ଅର୍ଗସ ବ୍ୟୁରୋ :  ଅଦାଲତରେ ବିବାହ ତାରିଖର ସ୍ଥିର କରାଗଲା । ଶୁଭ ମୁହୁର୍ତ୍ତ ନିର୍ଦ୍ଧାରିତ କଲେ ପଣ୍ଡିତ । ଏବେ କେବଳ ହେବ ଦୁଇ ପ୍ରେମପକ୍ଷୀଙ୍କ ବିବାହ । ଆପଣ ଭାବୁଥିବେ ଯେ, ବିବାହ ପାଇଁ ଅଦାଲତ କାହିଁକି ନିଷ୍ପତି ନେଲେ ? କାରଣ ବିବାହ ଦୁଇଟି ସାଧାରଣ ପ୍ରେମୀଯୁଗଳଙ୍କ ଭିତରେ ନଥିଲା, ଏ ପ୍ରେମ ସମ୍ପର୍କ ଗଢି ଉଠିଥିଲା ଗ୍ୟାଙ୍ଗଷ୍ଟାର ଏବଂ ଲେଡିଡନଙ୍କ ଭିତରେ । ୧୨ ମାର୍ଚ୍ଚରେ ଉଭୟଙ୍କ ବିବାହ ହେବାକୁ ଯାଉଛି । ଯାହାକୁ ନେଇ ଜେଲ ଭିତରେ ହିଁ ଆରମ୍ଭ ହୋଇଛି ପ୍ରସ୍ତୁତି । ତେବେ ଆସନ୍ତୁ ଜାଣିବା ଏହି ଦୁହିଁଙ୍କ ପ୍ରେମ କାହାଣୀ ସମ୍ପର୍କରେ ।

ବିଶିଷ୍ଟ ଗ୍ୟାଙ୍ଗଷ୍ଟାର ଲରେନ୍ସ ବିଶୋଇର ଖାସ ଲୋକ କାଲା ଜଠେଡି । ଗତ ତିନିବର୍ଷ ତଳେ କରୋନା ସମୟରେ ପୋଲିସ ଭୟରେ ଅନେକ ସ୍ଥାନରେ ଲୁଚି ରହୁଥିଲେ । ତାଙ୍କ ସହ ଥିଲେ ୪୭ ବର୍ଷୀୟ ଲେଡି ଡନ ଅନୁରାଧା ଚୌଧୁରୀ । ଉଭୟ ଗିରଫ ଭୟରେ ଭିନ୍ନ ଭିନ୍ନ ସ୍ଥାନରେ ଲୁଚୁଥିଲେ । ଏହି ସମୟରେ ତାଙ୍କ ଭିତରେ ଗଢି ଉଠିଥିଲା ପ୍ରେମ ସମ୍ପର୍କ । ହେଲେ ଏ ଲୁଚାଛପା ପ୍ରେମ ଭିତରେ ଉଭୟ ସହାରନପୁରର ଏକ ଢାବାରେ ଖାଉଥିବା ସମୟରେ ପୋଲିସ ହାବୁଡରେ ପଡି ଯାଇଥିଲେ । ୩୦ ଜୁଲାଇ ୨୦୨୧ରେ ଉଭୟଙ୍କୁ ଗିରଫ କରାଯାଇଥିଲା ।

ଗିରଫ ପରେ ଉଭୟଙ୍କୁ ଅଲଗା ଅଲଗା ଜେଲରେ ରଖାଯାଇଥିଲା । କିଛିଦିନ ପରେ ଜେଲରୁ ମୁକୁଳିଥିଲେ ଅନୁରାଧା । ହେଲେ କାଲା ଜଠେଡି ଜେଲରେ ହିଁ ରହିଥିଲେ । ସେପଟେ ଅନୁରାଧା ଜେଲରୁ ବାହାରି କାଲା ଜଠେଡିର  ଗାଁରେ ରହି ତା ବାପା ମାଆଙ୍କ ସେବା କରୁଥିଲେ । କିନ୍ତୁ ସବୁଦିନ ରହିବା ପାଇଁ ହେଲେ ତାଙ୍କୁ କାଲା ଜଠେଡିଙ୍କୁ ବିବାହ କରିବାକୁ ପଡିବ । ଏବଂ ବିବାହ ପାଇଁ ଅନେକ ନିୟମ କାନୁନର ସାମ୍ନା କରିବାକୁ ପଡିବ, କାରଣ କାଲା ଜଠେଡି ଜେଲରେ ହିଁ ରହିଥିଲେ । ସେଥିପାଇଁ ଲ' ପଢିବା ଆରମ୍ଭ କଲେ । ଏହାପରେ ସେ ନିଜେ ବିବାହ କରିବାକୁ ଓକିଲଙ୍କ ପରାମର୍ଶ ନେଲେ । ଶେଷରେ କଥା କୋର୍ଟରେ ପହଞ୍ଚିବା ପରେ , ଉଭୟଙ୍କ ପକ୍ଷ ଶୁଣିଥିଲା ଦ୍ବାରକା କୋର୍ଟ । ପରେ ଉଭୟଙ୍କ ବିବାହ ୧୨ ମାର୍ଚ୍ଚରେ କରାଯିବାକୁ ନିଷ୍ପତ୍ତି ନିଆଗଲା ।

ଅଧିକ ପଢନ୍ତୁ : ମାଇନସ ୨୫ ଡିଗ୍ରୀରେ ବିବାହ କଲେ ଲଭ୍ ବାର୍ଡ

ତେବେ ମାର୍ଚ୍ଚ ୧୨ରେ ଉଭୟଙ୍କ ବିବାହର ସମସ୍ତ ରୀତିନୀତି ସକାଳ ୧୦ରୁ ଅପରାହ୍ନ ୪ ମଧ୍ୟରେ କରାଯିବ । ସେତିକି ସମୟ ବିବାହ ମଣ୍ଡପରେ ଉପସ୍ଥିତ ରହିବେ ଅନେକ ପୋଲିସ କର୍ମଚାରୀ । ଏଥିସହ ଉଭୟ ପକ୍ଷର କିଛି ଖାସ ଲୋକ ହିଁ ଏହି ବିବାହରେ ଉପସ୍ଥିତ ରହିବେ ।