Gang Rape Allegation / ଲିଭ୍ -ଇନରେ ଥିବା ଯୁବତୀଙ୍କୁ ଫୁସୁଲାଇ ଜଙ୍ଗଲକୁ ନେଇ ଗଣଦୁଷ୍ମର୍ମ ଅଭିଯୋଗ

ଚିତ୍ରକୂଟ,୦୧/୧୦: ଉତ୍ତର ପ୍ରଦେଶର ଚିତ୍ରକୂଟ ଜିଲ୍ଲାର ମାଣିକପୁର ଥାନା ଅଞ୍ଚଳରେ ଜଣେ ମହିଳାଙ୍କୁ ତିନି ଜଣ ପୁରୁଷ ଗଣବଳାତ୍କାର କରିଥିବା ଅଭିଯୋଗକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ମହିଳା ଜଣକ ଲିଭ୍-ଇନ୍ ସମ୍ପର୍କରେ ରହୁଥିବା ବେଳେ ସ୍ୱାମୀଙ୍କ ସହ ବିବାଦ ପରେ ଅଲଗା ରହୁଥିଲେ। ଏହି ପରିସ୍ଥିତିର ସୁଯୋଗ ନେଇ ଜଣେ ପଡ଼ୋଶୀ ତାଙ୍କୁ ସ୍ୱାମୀଙ୍କ ସହ ପୁଣି ମିଳାଇଦେବାର ପ୍ରତିଶ୍ରୁତି ଦେଇ ଜଙ୍ଗଲକୁ ନେଇଥିବା ଅଭିଯୋଗ ହୋଇଛି। ଘଟଣାର ତଦନ୍ତ କରି ପୋଲିସ ମୁଖ୍ୟ ଅଭିଯୁକ୍ତ ଛୈଲାକୁ ଗିରଫ କରିଛି। 

ପୋଲିସରେ ଦାଖଲ ଅଭିଯୋଗ ଅନୁସାରେ, ସେପ୍ଟେମ୍ବର ୩୦ ତାରିଖରେ ଏହି ଘଟଣା ଘଟିଥିବା କୁହାଯାଉଛି। ମହିଳାଙ୍କୁ ତାଙ୍କ ପଡ଼ୋଶୀ ଛୈଲା ଭେଟିଥିଲେ। ସ୍ୱାମୀଙ୍କ ସହ ହୋଇଥିବା ବିବାଦର ସମାଧାନ କରାଇଦେବା ସହ ତାଙ୍କୁ ପୁଣି ସ୍ୱାମୀଙ୍କ ପାଖକୁ ନେଇଯିବାର ପ୍ରତିଶ୍ରୁତି ଦେଇ ସେ ମହିଳାଙ୍କୁ ସାଙ୍ଗରେ ନେଇଥିବା ଅଭିଯୋଗ ହୋଇଛି।

ଫୁସୁଲାଇ ଜଙ୍ଗଲକୁ ନେଇ ଯାଇଥିବା ଅଭିଯୋଗ

ଅଭିଯୋଗ ଅନୁସାରେ, ଛୈଲା ମହିଳାଙ୍କୁ ରେଳ ଲାଇନ୍ ଅତିକ୍ରମ କରି ଏକ ମହୁଆ ଗଛ ନିକଟସ୍ଥ ଜଙ୍ଗଲ ଅଞ୍ଚଳକୁ ନେଇଯାଇଥିଲେ। ସେଠାରେ ଛୁଟକୁ ଓ ପୁରୁଷୋତ୍ତମ ନାମକ ଆଉ ଦୁଇ ଜଣ ବ୍ୟକ୍ତି ପୂର୍ବରୁ ଉପସ୍ଥିତ ଥିବା ପୋଲିସ ଅଭିଯୋଗରେ ଦର୍ଶାଯାଇଛି। ମହିଳାଙ୍କ ଅଭିଯୋଗ ଅନୁସାରେ, ତିନି ଜଣ ମିଶି ତାଙ୍କ ସହ ଜୋରଜବରଦସ୍ତି କରିଥିଲେ। ଘଟଣା ପରେ ମହିଳା ଘରକୁ ଫେରି ତାଙ୍କ ସ୍ୱାମୀଙ୍କୁ ଘଟଣା ସମ୍ପର୍କରେ ଜଣାଇଥିଲେ। ପରେ ମାଣିକପୁର ଥାନାରେ ଅଭିଯୋଗ ଦାଖଲ କରାଯାଇଥିଲା।

ପଢନ୍ତୁ ଏହି ଖବର: ଜେଜେବାପା ଥିଲେ ଡକାୟତ, ନାତି ହେଲେ ସିଭିଲ ସର୍ଭିସ ଅଫିସର

ମାମଲା ରୁଜୁ, ଜଣେ ଗିରଫ

ଅଭିଯୋଗ ପାଇବା ପରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଏହାପରେ ମୁଖ୍ୟ ଅଭିଯୁକ୍ତ ଛୈଲାକୁ ପୋଲିସ ଗିରଫ କରିଛି। ତେବେ ଅଭିଯୋଗରେ ନାମ ଥିବା ଅନ୍ୟ ଦୁଇ ଜଣ ଛୁଟକୁ ଓ ପୁରୁଷୋତ୍ତମ ଘଟଣା ପରଠାରୁ ଫେରାର ଥିବା ଜଣାପଡ଼ିଛି। ପୋଲିସ ଅଧିକ୍ଷକ ଅରୁଣ କୁମାର ସିଂହଙ୍କ ସୂଚନା ଅନୁସାରେ, ପ୍ରାଥମିକ ତଦନ୍ତ ଆଧାରରେ ମାମଲାର ତଦନ୍ତ ଆଗକୁ ବଢ଼ାଯାଉଛି। ଘଟଣାରେ ସମ୍ପୃକ୍ତ ଅନ୍ୟ ଦୁଇ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ଟିମ୍ ବିଭିନ୍ନ ସ୍ଥାନରେ ତଲାସ ଜାରି ରଖିଛି।

ଫରେନସିକ୍ ଟିମ୍‌ର ତଦନ୍ତ

ଘଟଣାସ୍ଥଳରୁ ଫରେନସିକ୍ ଟିମ୍ ନମୁନା ସଂଗ୍ରହ କରିଥିବା ପୋଲିସ ସୂତ୍ରରୁ ଜଣାପଡ଼ିଛି। ଘଟଣାର ପ୍ରତ୍ୟେକ ଦିଗକୁ ନେଇ ତଦନ୍ତ କରାଯାଉଛି। ପୀଡ଼ିତାଙ୍କ ବୟାନ ସହ ଅନ୍ୟାନ୍ୟ ପ୍ରମାଣକୁ ମଧ୍ୟ ତଦନ୍ତରେ ସାମିଲ କରାଯାଉଛି। ବର୍ତ୍ତମାନ ମାମଲାରେ ଜଣେ ଅଭିଯୁକ୍ତ ପୋଲିସ ହେପାଜତରେ ଥିବା ବେଳେ ଅନ୍ୟ ଦୁଇ ଜଣଙ୍କୁ ଧରିବା ପାଇଁ ତଲାସ ଜାରି ରହିଛି। ତଦନ୍ତ ଶେଷ ହେବା ପରେ ଘଟଣାର ପ୍ରକୃତ ଚିତ୍ର ଆହୁରି ସ୍ପଷ୍ଟ ହେବ। ଏହି ଘଟଣାକୁ ନେଇ ମାଣିକପୁର ଅଞ୍ଚଳରେ ଚାଞ୍ଚଲ୍ୟ ଦେଖାଦେଇଛି।