Lalit Modi British Citizenship / ପଳାତକ ଲଳିତ ମୋଦିଙ୍କୁ ମିଳିଲା ବ୍ରିଟିଶ ନାଗରିକତା, ୧୬ ବର୍ଷ ପରେ ନୂଆ ପରିଚୟ

ଇଣ୍ଡିଆନ୍ ପ୍ରିମିୟର ଲିଗ୍‌ (IPL)ର ପ୍ରତିଷ୍ଠାତା ତଥା ଭାରତରୁ ପଳାତକ ଘୋଷିତ ଲଳିତ ମୋଦିଙ୍କୁ ମିଳିଛି ବ୍ରିଟିଶ ନାଗରିକତା । ନଭେମ୍ବର ୧୪, ୨୦୨୬ ଶନିବାର ଦିନ ଅକ୍ସଫୋର୍ଡ ୟୁନିୟନରେ ଉଦ୍‌ବୋଧନ ଦେବା ସମୟରେ ସେ ସର୍ବସାଧାରଣରେ ଏହି ଘୋଷଣା କରିଛନ୍ତି । ଚଳିତ ବର୍ଷ ସେପ୍ଟେମ୍ବର ୧୫ ତାରିଖରେ ଏକ ସ୍ୱତନ୍ତ୍ର ସମାରୋହରେ ତାଙ୍କୁ ବ୍ରିଟିଶ ନାଗରିକତା ମିଳିଥିବା ସେ କହିଛନ୍ତି । ଏହାକୁ ନିଜ ଜୀବନର ଏକ ବିଶେଷ ଓ ଗର୍ବର ମୁହୂର୍ତ୍ତ ବୋଲି କହିଛନ୍ତି ଲଳିତ ମୋଦି ।

ଅକ୍ସଫୋର୍ଡ ୟୁନିୟନରେ କଲେ ଘୋଷଣା

ଲଳିତ ମୋଦି ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ ସେୟାର କରି ଲେଖିଛନ୍ତି, ଏହା ତାଙ୍କ ପାଇଁ ଏକ ଗର୍ବର ମୁହୂର୍ତ୍ତ ଏବଂ ଜୀବନର ଏକ ନୂଆ ଅଧ୍ୟାୟର ଆରମ୍ଭ । ନଭେମ୍ବର ୧୪ରେ ଅକ୍ସଫୋର୍ଡ ୟୁନିୟନକୁ ସମ୍ବୋଧିତ କରିବାର ସୁଯୋଗ ମିଳିଥିବା ବେଳେ ସେ ନିଜର ବ୍ରିଟିଶ ନାଗରିକତା ସମ୍ପର୍କରେ ଘୋଷଣା କରିଥିଲେ ।
ସେପ୍ଟେମ୍ବର ୧୫ ତାରିଖରେ ପରିବାର ଓ ବନ୍ଧୁଙ୍କ ଉପସ୍ଥିତିରେ ନାଗରିକତା ପ୍ରଦାନ ସମାରୋହ ଆୟୋଜିତ ହୋଇଥିଲା । ଏହି ଦିନଟି ସବୁବେଳେ ତାଙ୍କ ହୃଦୟର ନିକଟତର ହୋଇ ରହିବ ବୋଲି ସେ କହିଛନ୍ତି ।

ବ୍ରିଟେନକୁ ନିଜ ଘର ବୋଲି କହିଲେ ଲଳିତ ମୋଦି

ଲଳିତ ମୋଦିଙ୍କ କହିବା ଅନୁଯାୟୀ, ଦୀର୍ଘ ବର୍ଷ ଧରି ବ୍ରିଟେନ ତାଙ୍କର ଘର ହୋଇ ରହିଛି । ଏଠାକାର ଲୋକ, ସଂସ୍ଥା, ପରମ୍ପରା ଓ ମୂଲ୍ୟବୋଧ ପ୍ରତି ତାଙ୍କର ଗଭୀର ସମ୍ମାନ ଓ ଭଲପାଇବା ରହିଛି। ବ୍ରିଟିଶ ନାଗରିକ ହେବା ତାଙ୍କ ପାଇଁ ଏକ ବିଶେଷ ସମ୍ମାନ ସହ ଗୁରୁଦାୟିତ୍ୱ ମଧ୍ୟ ବୋଲି ସେ କହିଛନ୍ତି ।

ବିଭିନ୍ନ ସଂସ୍କୃତି ଓ ଅନୁଭୂତି ତାଙ୍କ ଜୀବନକୁ ପ୍ରଭାବିତ କରିଛି । ଏବେ ସେ ଯେଉଁ ଦେଶକୁ ନିଜ ଘର ବୋଲି ଗର୍ବର ସହ କହୁଛନ୍ତି, ସେହି ଦେଶର ବିକାଶ ଓ ସମାଜ ପାଇଁ ସକାରାତ୍ମକ ଯୋଗଦାନ ଦେବାକୁ ଚାହୁଁଥିବା ମଧ୍ୟ ପ୍ରକାଶ କରିଛନ୍ତି ।

ପରିବାର ଓ ବନ୍ଧୁଙ୍କୁ ଜଣାଇଲେ କୃତଜ୍ଞତା

ଏହି ନୂଆ ଯାତ୍ରାରେ ସହଯୋଗ କରିଥିବା ପରିବାର, ବନ୍ଧୁ ଓ ଅନ୍ୟ ସମସ୍ତଙ୍କୁ ଲଳିତ ମୋଦି ଧନ୍ୟବାଦ ଜଣାଇଛନ୍ତି । ଏହି ବିଶେଷ ଖବରକୁ ସାର୍ବଜନୀନ କରିବାର ସୁଯୋଗ ଦେଇଥିବାରୁ ଅକ୍ସଫୋର୍ଡ ୟୁନିୟନକୁ ମଧ୍ୟ କୃତଜ୍ଞତା ଜଣାଇଛନ୍ତି ।

ବ୍ରିଟେନର ରାଜା କିଙ୍ଗ ଚାର୍ଲ୍ସ ତୃତୀୟଙ୍କ ଜନ୍ମଦିନ ଅବସରରେ ଏହି ଖବର ସେୟାର କରିବା ତାଙ୍କ ପାଇଁ ଆହୁରି ସ୍ୱତନ୍ତ୍ର ବୋଲି ସେ ଉଲ୍ଲେଖ କରିଛନ୍ତି । ପୋଷ୍ଟର ଶେଷରେ 'ଗଡ୍ ସେଭ୍ ଦ କିଙ୍ଗ' ଲେଖି ବ୍ରିଟିଶ ରାଜାଙ୍କ ପ୍ରତି ସମ୍ମାନ ଜଣାଇଛନ୍ତି ।

୨୦୧୦ରେ ଭାରତ ଛାଡ଼ିଥିଲେ ଲଳିତ ମୋଦି

IPLର ପ୍ରତିଷ୍ଠାତା ଲଳିତ ମୋଦି ୨୦୧୦ ମସିହା ମେ' ମାସରେ ଭାରତ ଛାଡ଼ିଥିଲେ । IPLର ପ୍ରସାରଣ ଅଧିକାର, ବିଦେଶୀ ମୁଦ୍ରା କାରବାର ଓ ଆର୍ଥିକ ଅନିୟମିତତାକୁ ନେଇ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (BCCI) ତାଙ୍କ ବିରୋଧରେ ଅଭିଯୋଗ ଆଣିଥିଲା ।

ଏହାପରେ BCCI ତାଙ୍କୁ ନିଲମ୍ବିତ କରିଥିଲା । ୨୦୧୩ ସେପ୍ଟେମ୍ବରରେ ଅନୁଶାସନ କମିଟିର ତଦନ୍ତ ଆଧାରରେ ତାଙ୍କ ଉପରେ ଆଜୀବନ ବାସନ୍ଦାଦେଶ ଲଗାଯାଇଥିଲା । ଏହା ସହିତ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ପକ୍ଷରୁ ବିଦେଶୀ ମୁଦ୍ରା ପରିଚାଳନା ଆଇନ (FEMA) ଓ ଅର୍ଥ ହେରଫେର ସମ୍ପର୍କିତ ମାମଲାର ମଧ୍ୟ ତଦନ୍ତ କରାଯାଇଥିଲା ।