ପଶ୍ଚିମବଙ୍ଗର ତିନୋଟି ସ୍ଥାନରେ ନରେନ୍ଦ୍ର ମୋଦିଙ୍କ ମାରାଥନ ପ୍ରଚାର । ଟିଏମସି ସରକାର ବିରୋଧରେ ରଣହୁଙ୍କାର । ବଙ୍ଗଳାବାସୀଙ୍କୁ ୬ ଗ୍ୟାରେଣ୍ଟି ସହ ପରିବର୍ତ୍ତନର ଆହ୍ବାନ ଦେଲେ ମୋଦି । କହିଲେ, ମେ ୪ରୁ ଟିଏମସିର ଭୟ ନୁହେଁ, ଚାଲିବ ବିଜେପିର ଭରସା । ସେପଟେ କେରଳମ, ଆସାମ ଏବଂ ପୁଡୁଚେରୀରେ ୧୮୯୯ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ୍ ହୋଇଛି । ସନ୍ଧ୍ୟା ୫ଟା ସୁଦ୍ଧା ଆସାମରେ ୮୪.୪୨ ପ୍ରତିଶତ, କେରଳମ୍‌ରେ ୭୫.୦୧ ପ୍ରତିଶତ ଓ ପୁଡୁଚେରୀରେ ୮୬.୯୨ ପ୍ରତିଶତ ମତଦାନ ରେକର୍ଡ କରାଯାଇଛି ।

ପଶ୍ଚିମବଙ୍ଗରେ ଟିଏମସି ସରକାର ବିରୋଧରେ ପ୍ରଧାନମନ୍ତ୍ରୀ ମୋଦିଙ୍କ ରଣହୁଙ୍କାର । ଗୋଟିଏ ଦିନରେ ତିନିଟି ସ୍ଥାନରେ ମାରାଥନ ପ୍ରଚାର । ହଳଦିଆ, ଆସାନସୋଲ ଓ ସୁରୀରେ ବିଶାଳ ଜନସଭାକୁ ସମ୍ବୋଧନ କରି ଟିଏମସି ମୁକ୍ତ ବଙ୍ଗଳା ପାଇଁ ଆହ୍ବାନ ଦେଇଛନ୍ତି । ମେ' ୪ରେ କାନୁନରାଜ ସ୍ଥାପନ ସହ ପ୍ରତି ଗୁଣ୍ଡାଗର୍ଦ୍ଦିର ହିସାବ କରାଯିବ । ଆଗାମୀ ଦିନରେ ଟିଏମସିର ଭୟ ନୁହେଁ, ବିଜେପିର ଭରସା ଚାଲିବ ବୋଲି ଦୃଢୋକ୍ତି କରିଛନ୍ତି ମୋଦି ।

ଏଥିସହ ବଙ୍ଗଳାବାସୀଙ୍କୁ '୬ଟି ଗ୍ୟାରେଣ୍ଟି' ଦେଇ ରାଜ୍ୟରେ ପରିବର୍ତ୍ତନର ଆହ୍ୱାନ ଦେଇଛନ୍ତି । ଭୟ ମୁକ୍ତ ବଙ୍ଗଳା ଓ ବିଶ୍ୱାସର ଶାସନ । ଜନତାଙ୍କ ନିକଟରେ ଉତ୍ତରଦାୟୀ ରହିବ ସରକାରୀ ପ୍ରଶାସନ । ପ୍ରତିଟି ଦୁର୍ନୀତି ଓ ମହିଳାଙ୍କ ଉପରେ ହୋଇଥିବା ଅନ୍ୟାୟର ଫାଇଲ୍ ପୁଣି ଖୋଲିବ । ଦୁର୍ନୀତିଖୋରଙ୍କ ପାଇଁ ଜେଲ୍ ହେବ ସ୍ଥାୟୀ ଠିକଣା, କେହି ବର୍ତ୍ତିବେନି । ସେହିପରି ଶରଣାର୍ଥୀଙ୍କୁ ଅଧିକାର, ଅନୁପ୍ରବେଶକାରୀଙ୍କୁ ବାହାର କରିବ ବିଜେପି । ସରକାର ଗଠନ ହେବା ମାତ୍ରେ ୭ମ ବେତନ କମିଶନ ଲାଗୁ କରିବାକୁ ପ୍ରତିଶ୍ରୁତି ଦେଇଛନ୍ତି ପ୍ରଧାନମନ୍ତ୍ରୀ ।

ଗତ ୧୫ ବର୍ଷ ଧରି ଟିଏମସି ସରକାର ପଶ୍ଚିମବଙ୍ଗରେ ଆତଙ୍କରାଜ ସୃଷ୍ଟି କରିଛି । ନିକଟରେ ମାଲଦାରେ ହୋଇଥିବା ହିଂସା ପରେ କେନ୍ଦ୍ରୀୟ ସୁରକ୍ଷାକର୍ମୀଙ୍କୁ ହଟାଇବାକୁ ଟିଏମସି ସରକାର ଦାବି ଉଠାଉଛନ୍ତି । ଆଗାମୀ ଦିନରେ ପଶ୍ଚିମବଙ୍ଗର ଦେଶପ୍ରେମୀ ଜନତା ଏହାର ଉଚିତ ଜବାବ ରଖିବେ ବୋଲି କହିଛନ୍ତି ମୋଦି ।

ସେପଟେ କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ କେରଳମ, ଆସାମ ଏବଂ ପୁଡୁଚେରୀରେ ଶେଷ ହୋଇଛି ନିର୍ବାଚନ । ଆସାମରେ ୧୨୬, କେରଳର ୧୪୦ ଓ ପୁଡୁଚେରୀରେ ୩୦ ବିଧାନସଭା ଆସନରେ ଭୋଟିଂ ପାଇଁ ଲମ୍ବା ଲାଇନ ଦେଖିବାକୁ ମିଳିଥିଲା । ଏଥିସହ ୧୮୯୯ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ୍ ହୋଇଛି । ତୃତୀୟ ଥର ଜିତି ଆସାମରେ ହାଟ୍ରିକ୍ କରିବା ଲକ୍ଷ୍ୟରେ ରହିଛି ବିଜେପି । ଅନ୍ୟପକ୍ଷରେ କେରଳମରେ ବି CPM ନେତୃତ୍ବାଧୀନ LDF ମେଣ୍ଟର ହାଟ୍ରିକ ଲକ୍ଷ୍ୟ ରଖିଛି । ପୁଡୁଚେରୀରେ ମୁଖ୍ୟମନ୍ତ୍ରୀ ଏନ୍. ରଙ୍ଗାସାମୀଙ୍କ ନେତୃତ୍ବରେ ଏନଡିଏ ପୁଣିଥରେ ଏନଡିଏ ଶାସନ କ୍ଷମତାକୁ ଫେରିପାରେ । ଆସନ୍ତା ମେ' ୪ରେ ଗଣତି ପରେ ସ୍ପଷ୍ଟ ହେବ କିଏ ମାରିବ ବାଜି ।