Videos
|
National

Liquor Death / ବିଷାକ୍ତ ପାଲଟିଲା ମଦ; ନିଶାଦ୍ରବ୍ୟ ପିଇ ୧୫ଜଣଙ୍କ ମୃତ୍ୟୁ, ୧୮୦ରୁ ଅଧିକ ହସ୍ପିଟାଲରେ ଭର୍ତ୍ତି

Debashree Debasmita Sahoo
Browse all articles by Debashree Debasmita Sahoo
·50 mins ago·2 min read
ବିଷାକ୍ତ ପାଲଟିଲା ମଦ; ନିଶାଦ୍ରବ୍ୟ ପିଇ ୧୫ଜଣଙ୍କ ମୃତ୍ୟୁ, ୧୮୦ରୁ ଅଧିକ ହସ୍ପିଟାଲରେ ଭର୍ତ୍ତି
Manipur Liquor Tragedy

Key Points

ମଦ ପିଇ ଚାଲିଗଲା ୧୫ଜଣଙ୍କ ଜୀବନ
୧୮୦ରୁ ଅଧିକ ହସ୍ପିଟାଲରେ ଭର୍ତ୍ତି
ଇମ୍ଫାଲ୍: ମଣିପୁରର ଚାନ୍ଦେଲ ଜିଲ୍ଲାରେ ନକଲି ମଦ ନେଲା ଜୀବନ । ଏଯାବତ୍ ଅତିକମରେ ୧୫ ଜଣଙ୍କର ମୃତ୍ୟୁ ଘଟିଥିବାବେଳେ ୧୮୦ରୁ ଅଧିକ ଲୋକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଗତ ୪୮ ଘଣ୍ଟା ମଧ୍ୟରେ ଏହି ମୃତ୍ୟୁ ପରେ, ଜିଲ୍ଲା ପ୍ରଶାସନ ଏକ ଜନସ୍ୱାସ୍ଥ୍ୟ ପରାମର୍ଶ ଜାରି କରି ଲୋକଙ୍କୁ ସତର୍କ ରହିବାକୁ ଅନୁରୋଧ କରିଛି । ଏହି ଘଟଣଆରେ ତଦନ୍ତ ଆରମ୍ଭ ହୋଇଛି ଏବଂ ମଦର ଉତ୍ସ ଖୋଜିବା ପାଇଁ ପ୍ରୟାସ ଚାଲିଛି ।

  • ୧୮ ନଭେମ୍ବରରୁ ୨୦ ତାରିଖ ମଧ୍ୟରେ ମୃତ୍ୟୁ
ପ୍ରାରମ୍ଭିକ ତଦନ୍ତରୁ ୮ଜଣ ମୃତକଙ୍କ ସମ୍ପର୍କରେ ଜଣାପଡ଼ିଛି, ସେମାନେ ହେଉଛନ୍ତି କିଶାନ ହରାଙ୍ଗବୁଙ୍ଗ ଅନାଲ (୩୨), ହରାଙ୍ଗବୁଙ୍ଗ ବେରୁଙ୍ଗ ଅନାଲ (୫୦), ହରାଙ୍ଗବୁଙ୍ଗ ମୋହରିଙ୍ଗ ଅନାଲ (୪୬), ଆରଡି ଅଙ୍ଗନହିରିଙ୍ଗ ଅନାଲ (୩୭), କିଆଇ ରାମତିଆଙ୍ଗ ଅନାଲ (୪୪), ଏନ.ଏଲ. ମୋଥାରହିଙ୍ଗ ଅନାଲ, ଟିଏସ ଆଶିଙ୍ଗ ଓ ଟିଏଲ ଲଭଲି ସାମିଲ । ପୋଲିସର ସୂଚନା ଅନୁଯାୟୀ, କିଛି ଲୋକ ନିଜ ଘରେ ମୃତ୍ୟୁବରଣ କରିଥିବାବେଳେ ଅନ୍ୟମାନେ ଡାକ୍ତରଖାନାକୁ ନେବା ବାଟରେ ଓ ଚକପିକାରୋଙ୍ଗର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ର (ସିଏଚସି)ରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିଲେ ।

  • ସୁଗାନୁରୁ ମଦ କିଣାଯାଇଥିଲା
ପରେ ଚାନ୍ଦେଲ ପୋଲିସ ସ୍ପଷ୍ଟ କରିଛି ଯେ ମୃତକଙ୍କ ଦ୍ୱାରା ପିଇଥିବା ମଦ କାକଚିଙ୍ଗ ଜିଲ୍ଲାର ସୁଗାନୁ ଅଞ୍ଚଳରୁ ଅଣାଯାଇଥିଲା । ଏହା ଚାନ୍ଦେଲ ଜିଲ୍ଲାରେ ତିଆରି ହେଉନଥିଲା । ପୋଲିସ ଅନୁଯାୟୀ, ରିପୋର୍ଟ ହୋଇଥିବା ମୃତ୍ୟୁ ମଧ୍ୟରୁ ୫ଜଣ ସୁଗାନୁ ଥାନା ଅଧୀନର । ଚାନ୍ଦେଲର ଡେପୁଟି କମିଶନର ଗୁରୁବାର ଦିନ ଏକ ସ୍ୱାସ୍ଥ୍ୟ ପରାମର୍ଶ ଜାରି କରିଛନ୍ତି । ପ୍ରଶାସନ କହିଛି ଯେ ମୃତ୍ୟୁର ସଠିକ୍ କାରଣ ଏପର୍ଯ୍ୟନ୍ତ ଡାକ୍ତରୀ ଏବଂ ବୈଜ୍ଞାନିକ ଭାବରେ ନିଶ୍ଚିତ ହୋଇନାହିଁ । ଏନେଇ ତଦନ୍ତ ଚାଲିଛି ।

ପଢନ୍ତୁ ଏହି ଖବର: ମଦ ବିକ୍ରି କରି କେଉଁ ରାଜ୍ୟ ପାଉଛି ଅଧିକ ରାଜସ୍ବ? ଆସନ୍ତୁ ଜାଣିବା

  • ଏହି ଲକ୍ଷଣ ଦେଖାଗଲେ ଡାକ୍ତରଖାନା ଯିବାକୁ ଅନୁରୋଧ
ସ୍ଥାନୀୟ ଭାବରେ ଉତ୍ପାଦିତ ମଦ କିମ୍ବା ସନ୍ଦେହଜନକ ଉତ୍ସରୁ କିଣାଯାଇଥିବା ମଦ୍ୟପାନ ଗ୍ରହଣ ନକରିବାକୁ ଲୋକଙ୍କୁ ପରାମର୍ଶ ଦିଆଯାଇଛି । ମଦ୍ୟପାନ କରିବା ପରେ ଯଦି କୌଣସି ବ୍ୟକ୍ତି ବାନ୍ତି, ପେଟ ଯନ୍ତ୍ରଣା, ମୁଣ୍ଡ ବିନ୍ଧା, ମୁଣ୍ଡ ବୁଲାଇବା, ଦୃଷ୍ଟି ଅସ୍ପଷ୍ଟ ହେବା କିମ୍ବା ନିଶ୍ୱାସ ନେବାରେ କଷ୍ଟ ହେବା ଭଳି ଲକ୍ଷଣ ଅନୁଭବ କରନ୍ତି, ତେବେ ତୁରନ୍ତ ଡାକ୍ତରୀ ପରାମର୍ଶ ନେବାକୁ ପରାମର୍ଶ ଦିଆଯାଇଛି ।

Argus News App

📱 Get Argus News App

✨
📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free:
  • ହସ୍ପିଟାଲରେ ପହଞ୍ଚିଲେ ମୁଖ୍ୟମନ୍ତ୍ରୀ
ମଣିପୁର ମୁଖ୍ୟମନ୍ତ୍ରୀ ୟୁମନାମ ଖେମଚାନ୍ଦ ସିଂହ ଗୁରୁବାର ଇମ୍ଫାଲର ଶିଜା ହସ୍ପିଟାଲ ଏବଂ ଗବେଷଣା ପ୍ରତିଷ୍ଠାନ ଓ ବାବିନା ହସ୍ପିଟାଲ ପରିଦର୍ଶନ କରିଥିଲେ । ସେଠାରେ ଭର୍ତ୍ତି ହୋଇଥିବା ରୋଗୀଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଥିଲେ ଏବଂ ଡାକ୍ତରଙ୍କ ସହ ସେମାନଙ୍କ ଚିକିତ୍ସାର ସ୍ଥିତି ବିଷୟରେ ଆଲୋଚନା କରିଥିଲେ । ମୁଖ୍ୟମନ୍ତ୍ରୀ ଏହି ଘଟଣାକୁ ଦୁର୍ଭାଗ୍ୟଜନକ ବୋଲି କହି ଅଭିଯୁକ୍ତମାନଙ୍କୁ ଚିହ୍ନଟ କରିବା ପାଇଁ ତଦନ୍ତ ନିର୍ଦ୍ଦେଶ ଦେଇଛନ୍ତି । ସେ କହିଛନ୍ତି ଯେ ଅପରାଧୀମାନଙ୍କୁ ଖୁବଶୀଘ୍ର ଗିରଫ କରାଯିବ । ବିଶେଷଜ୍ଞ ଡାକ୍ତର ଏବଂ ଆବଶ୍ୟକୀୟ ଔଷଧ ସହିତ ଏକ ଡାକ୍ତରୀ ଦଳ ମଧ୍ୟ ଚାନ୍ଦେଲ ଜିଲ୍ଲାକୁ ପଠାଯାଇଛି ।