ନୂଆଦିଲ୍ଲୀ: CMS-03 ସାଟେଲାଇଟ ଲଞ୍ଚ ପାଇଁ ପ୍ରସ୍ତୁତ ଶ୍ରୀହରିକୋଟା ସ୍ଥିତ ସତୀଶ ଧୱନ ସ୍ପେଶ ଷ୍ଟେସନ । ଆସନ୍ତାକାଲି ଇସ୍ରୋର ସବୁଠାରୁ ଭାରୀ ସାଟେଲାଇଟ୍ ଲଞ୍ଚ ହେବ । ରବିବାର ଅପରାହ୍ଣ ୫ଟା ୨୬ ମିନିଟରେ ଇସ୍ରୋର ଶକ୍ତିଶାଳୀ LMV3-M5 ରକେଟରୁ ଉତକ୍ଷେପଣ କରାଯିବ ।

ଏହା ଦ୍ଵାରା ଦେଶରେ ଡିଜିଟାଲ୍ ଯୋଗାଯୋଗ, ଇଣ୍ଟରନେଟ୍ ଏବଂ ସାମୁଦ୍ରିକ ସଂଯୋଗ ସୁଦୃଢ଼ ହେବ । ଭାରତୀୟ ମହାକାଶ ଗବେଷଣା ସଂସ୍ଥା ଇସ୍ରୋ ରବିବାର ଏହାର ୪ ହଜାର ୪୧୦ କିଲୋଗ୍ରାମ ଓଜନର ଉପଗ୍ରହ CMS-03 ଉତକ୍ଷେପଣ କରିବ । ଏହି ଉପଗ୍ରହ ଭାରତରୁ ଉତକ୍ଷେପଣ କରାଯାଇଥିବା ସବୁଠାରୁ ଭାରୀ ଉପଗ୍ରହ ।

ଏଥିସହ ପଢ଼ନ୍ତୁ: ଅଗ୍ନି ନିରାପତ୍ତା ବ୍ୟବସ୍ଥା ନ ଥାଇ ଚାଲିଛି ଏକାଧିକ ଅନୁଷ୍ଠାନ; ଚିଠି ଲେଖି କାହିଁକି ଚୁପ୍ ଅଗ୍ନିଶମ ବିଭାଗ ?

ଏହାକୁ ଇସ୍ରୋର ଶକ୍ତିଶାଳୀ ରକେଟ୍, LVM3-M5 ଦ୍ୱାରା ପୃଥିବୀର ଜିଓସିଙ୍କ୍ରୋନାସ୍ ଟ୍ରାନ୍ସଫର କକ୍ଷପଥରେ ଅବସ୍ଥାପିତ କରାଯିବ । CMS-03 ଯୋଗାଯୋଗ ଉପଗ୍ରହ ଭାରତର ଉଚ୍ଚ-କ୍ଷମତା ବିଶିଷ୍ଟ ମହାକାଶ ଯୋଗାଯୋଗକୁ ଏକ ନୂତନ ଦିଗ ପ୍ରଦାନ କରିବ । ବଡ଼ ଅଭିଯାନ ପୂର୍ବରୁ ଇସ୍ରୋ ପରମ୍ପରା ରକ୍ଷା କରି ମନ୍ଦିର ଯାଇ ଶୁଭକାମନା କରିଛନ୍ତି ଇସ୍ରୋ ଅଧ୍ୟକ୍ଷ ଭି ନାରାୟଣନ ।

CMS-03 ଉପଗ୍ରହ କ'ଣ ?

ISRO ଅଧ୍ୟକ୍ଷଙ୍କ ସୂଚନା ଅନୁସାରେ ନୂତନ ଉପଗ୍ରହ GSAT-7R ବା CMS-03 ହେଉଛି ଏକ ମଲ୍ଟି-ବ୍ୟାଣ୍ଡ ଯୋଗାଯୋଗ ଉପଗ୍ରହ । ଯାହା ଭାରତୀୟ ସ୍ଥଳଭାଗ ସହିତ ବିଶାଳ ସମୁଦ୍ର ଅଞ୍ଚଳରେ ସେବା ପ୍ରଦାନ କରିବ । ଏହାକୁ ଅତ୍ୟନ୍ତ ଉନ୍ନତ ଉପକରଣ ଏବଂ ଏକ ଉଚ୍ଚ-ପ୍ରଯୁକ୍ତିବିଦ୍ୟା ପେଲୋଡ୍ ସହିତ ସଜ୍ଜିତ କରାଯାଇଛି ।

ଏହା ଯୁଦ୍ଧଜାହାଜ, ବୁଡ଼ାଜାହାଜ ଏବଂ ନୌସେନା ବିମାନ ମଧ୍ୟରେ ଭଏସ୍, ଭିଡିଓ ଏବଂ ତଥ୍ୟ ପ୍ରସାରଣ ପାଇଁ UHS, S, C ଏବଂ Ku ବ୍ୟାଣ୍ଡ ଭଳି ଅନେକ ଫ୍ରିକ୍ଵେନ୍ସିର ବ୍ୟବହାର କରିବ । ଏହି ଉପଗ୍ରହର ଉନ୍ନତ କଭରେଜ୍ ଭାରତର ନେଟୱର୍କ-କେନ୍ଦ୍ରିକ ଯୁଦ୍ଧ କ୍ଷମତାକୁ ବହୁଗୁଣିତ କରିବା ସହ ନୌସେନାକୁ ଗୁରୁତ୍ବପୂର୍ଣ୍ଣ ସାମୁଦ୍ରିକ କ୍ଷେତ୍ରରେ ଅଧିକ ଦକ୍ଷତାର ସହିତ କାର୍ଯ୍ୟ କରିବାକୁ ସକ୍ଷମ କରିବ । CMS-03 ଏକ ବିଶାଳ ସାମୁଦ୍ରିକ-ସ୍ଥଳ ଅଞ୍ଚଳରେ ନୌସେନା ଅଭିଯାନ, ବାୟୁ ପ୍ରତିରକ୍ଷା ଏବଂ କମାଣ୍ଡ ନିୟନ୍ତ୍ରଣ ପାଇଁ ପ୍ରକୃତ-ସମୟ ଯୋଗାଯୋଗ ପ୍ରଦାନ କରିବ ।

ଏଥିସହ ପଢ଼ନ୍ତୁ: ବାଲିଯାତ୍ରାରେ ପରିବେଶ ସୁରକ୍ଷାକୁ ଗୁରୁତ୍ଵ, ଏକକ ବ୍ୟବହୃତ ପ୍ଲାଷ୍ଟିକ ଉପରେ କଟକଣା

ଦୂରଦୂରାନ୍ତକୁ ପହଞ୍ଚିବ ହାଇସ୍ପିଡ୍‌ କନେକ୍ଟିଭିଟି । CMS-03 ଉପଗ୍ରହ କାର୍ଯ୍ୟକ୍ଷମ ହେବା ପରେ ରଣନୈତିକ ଓ ସାମୁଦ୍ରିକ ବ୍ୟବହାରକାରୀ ସମସ୍ତେ ଉନ୍ନତ ଯୋଗାଯୋଗ ସେବାରୁ ଉପକୃତ ହେବେ । ଭାରତର ଡିଜିଟାଲ ପହଞ୍ଚକୁ ବିସ୍ତାର କରିବାରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିବ CMS-03 ସାଟେଲାଇଟ ।