ରାୟପୁର: ମାଓ ଶିବିରରେ ପୁଳା ପୁଳା ସୁନା । ଜଙ୍ଗଲରେ ମାଓବାଦୀ ଲୁଚାଇ ରଖିଥିଲେ ସୁନା ବିସ୍କୁଟ୍ । ମାଓ ଶିବିରରୁ ୭.୨ କେଜି ସୁନା ମିଳିଛି । ଯାହାର ବଜାର ମୂଲ୍ୟ ପାଖାପାଖି ୧୧.୧୬ କୋଟି ହେବ ବୋଲି ଜଣାପଡ଼ିଛି ।

ମାର୍ଚ୍ଚ ୩୧ ତାରିଖରେ ଛତିଶଗଡ଼ ବିଜାପୁରର ମାଓ ଶିବିର ଠାବ କରିଥିଲେ ସୁରକ୍ଷାକର୍ମୀ । ସର୍ଚ୍ଚ ଅପରେସନ୍ ବେଳେ ଜଙ୍ଗଲରେ ଥିବା ମାଓ ଶିବିରରୁ ବିପୁଳ ସୁନା ବିସ୍କୁଟ୍ ଜବତ କରାଯାଇଛି । ଜଙ୍ଗଲରେ ସୁନା ବିସ୍କୁଟ୍ ରଖା ଯାଇଥିବା ନେଇ ଆତ୍ମସମର୍ପଣ କରିଥିବା ମାଓବାଦୀ ପୋଲିସକୁ ସୂଚନା ଦେଇଥିଲେ ।

ଏଥିସହ ପଢ଼ନ୍ତୁ: ମାଓ ବିରୋଧୀ ଲଢ଼େଇରେ ମିଳିଛି ସଫଳତା,୨୭ ମାଓବାଦୀଙ୍କୁ ନିପାତ କରାଯାଇଛି

ପୋଲିସ ଅନୁସାରେ, ଆତ୍ମସମର୍ପଣ କରିଥିବା ମାଓବାଦୀ ରୂପେଶ ଏନେଇ ସୂଚନା ଦେଇଥିଲା । ଯାହାପରେ ପୋଲିସ ସର୍ଚ୍ଚ ଅପରେସନ୍ ବେଳେ ୭.୨ କେଜି ସୁନା ଠାବ କରିଛି । ସୁନା ସହ ପୋଲିସକୁ ମିଳିଛି ବିପୁଳ ଟଙ୍କା । ଏସବୁ ମାଓ କମାଣ୍ଡର ପାପାରାଓ ବୋଲି ଜଣାପଡ଼ିଛି ।

ସୁନାରେ ସ୍ଵିସ୍ ମାର୍କିଂ

ତେବେ ଜବତ ହୋଇଥିବା ୭.୨ କେଜି ସୁନା କେଉଁଠୁ ଆସିଲା ? ସୁନାର ଶୁଦ୍ଧତା କେତେ ? ତାହା ତଦନ୍ତ ପରେ ଜଣାପଡ଼ିବ ବୋଲି ପୋଲିସ କହିଛି । ପୋଲିସ ଠାବ କରିଥିବା ସୁନା ବିସ୍କୁଟ୍‌ରେ ସ୍ଵିସ୍ ମାର୍କିଂ ରହିଛି । ଏହି ମାର୍କିଂକୁ ବୈଶ୍ଵିକ ସ୍ତରରେ ସୁନା ୯୯୯.୯ ପ୍ରତିଶତ ଶୁଦ୍ଧ ବୋଲି ଦର୍ଶାଏ । ୨୪ କ୍ୟାରେଟ୍ ସୁନାରେ ଏଭଳି ମାର୍କିଂ ସହ ୟୁନିକ୍ ସିରିଏଲ୍ ନମ୍ବର ରହିଥାଏ ।

ବସ୍ତର ରେଞ୍ଜ ଆଇଜି ସୁନ୍ଦରରାଜ କହିଛନ୍ତି, "ସୁନାରେ ଥିବା ସ୍ଵିସ୍ ମାର୍କ ଜୁଏଲର୍ସ କରିଥାଇ ପାରନ୍ତି । ଏନେଇ ଆମେ ମାଓବାଦୀଙ୍କୁ ପଚରାଉଚରା କରୁଛୁ । ସୁନା କେଉଁଠୁ ଆସିଛି ସେ ନେଇ ତଦନ୍ତ ଚାଲିଛି । ପୋଲିସ ସବୁ ଦିଗରୁ ଛାନଭିନ୍ ଚଳାଇଛି ।"

ସୁନା ସହ ବିପୁଳ ଟଙ୍କା ଜବତ

ଜଙ୍ଗଲରେ ମାଓବାଦୀ ଆହୁରି ଟଙ୍କା ଓ ଅନ୍ୟ ସାମଗ୍ରୀ ରଖିଥିବା ସନ୍ଦେହକରାଯାଉଛି । ଜଣେ ଗୁଇନ୍ଦା ଅଧିକାରୀ କହିଛନ୍ତି, "ଏକାଧିକ ମାଓବାଦୀ ବିନା ଅସ୍ତ୍ରରେ ଆତ୍ମସମର୍ପଣ କରିଛନ୍ତି । ଆଶଙ୍କା କରୁଛି ଏବେ ବି ଜଙ୍ଗଲରେ ବନ୍ଧୁକ, ଗୁଳିଗୋଳା ସହ ଅନ୍ୟ ସାମଗ୍ରୀ ଲୁଚାଇ ରଖିଛନ୍ତି ।"

ଏଥିସହ ପଢ଼ନ୍ତୁ: ନକ୍ସଲମୁକ୍ତ ଓଡ଼ିଶା ପାଇଁ ନୂଆ ରୋଡମ୍ୟାପ୍, ମୁଣ୍ଡଜାମିନ ପୁରସ୍କାର ରାଶି ଅତ୍ୟଧିକ ବୃଦ୍ଧି

ଏହା ପୂର୍ବରୁ ମାର୍ଚ୍ଚ ୧୧ ତାରିଖରେ ବିଜାପୁରରେ ମାଓବାଦୀଙ୍କ ଠାରୁ ୧ କେଜି ସୁନା ଜବତ ହୋଇଥିଲା । ମାଓ ବିରୋଧୀ ଅପରେସନ୍ ବେଳେ ୧ କେଜି ସୁନା ସହ ବନ୍ଧୁକ ଓ ଅନ୍ୟ ସାମଗ୍ରୀ ମିଳିଥିଲା ।

ଭାରତ ଏବେ ମାଓ ମୁକ୍ତ

ସୋମବାର ସଂସଦରେ ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହ ଭାରତକୁ ମାଓ ମୁକ୍ତ ଘୋଷଣା କରିଛନ୍ତି । ମାର୍ଚ୍ଚ ୩୧ରେ ଭାରତକୁ ମାଓ ମୁକ୍ତ କରିବା ଲାଗି ସରକାର ଧାର୍ଯ୍ୟ କରିଥିବା ତାରିଖ ପୂର୍ବରୁ ସ୍ଵରାଷ୍ଟ୍ର ମନ୍ତ୍ରୀ ସଂସଦରେ ଏହି ଘୋଷଣା କରିଛନ୍ତି । ଗତ ୩ ବର୍ଷରେ ୪, ୮୩୯ ମାଓବାଦୀ ଆତ୍ମସମର୍ପଣ କରିଥିବା ବେଳେ ୭୦୬ ଜଣ ନିହତ ହୋଇଛନ୍ତି । ୨୨୧୮ ଜଣଙ୍କୁ ଗିରଫ କରାଯାଇ ଜେଲ୍ ପଠା ଯାଇଛି ।