Kota Murder Case / ୧୦୦ ଟଙ୍କା ପାଇଁ ସାଙ୍ଗକୁ କଲା ହତ୍ୟା, ଜଙ୍ଗଲରେ ଫିଙ୍ଗିଦେଲା ଶବ
·2 hours ago·2 min read
Key Points
ବନ୍ଧୁ ହେଲା ହତ୍ୟାକାରୀ
୧୦୦ ଟଙ୍କା ପାଇଁ କଲା ଭୟଙ୍କର କାଣ୍ଡ
ଜଙ୍ଗଲରେ ମିଳିଲା ମୃତଦେହ
୧୦୦ ଟଙ୍କା ପାଇଁ କଲା ଭୟଙ୍କର କାଣ୍ଡ
ଜଙ୍ଗଲରେ ମିଳିଲା ମୃତଦେହ
ରାଜସ୍ଥାନର କୋଟାରେ ଜଣେ ୧୦ ବର୍ଷୀୟ ବାଳକର ହତ୍ୟା ଘଟଣା ସମଗ୍ର ସହରକୁ ଚକିତ କରିଦେଇଛି । ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ମୃତକଙ୍କ ନାବାଳକ ବନ୍ଧୁ ହିଁ ଟଙ୍କା ବିବାଦକୁ ନେଇ ପଥରରେ ମୁଣ୍ଡକୁ ଛେଚି ହତ୍ୟା କରିଛି । ଘଟଣା ପରେ ଅଭିଯୁକ୍ତ ମୃତଦେହକୁ ଜଙ୍ଗଲରେ ଫେପାଡ଼ି ଘରକୁ ଫେରିଥିଲେ । ସବୁଠୁ ବଡ଼ କଥା ହେଉଛି ଅଭିଯୁକ୍ତ ନାବାଳକ ଜଣଙ୍କ ଘରକୁ ଫେରି ସ୍ବାଭାବିକ ଭାବେ ଶୋଇଥିଲେ ।
କୋଟାର ରେଳବାଇ କଲୋନୀ ପୋଲିସ ଷ୍ଟେସନ ଅଧୀନରେ ଅବସ୍ଥିତ ପୁନମ କଲୋନୀ ଅଞ୍ଚଳରେ ଏହି ଘଟଣା ଘଟିଛି । ମୃତକଙ୍କ ନାମ ମୟଙ୍କ ମୀନା (୧୦), ସୋଗାରିଆର ବାସିନ୍ଦା । ସେ ଷଷ୍ଠ ଶ୍ରେଣୀରେ ପଢ଼ୁଥିଲେ । ତାଙ୍କ ବାପା ଅମର ସିଂହ ମୀନା ରେଳ ୱାର୍କସପରେ ଫିଟର ଭାବରେ କାମ କରନ୍ତି । ସେହିପରି ଅଭିଯୁକ୍ତ ନାବାଳକର ବାପା ଜଣେ ଅଟୋ-ରିକ୍ସା ଡ୍ରାଇଭର ବୋଲି କୁହାଯାଉଛି ।
ରେଳବାଇ କଲୋନି ପୋଲିସ ଷ୍ଟେସନ ଅନୁଯାୟୀ, ମୟଙ୍କ ସୋମବାର ଅପରାହ୍ନରେ ଖେଳିବାକୁ ଯାଉଥିବା କହି ଘରୁ ବାହାରିଥିଲା, କିନ୍ତୁ ସନ୍ଧ୍ୟା ପର୍ଯ୍ୟନ୍ତ ଘରକୁ ଫେରି ନଥିଲା । ପରିବାର ଲୋକେ ସ୍ଥାନୀୟ ଅଞ୍ଚଳରେ ଖୋଜାଖୋଜି କରିଥିଲେ କିନ୍ତୁ କୌଣସି ସୂଚନା ପାଇନଥିଲେ । ଯାହାଫଳରେ ସେମାନେ ରାତି ପ୍ରାୟ ୧୨ଟା ସମୟରେ ପୋଲିସ୍ ଷ୍ଟେସନରେ ପହଞ୍ଚି ଅଭିଯୋଗ କରିଥିଲେ ।
ଅଧିକ ପଢ଼ନ୍ତୁ: ପୁଣି ଚର୍ଚ୍ଚାରେ ନୀଳ ଡ୍ରମ୍... ଡ୍ରମରୁ ବାହାରିଲା ଅଜଣା ଝିଅର ମୃତଦେହ
ଏହା ପରେ ପୋଲିସ ଅଞ୍ଚଳରେ ଥିବା ସିସିଟିଭି କ୍ୟାମେରାଗୁଡ଼ିକର ଭିଜିଆଲ୍ ଦେଖିବା ଆରମ୍ଭ କରିଥିଲା । ଫୁଟେଜରେ ଜଣେ ନାବାଳକ ମୟଙ୍କକୁ ସାଙ୍ଗରେ ନେଇ ଯାଉଥିବାର ଦେଖିବାକୁ ମିଳିଥିଲା । ଏହି ଫୁଟେଜ୍ ଆଧାରରେ ପୋଲିସ୍ ସନ୍ଦିଗ୍ଧ ନାବାଳକକୁ ଚିହ୍ନଟ କରି ପଚରାଉଚରା ଆରମ୍ଭ କରିଥିଲା ।
ଏହି ସମୟରେ ମଙ୍ଗଳବାର ରାତିରେ ପୋଲିସ ରେଳ ୱାର୍କସପ୍ ସମ୍ମୁଖ ଜଙ୍ଗଲରେ ଏକ ଶିଶୁର ମୃତଦେହ ପଡ଼ିଥିବା ସୂଚନା ପାଇଥିଲା । ପୋଲିସ ଘଟଣାସ୍ଥଳରେ ପହଞ୍ଚିବା ପରେ ମୃତଦେହଟି ମୟଙ୍କଙ୍କ ବୋଲି ଜଣାପଡ଼ିଥିଲା । ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ, ହତ୍ୟା ପରେ ମୃତଦେହକୁ ଜଙ୍ଗଲରେ ଫୋପଡ଼ା ଯାଇଥିଲା । ଆଉ ସେଠାରେ ଜଙ୍ଗଲୀ ପଶୁମାନେ ମୃତଦେହକୁ ଖଣ୍ଡ ବିଖଣ୍ଡିତ କରିଦେଇଥିଲେ ।
ପ୍ରାଥମିକ ତଦନ୍ତରୁ ଜଣାପଡିଛି ଯେ ଅଭିଯୁକ୍ତ ଓ ମୟଙ୍କ ଭଲ ବନ୍ଧୁ ଥିଲେ ଏବଂ ପ୍ରାୟତଃ ଏକାଠି ବୁଲାବୁଲି କରୁଥିଲେ । ୧୦୦-୨୦୦ ଟଙ୍କାର କାରବାରକୁ ନେଇ ସେମାନଙ୍କ ମଧ୍ୟରେ ବିବାଦ ଥିଲା । ଏହି ବିବାଦ ପରେ ଅଭିଯୁକ୍ତ ମୟଙ୍କ ମୁଣ୍ଡକୁ ପଥରରେ ଛେଚି ହତ୍ୟା କରିଥିଲେ ।
ପୋଲିସ ତଦନ୍ତରୁ ଜଣାପଡ଼ିଛି ଯେ ଘଟଣା ପରେ ଅଭିଯୁକ୍ତ ନାବାଳକ ଜଣକ ସିଧା ଘରକୁ ଯାଇ ସ୍ୱାଭାବିକ ଭାବରେ ଶୋଇଥିଲେ । ପୋଲିସ ତାଙ୍କ ଘରେ ପହଞ୍ଚି ପଚରାଉଚରା କରିବା ପରେ ପରିବାର ଲୋକ ଘଟଣା ବିଷୟରେ ଜାଣିପାରିଲେ । ମଙ୍ଗଳବାର ରାତି ପ୍ରାୟ ୧୧ଟାରେ ମୟଙ୍କଙ୍କ ମୃତଦେହକୁ ପୋଷ୍ଟମର୍ଟମ ପାଇଁ MBS ହସ୍ପିଟାଲ ମର୍ଚରୀକୁ ନିଆଯାଇଥିଲା । ତାଙ୍କ ପରିବାର ସଦସ୍ୟଙ୍କ ଉପସ୍ଥିତିରେ ଆଜି ପୋଷ୍ଟମର୍ଟମ କରାଯିବ । ଘଟଣାର ସମ୍ପୂର୍ଣ୍ଣ କ୍ରମ ଏବଂ ହତ୍ୟା ପଛରେ ଥିବା ଉଦ୍ଦେଶ୍ୟ ସ୍ପଷ୍ଟ କରିବା ପାଇଁ ପୋଲିସ ଅଭିଯୁକ୍ତ ନାବାଳକକୁ ପଚରାଉଚରା କରୁଛି ।
📱 Get Argus News App
✨📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free:
Related Topics
Explore more stories