Argus News - ହର୍ମୁଜରେ ଭାରତୀୟ ଟ୍ୟାଙ୍କରକୁ ଇରାନର ଗୁଳିମାଡ଼, ତଥାପି ସୁରକ୍ଷିତ ଆସିଲା 'ଦେଶ ଗରିମା'

ପୁଣି ଥରେ ହର୍ମୁଜ ପ୍ରଣାଳୀ ବନ୍ଦ କରିଛି ଇରାନ । ଏହା ସତ୍ତ୍ବେ ଏକ ଭାରତୀୟ ପତାକାଯୁକ୍ତ ତୈଳ ଟ୍ୟାଙ୍କର ସଫଳତାର ସହ ହର୍ମୁଜ ପ୍ରଣାଳୀ ଦେଇ ଆସିଥିଲା । ଯେତେବେଳେ କି ଅନ୍ୟ ୪ଟି ଜାହାଜ ହର୍ମୁଜ ପାର କରିନପାରି ଫେରି ଯାଇଥିଲା । ଜାହାଜ ମନିଟରିଂ ତଥ୍ୟ ଅନୁଯାୟୀ, "ଦେଶ ଗାରିମା" ନାମକ ତୈଳ ଟ୍ୟାଙ୍କର୍ ଶନିବାର (୧୮ ଏପ୍ରିଲ୍, ୨୦୨୬) ଦିନ ହର୍ମୁଜ ପ୍ରଣାଳୀ ଦେଇ ଆସିଥିଲା ।

ସିପିଂ କର୍ପୋରେସନ୍ ଅଫ୍ ଇଣ୍ଡିଆ ଲିମିଟେଡ୍ (SCI) ମାଲିକାନା ଥିବା ଏହି ଟ୍ୟାଙ୍କର୍ ହେଉଛି ମାର୍ଚ୍ଚ ଆରମ୍ଭରୁ ଷ୍ଟ୍ରେଟ୍ ଦେଇ ଆସିଥିବା ଦଶମ ଭାରତୀୟ ପତାକାଯୁକ୍ତ ଜାହାଜ । ମାରିନ୍ ଟ୍ରାଫିକ୍ ଅନୁଯାୟୀ, ଶନିବାର ସନ୍ଧ୍ୟା ସୁଦ୍ଧା ଟ୍ୟାଙ୍କରଟି ଓମାନ ଉପସାଗର ଦେଇ ଯାତ୍ରା କରୁଥିଲା । ତଥ୍ୟ ଏହା ମଧ୍ୟ ଦର୍ଶାଇଛି ଯେ ଇରାନ ଗୁଳିମାଡ଼ ପରେ ତେଲ ଟ୍ୟାଙ୍କର୍ "ସାନମାର ହେରାଲ୍ଡ, ଦେଶ ବୈଭବ, ଦେଶ ବିଭୋର, ଏବଂ ମାଲବାହୀ ଜାହାଜ "ଜଗ୍ ଅର୍ଣ୍ଣଭ" ନିଜର ରାସ୍ତା ବଦଳାଇଥିଲା ।

ୟୁନାଇଟେଡ୍ କିଙ୍ଗଡମ୍ ମେରିଟାଇମ୍ ଟ୍ରେଡ୍ ଅପରେସନ୍ସ ଅନୁଯାୟୀ, ଏକ ଟ୍ୟାଙ୍କର୍ ରିପୋର୍ଟ କରିଛି ଯେ ଓମାନର ଉତ୍ତର-ପୂର୍ବରେ ପ୍ରାୟ ୨୦ ନଟିକାଲ୍ ମାଇଲ୍ ଦୂରରେ ଦୁଇଟି ଇରାନୀ ରିଭୋଲ୍ୟୁସନାରୀ ଗାର୍ଡ କର୍ପସ୍ ଜାହାଜ ଉପରେ ଗୁଳି ଚଳାଇଛି । ଏହା ଭାରତୀୟ ଜାହାଜଗୁଡ଼ିକର ଗତିପଥ ପରିବର୍ତ୍ତନ କରିବାର କାରଣ ବୋଲି କୁହାଯାଇଛି । tankertrackers.com ଅନୁଯାୟୀ, ଗୁଳିକାଣ୍ଡ ପରେ ଇରାକୀ ଅଶୋଧିତ ତୈଳ ବହନ କରୁଥିବା ଏକ ସୁପରଟ୍ୟାଙ୍କର୍ ସମେତ ଦୁଇଟି ଭାରତୀୟ ପତାକା ଜାହାଜ ଫେରିବାକୁ ବାଧ୍ୟ ହୋଇଥିଲା ।

ଭାରତ ଇରାନୀ ରାଷ୍ଟ୍ରଦୂତଙ୍କୁ ସମନ୍ କରିଛି

ସେପଟେ ହର୍ମୁଜ ପ୍ରଣାଳୀରେ ଭାରତୀୟ ଜାହାଜ ଉପରେ ଆକ୍ରମଣକୁ ନେଇ ଭାରତ ସରକାରଙ୍କ କଡ଼ା ପଦକ୍ଷେପ । ଦିଲ୍ଲୀରେ ଇରାନ ରାଷ୍ଟ୍ରଦୂତଙ୍କୁ ରିପୋର୍ଟ ତଲବ କରିଛି ବୈଦେଶିକ ମନ୍ତ୍ରଣାଳୟ । ଇରାନର ରିଭୋଲ୍ୟୁସନାରୀ ଗାର୍ଡ ବା IRGC ନିଜେ ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି । ହର୍ମୁଜ ପ୍ରଣାଳୀରେ ଭାରତୀୟ ତୈଳ ଟ୍ୟାଙ୍କର Sanmar Herald ଉପରେ ହୋଇଛି ବଡ଼ ଧରଣର ଆକ୍ରମଣ । ଜାହାଜଟିର ସାମାନ୍ୟ କ୍ଷୟକ୍ଷତି ହୋଇଥିଲେ ହିଁ ସୌଭାଗ୍ୟବଶତଃ ସେଥିରେ ଥିବା ସମସ୍ତ କର୍ମଚାରୀ ସୁରକ୍ଷିତ ଅଛନ୍ତି ଏବଂ କୌଣସି ପ୍ରାଣହାନି ଘଟିନାହିଁ । ଘଟଣା ପରେ ଭାରତ ସରକାର କଠୋର ଆଭିମୁଖ୍ୟ ଗ୍ରହଣ କରିଛନ୍ତି । ବୈଦେଶିକ ମନ୍ତ୍ରଣାଳୟ ପକ୍ଷରୁ ଇରାନର ରାଷ୍ଟ୍ରଦୂତଙ୍କୁ ସମନ କରାଯାଇଛି । ଭାରତ ନିଜର ଦୃଢ଼ ଆପତ୍ତି ଜଣାଇବା ସହ ନାବିକମାନଙ୍କ ସୁରକ୍ଷା ପାଇଁ ଦାବି କରିଛି । ଭାରତୀୟ ନୌସେନା ମଧ୍ୟ ଏହି ଅଞ୍ଚଳରେ ନିଜର ଗତିବିଧି ବଢ଼ାଇ ଦେଇଛି ।