'B' ପାଇଁ ବିଡି ଓ ବିହାର ପୋଷ୍ଟକୁ ନେଇ ପ୍ରବଳ ହଙ୍ଗାମା ପରେ ନିଜ ପଦରୁ ଇସ୍ତଫା ଦେଇଛନ୍ତି କଂଗ୍ରେସ କେରଳ ୟୁନିଟର ସୋସିଆଲ ମିଡିଆ ମୁଖ୍ୟ । କେରଳ ପ୍ରଦେଶ କଂଗ୍ରେସ କମିଟି (KPCC) ସୋସିଆଲ ମିଡିଆ ଏବଂ ଡିଜିଟାଲ୍ ସେଲର ମୁଖ୍ୟ ଭିଟି ବଲରାମ, KPCCର ଅଫିସିଆଲ୍ ହ୍ୟାଣ୍ଡେଲ 'X'ରେ ବିହାରକୁ ବିଡ଼ି ସହିତ ଯୋଡିବା ଏକ ଫଟୋ ପୋଷ୍ଟ କରିବାର ଗୋଟିଏ ଦିନ ପରେ ତାଙ୍କ ପଦରୁ ଇସ୍ତଫା ଦେଇଛନ୍ତି।

ସୂଚନା ଅନୁସାରେ, GST ସଂସ୍କାର ପରେ କେରଳ କଂଗ୍ରେସ ଦ୍ୱାରା ସୋସିଆଲ ମିଡିଆ ପ୍ଲାଟଫର୍ମ `X'ରେ ଏକ ଫଟୋ ସେୟାର କରାଯାଇଥିଲା । ଏଥିରେ ସିଗାରେଟ୍ ଏବଂ ଅନ୍ୟାନ୍ୟ ତମାଖୁ ଉତ୍ପାଦ ଏବଂ ବିଡି ଉପରେ ଲାଗୁ ହୋଇଥିବା GSTର ତୁଳନା କରାଯାଇଥିଲା । କୁହାଯାଇଥିଲା ଯେ ତମାଖୁ ଉପରେ GST ବର୍ତ୍ତମାନର ୨୮ ପ୍ରତିଶତରୁ ୪୦ ପ୍ରତିଶତକୁ ବୃଦ୍ଧି କରାଯାଇଛି । ସିଗାରେଟ୍ ଏବଂ ସିଗାର୍ ଉପରେ ଟିକସ ସମାନ ଭାବରେ ବୃଦ୍ଧି କରାଯାଇଛି । କିନ୍ତୁ ବିଡ଼ି ଉପରେ GST ହ୍ରାସ କରାଯାଇଛି। ପୂର୍ବରୁ ବିଡ଼ି ଉପରେ ୨୮ ପ୍ରତିଶତ GST ଥିଲା, ଯାହାକୁ ଏବେ ୧୮ ପ୍ରତିଶତକୁ ହ୍ରାସ କରାଯାଇଛି । 'ବିଡି ଏବଂ ବିହାର' ଉଭୟ 'B' ରୁ ଆରମ୍ଭ ହୁଏ, ଏବେ ଏହାକୁ ସିନ୍ ବା ହାନୀକାରକ ବୋଲି ଆଉ ବିବେଚନା କରାଯାଇପାରିବ ନାହିଁ । ଯଦିଓ କେରଳ କଂଗ୍ରେସ ପକ୍ଷରୁ ଏହି ପୋଷ୍ଟକୁ ହଟାଇ ଦିଆଯାଇଥିଲା, କିନ୍ତୁ ବିଜେପି ଓ ଜେଡିୟୁ ଏହାକୁ ନେଇ କଂଗ୍ରେସକୁ କଡ଼ା ସମାଲୋଚନା କରିଥିଲା ।

ବିହାରର ଉପମୁଖ୍ୟମନ୍ତ୍ରୀ ଏବଂ ବିଜେପି ନେତା ସମ୍ରାଟ ଚୌଧୁରୀ ଏହାକୁ "ସମଗ୍ର ବିହାର ପାଇଁ ଅପମାନ" ବୋଲି କହିଥିଲେ । ସେ କହିଥିଲେ ଯେ କଂଗ୍ରେସ ବାରମ୍ବାର ତା'ର ସଂକୀର୍ଣ୍ଣ ମନୋଭାବ ପ୍ରଦର୍ଶନ କରୁଛି । ଜେଡିୟୁ ନେତା ସଞ୍ଜୟ କୁମାର ଝା ମଧ୍ୟ ଏହାକୁ ନେଇ ଏକ କଡ଼ା ମନ୍ତବ୍ୟ ରଖିଥିଲେ । ସେ ଏକ ପୋଷ୍ଟରେ ଲେଖିଥିଲେ: "ମୁଁ ଆପଣଙ୍କୁ କହିବାକୁ ଚାହୁଁଛି ଯେ B ର ଅର୍ଥ କେବଳ ବିଡ଼ି ନୁହେଁ, ଏହାର ଅର୍ଥ ବୁଦ୍ଧିମତ୍ତା ମଧ୍ୟ, ଯାହା ଆପଣଙ୍କ ପାଖରେ ନାହିଁ ! B ର ଅର୍ଥ ବଜେଟ୍ ମଧ୍ୟ, ଯେଉଁଥିରେ ବିହାରକୁ ବିଶେଷ ସହାୟତା ମିଳିଲେ ଆପଣ ବିରକ୍ତ ଅନୁଭବ କରନ୍ତି । କଂଗ୍ରେସ କେବଳ ବିହାରୀମାନଙ୍କୁ ନୁହେଁ ବରଂ ଦେଶର ଗୌରବମୟ ଐତିହ୍ୟକୁ ମଧ୍ୟ ଉପହାସ କରିଛି ବୋଲି ଜେଡିୟୁ ନେତା ସଞ୍ଜୟ ଝା କହିଥିଲେ । ସେହିପରି ସଞ୍ଜୟ ଝା ଚେତାବନୀ ଦେଇଥିଲେ ଯେ ବିହାରର ଲୋକମାନେ ନଭେମ୍ବର-ଡିସେମ୍ବର 2025 ରେ ହେବାକୁ ଥିବା ବିଧାନସଭା ନିର୍ବାଚନରେ କଂଗ୍ରେସକୁ ଯଥାର୍ଥ ଜବାବ ଦେବେ ।

Argus News | argus news | Odisha Latest News, Breaking News, Trending News, Live TV