Terrorist Wanted Posters / ହାଇ ଆଲର୍ଟରେ ଜମ୍ମୁ କାଶ୍ମୀର; ଲାଲଚୌକରେ ଲାଗିଲା ମୋଷ୍ଟ ୱାଣ୍ଟେଡ୍ ଆତଙ୍କବାଦୀଙ୍କ ପୋଷ୍ଟର

ଶ୍ରୀନଗର: ଜମ୍ମୁ-କାଶ୍ମୀରରେ ଆତଙ୍କବାଦୀଙ୍କ ଉପସ୍ଥିତିକୁ ନେଇ ବଢ଼ିଲା ଚିନ୍ତା । ଉପତ୍ୟକାରେ ମାତ୍ର ଜଣେ ସ୍ଥାନୀୟ ଆତଙ୍କୀ ସକ୍ରିୟ ଥିବା ପୋଲିସର ଦାବିର ୪୮ ଘଣ୍ଟା ନପୂରୁଣୁ ସାମ୍ନାକୁ ଆସିଲା ୪ ଜଣ ଆତଙ୍କବାଦୀଙ୍କ ୱାଣ୍ଟେଡ୍ ପୋଷ୍ଟର । ଏହାକୁ ନେଇ ସୁରକ୍ଷା ଏଜେନ୍ସିଙ୍କ ମଧ୍ୟରେ ହଇଚଇ ସୃଷ୍ଟି ହୋଇଛି । ଶ୍ରୀନଗର ସମେତ କାଶ୍ମୀର ଉପତ୍ୟକାର ବିଭିନ୍ନ ସ୍ଥାନରେ ସୁରକ୍ଷା ବ୍ୟବସ୍ଥା ବର୍ତ୍ତମାନ କଡ଼ାକଡ଼ି କରାଯାଇଛି ।

• ଲାଲ୍ ଚୌକରେ ଲାଗିଲା ଆତଙ୍କୀଙ୍କ ପୋଷ୍ଟର

ନଭେମ୍ବର ୮ ତାରିଖରେ ଶ୍ରୀନଗରର ଜନଗହଳିପୂର୍ଣ୍ଣ ଲାଲ୍ ଚୌକ ନିକଟସ୍ଥ ପ୍ରତାପ ପାର୍କରେ ୪ ଜଣ ଆତଙ୍କବାଦୀଙ୍କ ଫଟୋ ଥିବା ବଡ଼ ବଡ଼ ଫ୍ଲେକ୍ସ ପୋଷ୍ଟର ଲଗାଯାଇଥିଲା । ଏଥିରେ ସେମାନଙ୍କ ନାମ ଓ ପରିଚୟ ସହ ସେମାନଙ୍କ ସମ୍ପର୍କରେ ସୂଚନା ଦେବାକୁ ସାଧାରଣ ଲୋକଙ୍କୁ ଅପିଲ୍ କରାଯାଇଛି । ପୋଷ୍ଟରରେ ଥିବା ନାମ ଅନୁସାରେ, ସେମାନେ ହେଲେ ସୋପୋରର ବ୍ରାଥ କଲାଁ ଅଞ୍ଚଳର ବିଲାଲ ଅହମ୍ମଦ ମୀର ଓ ମହମ୍ମଦ ଉମର ମୀର, ବାରାମୁଲାର ପଟ୍ଟନ ଅଞ୍ଚଳର ଆବିଦ କୟୁମ ଲୋନ ଏବଂ କୁଲଗାମର ଖ୍ରେୱାନ ଚଦର ଅଞ୍ଚଳର ମହମ୍ମଦ ଲତିଫ ଭଟ୍ଟ ।

• ପୋଲିସର ଦାବିକୁ ନେଇ ପ୍ରଶ୍ନ

କାଶ୍ମୀର ରେଞ୍ଜର ଆଇଜିପି ସୁଜିତ କୁମାର କିଛି ଦିନ ପୂର୍ବରୁ ଉପତ୍ୟକାରେ କେବଳ ଜଣେ ସ୍ଥାନୀୟ ଆତଙ୍କବାଦୀ ସକ୍ରିୟ ଥିବା କହିଥିଲେ । ଏହି ଆତଙ୍କୀ ହେଉଛି ଲତିଫ ଭଟ୍ଟ । ଅନ୍ୟ ତିନି ଜଣ ପାକିସ୍ତାନ ଅଧିକୃତ କାଶ୍ମୀରରେ ଥିବା ଆକଳନ କରାଯାଉଥିଲା । ସେପଟେ ଲତିଫ ଭଟ୍ଟ ଉପରେ ଚଳିତ ବର୍ଷ ଜୁଲାଇରେ ଅନନ୍ତନାଗରେ ଜଣେ ପୋଲିସ କର୍ମଚାରୀଙ୍କୁ ଟାର୍ଗେଟ୍ କରି ହତ୍ୟା କରିବା ଅଭିଯୋଗ ରହିଛି ।

ପଢନ୍ତୁ ଏହି ଖବର: ଦୁର୍ଦ୍ଦାନ୍ତ ଆତଙ୍କବାଦୀ ମହମ୍ମଦ ହସନ ଗିରଫ, ରାପିଡୋ ଚଲାଉଥିଲେ ଓ ଅତର ବିକ୍ରି କରୁଥିଲେ

ଚାରି ଜଣଙ୍କ ସମ୍ପର୍କରେ ଭରସାଯୋଗ୍ୟ ଏବଂ ଠୋସ୍ ସୂଚନା ଦେଲେ ଆକର୍ଷଣୀୟ ପୁରସ୍କାର ମିଳିବା ସହ ସୂଚନାଦାତାଙ୍କ ପରିଚୟ ଗୋପନ ରଖାଯିବ ବୋଲି ପୋଷ୍ଟରରେ ଉଲ୍ଲେଖ ରହିଛି । ତେବେ ଏହି ପୋଷ୍ଟର କିଏ ଲଗାଇଛି, ସେନେଇ ଆନୁଷ୍ଠାନିକ ସ୍ପଷ୍ଟୀକରଣ ମିଳିନାହିଁ । ଚାରି ଆତଙ୍କୀଙ୍କ ଉପସ୍ଥିତିକୁ ନେଇ ଗୁଇନ୍ଦା ତଥ୍ୟ ଓ ସୁରକ୍ଷା ଆକଳନ ମଧ୍ୟରେ ଏବେ ନୂଆ ଚର୍ଚ୍ଚା ଆରମ୍ଭ ହୋଇଛି । ଚାରିଆଡ଼େ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ପ୍ରତିଟି ଗତିବିଧି ଉପରେ ତୀକ୍ଷ୍ଣ ନଜର ରଖିଛନ୍ତି ସୁରକ୍ଷାକର୍ମୀ ଓ ଗୁପ୍ତଚର ଏଜେନ୍ସି ।