Iran President India Visit / ଭାରତ ଆସିବେ ଇରାନ ରାଷ୍ଟ୍ରପତି, BRICS ସମ୍ମିଳନୀରେ ମୋଦିଙ୍କ ସହ ହେବ ବଡ଼ ଆଲୋଚନା

ମିଡିଲ୍‌ ଇଷ୍ଟରେ ଜାରି ରହିଥିବା ବିବାଦ ମଧ୍ୟରେ ଭାରତ ଗସ୍ତରେ ଆସୁଛନ୍ତି ଇରାନ ରାଷ୍ଟ୍ରପତି ମସୁଦ ପେଜେଶକିଆନ । ଆସନ୍ତା ସେପ୍ଟେମ୍ବର ୧୨ ଓ ୧୩ ତାରିଖରେ ନୂଆଦିଲ୍ଲୀରେ ହେବାକୁ ଥିବା BRICS ଶିଖର ସମ୍ମିଳନୀରେ ସେ ସାମିଲ ହେବେ । ଇରାନ ପକ୍ଷରୁ ଶୁକ୍ରବାର ତାଙ୍କ ଭାରତ ଗସ୍ତକୁ ନିଶ୍ଚିତ କରାଯାଇଛି । ଚଳିତ ବର୍ଷ BRICSର ଅଧ୍ୟକ୍ଷତା ଭାରତ କରୁଥିବାରୁ ଏହି ଗସ୍ତକୁ ବିଶେଷ ଗୁରୁତ୍ୱ ଦିଆଯାଉଛି ।

ପେଜେଶକିଆନଙ୍କ ଏହି ଗସ୍ତ କେବଳ BRICS ବୈଠକରେ ଯୋଗଦାନରେ ସୀମିତ ରହିବ ନାହିଁ । ଭାରତ ଓ ଇରାନ ମଧ୍ୟରେ ଦ୍ୱିପାକ୍ଷିକ ସମ୍ପର୍କ, ବାଣିଜ୍ୟ, ଚାବହାର ବନ୍ଦର ଏବଂ ପଶ୍ଚିମ ଏସିଆର ସାମ୍ପ୍ରତିକ ପରିସ୍ଥିତି ନେଇ ମଧ୍ୟ ଆଲୋଚନା ହେବାର ସମ୍ଭାବନା ରହିଛି ।

୨୦୨୪ରେ ଇରାନ BRICSର ପୂର୍ଣ୍ଣ ସଦସ୍ୟ ହୋଇଥିଲା । ଏହାପରେ ତେହରାନ BRICS ମଞ୍ଚ ମାଧ୍ୟମରେ ଆର୍ଥିକ ଓ ରାଜନୈତିକ ସହଯୋଗ ବଢ଼ାଇବା ଉପରେ ଗୁରୁତ୍ୱ ଦେଇଆସୁଛି। ଗତ ଜୁନ୍‌ରେ ଇରାନର ବିଦେଶ ମନ୍ତ୍ରୀ ଅବ୍ବାସ ଆରାଘଚି ମଧ୍ୟ BRICS ବିଦେଶ ମନ୍ତ୍ରୀସ୍ତରୀୟ ବୈଠକରେ ଯୋଗଦେବା ପାଇଁ ଭାରତ ଆସିଥିଲେ । ସେତେବେଳେ ସେ କହିଥିଲେ ଯେ ପଶ୍ଚିମ ଏସିଆରେ ଜାରି ରହିଥିବା ବିବାଦ କମାଇବାରେ ଭାରତ ଏକ ବଡ଼ ଭୂମିକା ନେଇପାରେ ଏବଂ ଇରାନ ଭାରତର ଯେକୌଣସି ଗଠନମୂଳକ ପଦକ୍ଷେପକୁ ସ୍ୱାଗତ କରିବ ।

ପେଜେଶକିଆନ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ପୂର୍ବରୁ ମଧ୍ୟ ଆଲୋଚନା ହୋଇଛି । ୨୦୨୪ ଅକ୍ଟୋବରରେ ରୁଷିଆର କାଜାନରେ ଆୟୋଜିତ BRICS ସମ୍ମିଳନୀ ସମୟରେ ଦୁଇ ନେତା ସାକ୍ଷାତ କରିଥିଲେ। ସେହି ସମୟରେ ଦ୍ୱିପାକ୍ଷିକ ସମ୍ପର୍କ ସହ ପଶ୍ଚିମ ଏସିଆର ପରିସ୍ଥିତି ଉପରେ ଆଲୋଚନା ହୋଇଥିଲା ।
ଏହାରି ମଧ୍ୟରେ ଗତ କିଛି ମାସରେ ଭାରତ ଓ ଇରାନ ମଧ୍ୟରେ କୂଟନୈତିକ ଯୋଗାଯୋଗ ଆହୁରି ବଢ଼ିଛି । ଜୁଲାଇରେ ପ୍ରଧାନମନ୍ତ୍ରୀ ମୋଦି ଓ ରାଷ୍ଟ୍ରପତି ପେଜେଶକିଆନଙ୍କ ମଧ୍ୟରେ ଫୋନ୍‌ରେ ଆଲୋଚନା ହୋଇଥିଲା । ପଶ୍ଚିମ ଏସିଆର ସ୍ଥିତି, ଅଞ୍ଚଳୀୟ ଶାନ୍ତି ଏବଂ ହର୍ମୁଜ୍‌ ଷ୍ଟ୍ରେଟ୍‌ରେ ଯାତାୟାତ ଓ ବାଣିଜ୍ୟର ସ୍ୱାଧୀନତା ନେଇ ଦୁଇ ନେତା ଆଲୋଚନା କରିଥିଲେ ।

ତେଣୁ ପେଜେଶକିଆନଙ୍କ ଆଗାମୀ ଭାରତ ଗସ୍ତକୁ ଦୁଇ ଦେଶର ସମ୍ପର୍କ ଦୃଷ୍ଟିରୁ ଏକ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି । BRICS ମଞ୍ଚରେ ଭାରତ ଓ ଇରାନର ସହଯୋଗ ସହିତ ପଶ୍ଚିମ ଏସିଆରେ ଶାନ୍ତି ଓ ସ୍ଥିରତା ପାଇଁ ଦୁଇ ଦେଶ କେଉଁ ଦିଗରେ ଆଗକୁ ବଢ଼ିବେ, ତାହା ଉପରେ ରହିଛି ସମସ୍ତଙ୍କ ନଜର ।