନ କାର୍ଯ୍ୟକ୍ରମ ସମୟରେ ସୁରକ୍ଷା ବ୍ୟବସ୍ଥାକୁ ପ୍ରଭାବଶାଳୀ ଭାବରେ ପରିଚାଳନା କରିଥିଲେ । ସିବିଆଇରେ ତାଙ୍କ କାର୍ଯ୍ୟକାଳ ମଧ୍ୟରେ ସେ ସୁଶାନ୍ତ ସିଂହ ରାଜପୁତ ମାମଲା, ବ୍ୟବସାୟୀ ବିଜୟ ମାଲ୍ୟାଙ୍କ ସହ ଜଡ଼ିତ ଆର୍ଥିକ ମାମଲା ଏବଂ ଅଗସ୍ତା ୱେଷ୍ଟଲ୍ୟାଣ୍ଡ ହେଲିକପ୍ଟର ଚୁକ୍ତି ଭଳି ହାଇ-ପ୍ରୋଫାଇଲ୍ ତଦନ୍ତରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।