ପଶ୍ଚିମବଙ୍ଗର ରାଜଧାନୀ କୋଲକାତାରେ ଶୁକ୍ରବାର ମାଡ଼ି ଆସିଥିଲା ଏକ ବଡ଼ ବିପଦ । ସୌଭାଗ୍ୟବଶତଃ କୌଣସି ଅଘଟଣ ଘଟିବା ପୂର୍ବରୁ ଅଳ୍ପକେ ବର୍ତ୍ତିଯାଇଛନ୍ତି ଶହ ଶହ ଯାତ୍ରୀ । ଅଗରତାଲା ଯାଉଥିବା ଏକ ଇଣ୍ଡିଗୋ ବିମାନ ରନୱେରେ ଥିବା ସମୟରେ ବିମାନ ଉପରେ ଖସିପଡ଼ିଥିଲା ବିଜୁଳି । ତେବେ ବିଜୁଳି ମାରିଲା ବେଳେ ବିମାନରେ ପ୍ରାୟ ୧୪୧ ଜଣ ଯାତ୍ରୀ ଥିଲେ, ଯେଉଁମାନେ ବଡ଼ ବିପଦରୁ ଅଳ୍ପକେ ବର୍ତ୍ତିଯାଇଛନ୍ତି । ଏହାପରେ ସୁରକ୍ଷା ଦୃଷ୍ଟିରୁ ଯାତ୍ରୀମାନଙ୍କ ଲାଗି ଆଉ ଏକ ବିମାନର ବ୍ୟବସ୍ଥା କରାଯାଇଥିଲା ।

ଜାତୀୟ ଗଣମାଧ୍ୟମ ସରବରାହ ସଂସ୍ଥା ଏଏନଆଇ ଅନୁସାରେ, ଗ୍ରାଉଣ୍ଡରେ କାମ କରୁଥିବା ୨ଜଣ କର୍ମଚାରୀଙ୍କୁ ସଙ୍ଗେ ସଙ୍ଗେ ଚିକିତ୍ସା ଲାଗି ନିକଟସ୍ଥ ହସ୍ପିଟାଲକୁ ନିଆଯାଇଥିଲା । ତେବେ କୌଣସି କର୍ମଚାରୀ କିମ୍ବା ଯାତ୍ରୀ ଆହତ ହୋଇନଥିବା ନେଇ ସୂଚନା ମିଳିଛି । ଶୁକ୍ରବାର କୋଲକାତା ଏୟାରପୋର୍ଟରେ ଝଡ଼ ତୋଫାନ ସମୟରେ ଇଣ୍ଡିଗୋର ଗୋଟିଏ ବିମାନ ଉପରେ ବିଜୁଳି ଖସିଥିବା ନେଇ ଭାରତୀୟ ବିମାନ ବନ୍ଦର କର୍ତ୍ତୃପକ୍ଷ (AAI) ମଧ୍ୟ ସ୍ପଷ୍ଟ କରିଛନ୍ତି ।

• ଏମିତି ବିମାନ ଉପରେ ଖସିଲା ବିଜୁଳି

ଏହି ଘଟଣା ଝଡ଼ ତୋଫାନ ଓ ପ୍ରବଳ ବର୍ଷା କାରଣରୁ ଘଟିଛି । ଏୟାରପୋର୍ଟ ଅପରେସନ କଣ୍ଟ୍ରୋଲ ସେଣ୍ଟର (AOCC) ମଧ୍ୟ ପ୍ରତିକୂଳ ପାଣିପାଗ ନେଇ ପୂର୍ବରୁ ସୂଚନା ଦେଇଥିଲା । ଏହି ସମୟରେ ବିମାନ ଉଡ଼ାଣକୁ ମଧ୍ୟ କିଛି ସମୟ ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା । ସୌଭାଗ୍ୟବଶତଃ ଯାତ୍ରୀମାନେ ବଡ଼ ବିପଦରୁ ବର୍ତ୍ତିଯାଇଛନ୍ତି, କାହାର କୌଣସି କ୍ଷତି ହୋଇନାହିଁ । ବିଜୁଳି ମାରିବା ସମୟରେ ଇଣ୍ଡିଗୋ ଫ୍ଲାଇଟ୍ 6E6068 (VT-IPW) ଏରୋବ୍ରିଜ୍ 56Lରେ ଠିଆ ହୋଇଥିଲା । ଶୁକ୍ରବାର ସକାଳ ୯.୩୦ଟାରେ ବିଜୁଳି ଖସିଥିଲା । ବିଜୁଳି ବିମାନ ଉପରେ ଖସିବା ପରେ ଏହାର ପାୱାର ସିଷ୍ଟମ ପ୍ରଭାବିତ ହୋଇଥିଲା, ଫଳରେ ହଠାତ୍ ପାୱାର ଅଫ୍ ମଧ୍ୟ ହୋଇଥିଲା।

ପଢନ୍ତୁ ଏହି ଖବର: ଇମରଜେନ୍ସି ଗେଟ୍ ଖୋଲିଲେ; ଚଳନ୍ତା ବିମାନରୁ ଡେଇଁଲେ ଯାତ୍ରୀ

ଅଧିକାରୀମାନେ କହିଛନ୍ତି ଯେ, ଯେତେବେଳେ ବିଜୁଳି ଖସିଥିଲା ସେତେବେଳେ A320 ବିମାନରେ ୧୪୧ ଜଣ ଯାତ୍ରୀ ଥିଲେ ଓ ୬ଜଣ କ୍ରୁ ମେମ୍ବର ଥିଲେ । ସୁରକ୍ଷା ଦୃଷ୍ଟିରୁ, ଏୟାରଲାଇନ୍ ସମସ୍ତ ଯାତ୍ରୀଙ୍କୁ ବିମାନରୁ ତଳକୁ ଓହ୍ଲାଇଥିଲେ ଓ ପରେ A321 ବିମାନ (VT-ICD)ରେ ଅଗରତାଲାକୁ ଉଡ଼ାଣ ଭରିଥିଲେ । ଅଗରତାଲା ଯିବାକୁ ଥିବା ଇଣ୍ଡିଗୋ ବିମାନଟି ସକାଳ ୯.୨୦ଟାରେ ଉଡ଼ାଣ ଭରିବାର ଥିଲା, କିନ୍ତୁ ଯାତ୍ରୀମାନେ ୧୨.୫୦ଟାରେ ଟେକ୍ ଅଫ୍ କରିଥିଲା ।

• ୨ କର୍ମଚାରୀଙ୍କୁ ଛୁଟି ଦେଲା ଏୟାରଲାଇନ୍

ତେବେ ବିଜୁଳି ଖସିପଡ଼ିବା ସମୟରେ ୨ଜଣ ଗ୍ରାଉଣ୍ଡ ଷ୍ଟାଫ୍ ସାମାନ୍ୟ ରୂପରେ ପ୍ରଭାବିତ ହୋଇଥିଲେ ଓ ସେମାନଙ୍କୁ ହସ୍ପିଟାଲକୁ ନିଆଯାଇଥିଲା । ଅଧିକାରୀମାନେ କହିଛନ୍ତି ଯେ ଚିକିତ୍ସା ପରେ ସେମାନଙ୍କୁ ତୁରନ୍ତ ଛୁଟି ଦିଆଯାଇଥିଲା । ଏଠାରେ କହିରଖୁଛୁ କି, ଶୁକ୍ରବାର ସକାଳେ କୋଲକାତା ଓ ଆଖପାଖ ଜିଲ୍ଲାରେ ଝଡ଼ ତୋଫାନ ହୋଇଥିଲା, ଯାହାଦ୍ଵାରା ଅନେକ ଅଞ୍ଚଳ ଜଳମଗ୍ନ ହୋଇଥିଲା ଓ ଟ୍ରାଫିକ ବି ପ୍ରଭାବିତ ହୋଇଥିଲା ।