ନୂଆଦିଲ୍ଲୀ: ସାଉଦି ଆରବର ମଦିନା ନିକଟରେ ଭୟାବହ ସଡ଼କ ଦୁର୍ଘଟଣାରେ ୪୨ ଜଣ ଭାରତୀୟ ତୀର୍ଥଯାତ୍ରୀଙ୍କ ମୃତ୍ୟୁ ହୋଇଛି । ଏହି ଦୁର୍ଘଟଣାରେ ଆଖି ବୁଜିଛନ୍ତି ଗୋଟିଏ ପରିବାରର ୧୮ ସଦସ୍ୟ । ବାପା, ପୁଅ ସହ ନାତି ଏମିତି ୩ ପିଢ଼ି ପ୍ରାଣ ହରାଇଛନ୍ତି ।

ଗୋଟିଏ ପରିବାରର ୧୮ ମୃତକଙ୍କ ମଧ୍ୟରେ ୯ ଛୁଆ ଥିବା ଜଣାପଡ଼ିଛି । ହାଇଦ୍ରାବାଦର ଏହି ପରିବାର ଶନିବାର ସନ୍ଧ୍ୟାରେ ଭାରତ ଫେରି ଆସିଥାଆନ୍ତେ । ହେଲେ ଫେରିବାର ୫ ଦିନ ପୂର୍ବରୁ ଆସିଛି ଦୁଃଖଦ ଖବର ।

ଏଥିସହ ପଢ଼ନ୍ତୁ: ସାଉଦିରେ ଜଳିଗଲା ବସ୍‌: ୪୨ ଭାରତୀୟ ମୃତ

ପରିବାରର ଜଣେ ସଦସ୍ୟ କହିଛନ୍ତି, "ମୋ ଭାଉଜ, ଦିଅର, ତିନି ଝିଅ ଓ ତାଙ୍କ ଛୁଆ ଉମରାହ ଯାଇଥିଲେ । ଉମରାହରୁ ମଦିନା ଫେରିବା ବେଳେ ରାତି ପ୍ରାୟ ସାଢ଼େ ଗୋଟାଏରେ ଦୁର୍ଘଟଣା ହେଲା, ବସଟି ସମ୍ପୂର୍ଣ୍ଣ ଜଳିଗଲା ।"

ଅନ୍ୟ ଜଣେ ସମ୍ପର୍କୀୟ ଆସିଫ୍ କହିଛନ୍ତି, "ଦୁର୍ଘଟଣା ପୂର୍ବରୁ ମୁଁ ଘର ଲୋକଙ୍କ ସହ ସମ୍ପର୍କରେ ଥିଲି । ଗୋଟିଏ ପରିବାରର ୧୮ ମୃତକଙ୍କ ମଧ୍ୟରେ ୯ ଜଣ ବୟସ୍କ ଓ ୯ ଜଣ ନାବାଳକ ରହିଥିଲେ । ଏହା ଆମ ପାଇଁ ବେଶ ଦୁଃଖଦାୟକ ।"

କେମିତି ଘଟିଲା ଦୁର୍ଘଟଣା ?

ସାଉଦି ଆରବ ବସ୍ ଦୁର୍ଘଟଣା ଓ ପରବର୍ତ୍ତୀ ନିଆଁରେ ମୃତ୍ୟୁବରଣ କରିଥିବା ୪୨ ଭାରତୀୟଙ୍କ ମଧ୍ୟରୁ ଅଧିକାଂଶ ହାଇଦ୍ରାବାଦର । ରିପୋର୍ଟ ଅନୁସାରେ, ଭାରତୀୟ ଯାଉଥିବା ବସ୍‌ଟି ମଦିନାରୁ ପ୍ରାୟ ୩୦ କିଲୋମିଟର ଦୂରରେ ଏକ ଡିଜେଲ୍ ଟ୍ୟାଙ୍କର୍ ସହ ଧକ୍କା ହୋଇଥିଲା । ବିଳମ୍ବିତ ରାତିରେ ଦୁର୍ଘଟଣା ବେଳେ ପ୍ରାୟ ସମସ୍ତେ ଯାତ୍ରୀ ଶୋଇଥିଲେ । ଫଳରେ ଦୁର୍ଘଟଣା ପରେ ନିଆଁ ଲାଗି ଯାଇଥିବା ବେଳେ କେହି ବାହାରକୁ ବାହାରି ପାରି ନଥିଲେ ।

ଏଥିସହ ପଢ଼ନ୍ତୁ: ଧରାପଡ଼ିଲା ଆତ୍ମଘାତୀ ଆତଙ୍କବାଦୀ ଉମରର ସହଯୋଗୀ; ବିସ୍ଫୋରଣ ପାଇଁ କରିଥିଲା ଟେକ୍ନୋଲୋଜିର ସହାୟତା

ସୋମବାର ହାଇଦ୍ରାବାଦ ସାଂସଦ ଅସଦୁଦ୍ଦିନ ଓୱେସି କହିଛନ୍ତି, "ସାଉଦି ଆରବରେ ଭାରତୀୟ ନାଗରିକଙ୍କ ସହ ଏକ ବଡ଼ ସଡ଼କ ଦୁର୍ଘଟଣା ଘଟିଛି । ମକ୍କାରୁ ମଦିନା ଯାଉଥିବା ଏକ ବସ୍ ମୁଫ୍ରିହାଟ ନିକଟରେ ଏକ ଡିଜେଲ ଟ୍ୟାଙ୍କର ସହିତ ଧକ୍କା ହେବା ଫଳରେ ଭାରତୀୟ ଉମରା ତୀର୍ଥଯାତ୍ରୀଙ୍କ ସମେତ ଅତି କମରେ ୪୨ ଜଣଙ୍କର ମୃତ୍ୟୁ ହୋଇଛି ।"