IPS Tripti Bhatt / କିଏ IPS ତୃପ୍ତି ଭଟ୍ଟ ? CBIରେ ମିଳିଲା ବଡ଼ ଦାୟିତ୍ଵ

ନୂଆଦିଲ୍ଲୀ: ନିଜ ଲକ୍ଷ୍ୟ ପ୍ରତି ଦୃଢ଼ ନିଷ୍ଠା ଓ ଅଦମ୍ୟ ଇଚ୍ଛାଶକ୍ତି ହିଁ ସଫଳତାର ମୂଳମନ୍ତ୍ର । ଏହାକୁ ପୁଣିଥରେ ପ୍ରମାଣିତ କରିଛନ୍ତି ଆଇପିଏସ୍ ଅଧିକାରୀ ତୃପ୍ତି ଭଟ୍ଟ । ଇସ୍ରୋ ସମେତ ବିଭିନ୍ନ ସରକାରୀ ସଂସ୍ଥାରେ ଚାକିରି କରିବାର ସୁଯୋଗ ମିଳିଥିଲେ ମଧ୍ୟ ସେ ନିଜ ସ୍ୱପ୍ନକୁ ପ୍ରାଥମିକତା ଦେଇଥିଲେ । ୧୬ଟି ସରକାରୀ ଚାକିରିର ସୁଯୋଗକୁ ପଛରେ ପକାଇ UPSC ସିଭିଲ୍ ସର୍ଭିସ୍ ପରୀକ୍ଷାରେ ସଫଳ ହୋଇଥିବା ଏହି ଅଧିକାରୀଙ୍କୁ ଏବେ କେନ୍ଦ୍ରୀୟ ତଦନ୍ତ ବ୍ୟୁରୋ (CBI)ରେ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଛି । ତାଙ୍କୁ CBIର ପୋଲିସ ସୁପରିଣ୍ଟେଣ୍ଡେଣ୍ଟ (SP) ଭାବେ ଡେପୁଟେସନରେ ନିଯୁକ୍ତ କରାଯିବ।

• ୫ବର୍ଷ ପର୍ଯ୍ୟନ୍ତ CBIରେ ଦାୟିତ୍ୱ ତୁଲାଇବେ

ତୃପ୍ତି ଭଟ୍ଟ ଉତ୍ତରାଖଣ୍ଡ କ୍ୟାଡରର ୨୦୧୩ ବ୍ୟାଚ୍‌ର ଆଇପିଏସ୍ ଅଧିକାରୀ । କେନ୍ଦ୍ର ଗୃହ ମନ୍ତ୍ରଣାଳୟ ଏ ସମ୍ପର୍କରେ ଉତ୍ତରାଖଣ୍ଡ ସରକାରଙ୍କୁ ଚିଠି ଲେଖି ସୂଚନା ଦେଇଛି । ଡେପୁଟେସନ୍ ଆଧାରରେ ତାଙ୍କୁ CBIରେ ନିଯୁକ୍ତ କରାଯିବାକୁ ଥିବାବେଳେ ଏହି ଅବଧି ଦାୟିତ୍ୱ ଗ୍ରହଣ କରିବା ଦିନଠାରୁ ପାଞ୍ଚ ବର୍ଷ କିମ୍ବା ପରବର୍ତ୍ତୀ ନିର୍ଦ୍ଦେଶ ଜାରି ହେବା ପର୍ଯ୍ୟନ୍ତ ରହିବ । ଏଥିମଧ୍ୟରୁ ଯେଉଁଟି ପ୍ରଥମେ ଘଟିବ, ତାହା ଅନୁଯାୟୀ ତାଙ୍କ କାର୍ଯ୍ୟକାଳ ନିର୍ଦ୍ଧାରଣ ହେବ । ନିର୍ଦ୍ଦେଶ ଅନୁସାରେ, ଚିଠି ଜାରି ହେବାର ତିନି ସପ୍ତାହ ମଧ୍ୟରେ ତାଙ୍କୁ ବର୍ତ୍ତମାନର ଦାୟିତ୍ୱରୁ ମୁକ୍ତ କରିବାକୁ ଉତ୍ତରାଖଣ୍ଡ ସରକାରଙ୍କୁ କୁହାଯାଇଛି । ଏହାପରେ ସେ ଦେଶର ପ୍ରମୁଖ ତଦନ୍ତକାରୀ ସଂସ୍ଥା CBIରେ ନୂଆ ଦାୟିତ୍ୱ ସମ୍ଭାଳିବେ । ଏହି ନିଯୁକ୍ତି ତାଙ୍କ ପେସାଦାର ଜୀବନରେ ଆଉ ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟ ଯୋଡ଼ିବ।

• ଇଞ୍ଜିନିୟରିଂରୁ IPS ଯାତ୍ରା

୧୯୮୯ ଡିସେମ୍ବର ୬ ତାରିଖରେ ଜନ୍ମଗ୍ରହଣ କରିଥିବା ତୃପ୍ତି ଭଟ୍ଟ ଉତ୍ତରାଖଣ୍ଡର ଆଲମୋଡ଼ା ଜିଲ୍ଲାର ବାସିନ୍ଦା । ସେ ପନ୍ତନଗରସ୍ଥିତ ଗୋବିନ୍ଦ ବଲ୍ଲଭ ପନ୍ତ କୃଷି ଓ ପ୍ରଯୁକ୍ତି ବିଶ୍ୱବିଦ୍ୟାଳୟରୁ ମେକାନିକାଲ୍ ଇଞ୍ଜିନିୟରିଂରେ ବି.ଟେକ୍ ଡିଗ୍ରି ହାସଲ କରିଥିଲେ । ପାଠପଢ଼ା ଶେଷ ହେବା ପରେ ସେ ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷା ଦେଇଥିଲେ । ଏହି ସମୟରେ ତାଙ୍କୁ NTPCରେ ଆସିଷ୍ଟାଣ୍ଟ ମ୍ୟାନେଜର ସମେତ ଅନେକ ସରକାରୀ ପଦରେ ନିଯୁକ୍ତି ସୁଯୋଗ ମିଳିଥିବା ବିଭିନ୍ନ ଗଣମାଧ୍ୟମ ରିପୋର୍ଟରେ ଉଲ୍ଲେଖ ରହିଛି । ISRO ଭଳି ପ୍ରତିଷ୍ଠିତ ସଂସ୍ଥାରୁ ମଧ୍ୟ ତାଙ୍କୁ ସୁଯୋଗ ମିଳିଥିଲା । ହେଲେ ତାଙ୍କ ଲକ୍ଷ୍ୟ ଥିଲା ଭାରତୀୟ ପ୍ରଶାସନିକ ଓ ପୋଲିସ ସେବାରେ ଯୋଗଦେବା । ତେଣୁ ଅନ୍ୟ ଚାକିରିର ଆକର୍ଷଣକୁ ପଛରେ ପକାଇ ସେ UPSC ପ୍ରସ୍ତୁତି ଜାରି ରଖିଥିଲେ।

• UPSCରେ ୧୬୫ତମ ରାଙ୍କ୍

ତୃପ୍ତି ଭଟ୍ଟ ୨୦୧୨ ମସିହାର UPSC ସିଭିଲ୍ ସର୍ଭିସ୍ ପରୀକ୍ଷାରେ ସର୍ବଭାରତୀୟ ସ୍ତରରେ ୧୬୫ତମ ରାଙ୍କ୍ ହାସଲ କରିଥିଲେ । ଏହି ସଫଳତା ସହ ସେ ଉତ୍ତରାଖଣ୍ଡ କ୍ୟାଡରର ଆଇପିଏସ୍ ଅଧିକାରୀ ହୋଇଥିଲେ । ତାଙ୍କର ଏହି ଯାତ୍ରା ଦର୍ଶାଏ ଯେ ଏକ ସ୍ପଷ୍ଟ ଲକ୍ଷ୍ୟ ରଖି ନିରନ୍ତର ପରିଶ୍ରମ କଲେ କଠିନ ପରୀକ୍ଷାରେ ମଧ୍ୟ ସଫଳତା ମିଳିପାରେ । ଆଇପିଏସ୍ ଭାବେ ଯୋଗଦେବା ପରେ ତୃପ୍ତି ଭଟ୍ଟ ଉତ୍ତରାଖଣ୍ଡରେ ବିଭିନ୍ନ ପଦରେ କାର୍ଯ୍ୟ କରିଛନ୍ତି । ଗୃହ ଓ କାରାଗାର ବିଭାଗରେ ଅତିରିକ୍ତ ସଚିବ ଏବଂ ଅଗ୍ନିଶମ ସେବାରେ ପୋଲିସ ସୁପରିଣ୍ଟେଣ୍ଡେଣ୍ଟ ଭାବେ ସେ ଦାୟିତ୍ୱ ତୁଲାଇଛନ୍ତି ।

ପଢନ୍ତୁ ଏହି ଖବର: ଚାକିରି ସରିବା ପରେ ବି ପାଠପଢା ନିଶା; ପାଖରେ ସବୁ ଅଛି, ତଥାପି ପିଜି କରିବେ ଇଞ୍ଜିନିୟର ବାବୁ

ଏବେ CBIରେ ଏସ୍‌ପି ଭାବେ ନୂଆ ଦାୟିତ୍ୱ ଗ୍ରହଣ କରିବାକୁ ଯାଉଥିବା ତୃପ୍ତି ଭଟ୍ଟଙ୍କ ପରବର୍ତ୍ତୀ କାର୍ଯ୍ୟକାଳ ଉପରେ ନଜର ରହିବ । ୧୬ଟି ଚାକିରିର ସୁଯୋଗ ଛାଡ଼ି ନିଜ ସ୍ୱପ୍ନ ପୂରଣ କରିଥିବା ଏହି ଅଧିକାରୀଙ୍କ କାହାଣୀ ଆଜି ଅନେକ ଯୁବପିଢ଼ିଙ୍କ ପାଇଁ ପ୍ରେରଣାର ଉତ୍ସ ।