Argus News - ଯୁଦ୍ଧ ମଧ୍ୟରେ ବଡ଼ ଆଶ୍ବସ୍ତି, ହଜାର ହଜାର ଟନ୍‌ LPG ନେଇ ଭାରତ ଆସିଲା ଆଉ ଏକ ଜାହାଜ

ଜଳୁଛି ମଧ୍ୟପ୍ରାଚ୍ୟ । ଯୁଦ୍ଧ ଯୋଗୁଁ ମଧ୍ୟପ୍ରାଚ୍ୟର ପରିସ୍ଥିତି ଭୟଙ୍କର । ଇରାନ ଏବଂ ଇସ୍ରାଏଲ-ଆମେରିକା ମଧ୍ୟରେ ଯୁଦ୍ଧ ଦିନକୁ ଦିନ ତୀବ୍ର ରୂପ ନେଉଛି । ଆଉ ଏହି ଭୟଙ୍କର ଯୁଦ୍ଧ ପାଇଁ ସବୁଠୁ ଅଧିକ ପ୍ରଭାବିତ ହୋଇଛି ହର୍ମୁଜ ପ୍ରଣାଳୀ । ଏହି ସଂକୀର୍ଣ୍ଣ ସମୁଦ୍ର ପଥ ଦେଇ ବିଶ୍ବର ୨୦ ପ୍ରତିଶତ ତୈଳ ଓ ଗ୍ୟାସ୍‌ ଯାଇଥାଏ ।

ଯୁଦ୍ଧ ଆରମ୍ଭ ହେବା ପରଠୁ ଇରାନ ଏହି ରାସ୍ତା ଦେଇ ଯାଉଥିବା ଯେକୌଣସି ଜାହାଜକୁ ଆକ୍ରମଣ କରିବାକୁ ଧମକ ଦେଇଥିଲା । ଏହା ଶୁଣି ଶହ ଶହ ଜାହାଜ ସେଠାରେ ଲଙ୍ଗର ପକାଇଥିଲେ । ଅନେକ ଭାରତୀୟ ଜାହାଜ ମଧ୍ୟ ହୁର୍ମଜ ଷ୍ଟ୍ରେଟରେ ଫସି ରହିଛନ୍ତି । ପ୍ରଶ୍ନ ଉଠିଲା ଯଦି ଗ୍ୟାସ୍ ଜାହାଜ ନ ପହଞ୍ଚେ ତେବେ ଭାରତରେ ରନ୍ଧନ ଗ୍ୟାସର କ'ଣ ହେବ ? କିନ୍ତୁ ଭାରତ ପୂର୍ବରୁ ପ୍ରସ୍ତୁତି ଥିଲା ।

ହର୍ମୁଜ୍ ପ୍ରଣାଳୀ ଉପରେ ନିର୍ଭରଶୀଳତା ହ୍ରାସ କରିବା ପାଇଁ ଭାରତ ଏଲପିଜି ସମ୍ପର୍କରେ ଆମେରିକା ସହିତ ଯୋଗାଯୋଗ କରିଥିଲା । ଯାହାର ରେଜଲ୍ଟ ଏବେ ଦେଖିବାକୁ ମିଳୁଛି । ଆମେରିକାର ଟେକ୍ସାସରୁ ଏକ ଜାହାଜ ପାଇକ୍ସିସ୍ ପାୟୋନିୟର ରବିବାର ସକାଳେ ମାଙ୍ଗାଲୁରୁ ବନ୍ଦରରେ ପହଞ୍ଚିଛି । ଏହି ଜାହାଜରେ ୧୬ ହଜାର ୭୧୪ ଟନ୍ LPG ରହିଛି ।

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଆସନ୍ତା ସପ୍ତାହରେ ନ୍ୟୁ ମାଙ୍ଗାଲୁରୁ ବନ୍ଦରରେ ଏକ ବଡ଼ LPG ଜାହାଜ ଆସିବାର ସମ୍ଭାବନା ଅଛି । ସୂଚନା ଅନୁଯାୟୀ, ମୋଟ ପ୍ରାୟ ୭୨,୭୦୦ ଟନ୍ LPG ଗ୍ୟାସ୍‌ ଆସିବାର ସମ୍ଭାବନା ଅଛି ଏବଂ ଏହା ରବିବାରଠୁ ଆସିବାରେ ଲାଗିଛି ।

ବିଶ୍ୱର ବିଭିନ୍ନ ସ୍ଥାନରୁ ଗ୍ୟାସ୍ ପହଞ୍ଚୁଛି

ଏହା ପରେ, Apollo Ocean ନାମକ ଏକ ଟ୍ୟାଙ୍କର୍ ମଧ୍ୟ ମାର୍ଚ୍ଚ ୨୫ ତାରିଖରେ ବନ୍ଦରରେ ପହଞ୍ଚିବ । ଯେଉଁଥିରେ ୨୬,୬୮୭ ଟନ୍ LPG ରହିଛି । ଏହି ଗ୍ୟାସ୍ ଇଣ୍ଡିଆନ୍ ଅଏଲ୍ କର୍ପୋରେସନ୍ ଲିମିଟେଡ୍ ଏବଂ ଭାରତ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍ ପାଇଁ ଅନଲୋଡ୍ କରାଯିବ ।

ଆମେରିକାରୁ ଟ୍ୟାଙ୍କର ଆସିବ

ଏହା ବ୍ୟତୀତ, ୨୯ ତାରିଖରେ ଆମେରିକାରୁ ପ୍ରାୟ ୩୦,୦୦୦ ଟନ୍ ଏଲପିଜି ସହିତ ଆଉ ଏକ ଟ୍ୟାଙ୍କର ଏଠାରେ ପହଞ୍ଚିବ । ଏହି ଗ୍ୟାସ ହିନ୍ଦୁସ୍ତାନ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍ ପାଇଁ ଆସିବ । ମାଙ୍ଗାଲୁରୁରେ ଥିବା HPCLର ଏଲ୍ପିଜି ପ୍ଲାଣ୍ଟ ପାଇପଲାଇନ୍ ମାଧ୍ୟମରେ ସ୍ଥାନୀୟ ବୋଟଲିଂ ପ୍ଲାଣ୍ଟ ଏବଂ ବେଙ୍ଗାଲୁରୁ ସମେତ ଅନ୍ୟାନ୍ୟ ସ୍ଥାନକୁ ଏହି ଗ୍ୟାସ ଯୋଗାଣ କରେ । ତେଣୁ, ଆଗାମୀ ଦିନରେ ଗ୍ୟାସ ଯୋଗାଣ ସୁଦୃଢ଼ ​​ହେବ ବୋଲି ଆଶା କରାଯାଉଛି ।