ତାମିଲନାଡ଼ୁର ୨୩୪ଟି ବିଧାନସଭା ଆସନ ପାଇଁ ଭୋଟ୍ ଗଣତି ଜାରି ରହିଛି । ପ୍ରାରମ୍ଭିକ ଟ୍ରେଣ୍ଡ ଅନୁସାରେ ଅଭିନେତାରୁ ରାଜନେତା ସାଜିଥିବା ଥାଲ୍ଲାପତି ବିଜୟଙ୍କ ଦଳ TVKର ଦବଦବା ଦେଖିବାକୁ ମିଳୁଛି । ଦିନ ୩ଟା ସୁଦ୍ଧା ଆସିଥିବା ଟ୍ରେଣ୍ଡରେ TVK ୧୦୫ ଆସନରେ ଆଗୁଆ ରହିଛି ।

୨୩୪ ସଦସ୍ୟ ବିଶିଷ୍ଟ ବିଧାନସଭା ଆସନରୁ ଡିଏମକେ ୧୬୪ ଆସନରେ ପ୍ରତିଦ୍ୱନ୍ଦ୍ୱିତା କରିଥିଲା, ଯେତେବେଳେ ଏହାର ମୁଖ୍ୟ ସହଯୋଗୀ କଂଗ୍ରେସ ୨୮ଟି ଆସନରେ ପ୍ରତିଦ୍ୱନ୍ଦ୍ୱିତା କରିଥିଲା । ଅବଶିଷ୍ଟ ଆସନରେ ଡିଏମକେ ମେଣ୍ଟର ଅନ୍ୟ ସହଯୋଗୀ ଦଳ ନିର୍ବାଚନ ଲଢ଼ୁଥିଲେ ।

ତେବେ ତାମିଲନାଡ଼ୁ ନିର୍ବାଚନରେ ଡିଏମ୍‌କେକୁ ବଡ଼ ଝଟକା ଲାଗିଛି । ତାମିଲନାଡ଼ୁ ମୁଖ୍ୟମନ୍ତ୍ରୀ ଏମ୍‌କେ ଷ୍ଟାଲିନ୍‌ ନିର୍ବାଚନ ହାରିଛନ୍ତି । ସେ କୋଲାଥୁରରୁ ବିଜୟଙ୍କ TVK ପ୍ରାର୍ଥୀ ଭି.ଏସ୍‌ ବାବୁଙ୍କଠାରୁ ପରାଜୟ ବରଣ କରିଛନ୍ତି । ସେହିପରି ଏମ୍‌ କେ ଷ୍ଟାଲିନଙ୍କ ପୁଅ ଉଦୟାନିଧି ଷ୍ଟାଲିନ ଚେପୌକ-ଥିରୁଭାଲ୍ଲିକେନିରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି । ସେ ୧୧ ରାଉଣ୍ଡ ଗଣତି ସୁଦ୍ଧା ୪୩୧୯ ଭୋଟ୍‌ରେ ଆଗୁଆ ଅଛନ୍ତି ।

ବିଜୟ ଡିଏମକେର ଖେଳକୁ ନଷ୍ଟ କରିଛନ୍ତି

ତାମିଲନାଡୁରେ ବର୍ତ୍ତମାନ ବଡ଼ ପରିବର୍ତ୍ତନ ଦେଖିବାକୁ ମିଳୁଛି । ଅଭିନେତା ଥାଲ୍ଲାପତି ବିଜୟଙ୍କ ଦଳ ଟିଭିକେ ଏକ ଦୃଢ଼ ନେତୃତ୍ୱ ସ୍ଥାପନ କରିଛି, ଯାହା ରାଜ୍ୟ ରାଜନୀତିରେ ହଇଚଇ ସୃଷ୍ଟି କରିଛି । ପ୍ରାରମ୍ଭିକ ଟ୍ରେଣ୍ଡ ଅନୁସାରେ ଟିଭିକେ ୧୦୬ଟି ଆସନରେ ଆଗୁଆ ଥିବା ବେଳେ ଶାସକ ଡିଏମକେ ତୃତୀୟ ସ୍ଥାନକୁ ଖସି ଯାଉଥିବା ପରି ମନେ ହେଉଛି । ଡିଏମକେ ମାତ୍ର ୭୨ଟି ଆସନରେ ଆଗୁଆ ଥିବା ବେଳେ ଏଆଇଏଡିଏମକେ ୫୬ଟି ଆସନରେ ଆଗୁଆ ଅଛି । ଏହା ଉଲ୍ଲେଖନୀୟ ଯେ ୨୩ ଏପ୍ରିଲରେ ତାମିଲନାଡୁରେ ଗୋଟିଏ ପର୍ଯ୍ୟାୟ ମତଦାନ ହୋଇଥିଲା ।