NEET Paper Leak / ନିଟ୍‌ ପେପର୍‌ ଲିକ୍‌: CBI କୁ ବଡ଼ ସଫଳତା, ମାଷ୍ଟରମାଇଣ୍ଡ ଗିରଫ

NEET-UG 2026 ପେପର୍ ଲିକ୍ ମାମଲାରେ ଏକ ବଡ଼ ସଫଳତା ହାସଲ କରିଛି ସିବିଆଇ । CBI ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛି । ଅଭିଯୁକ୍ତ ଜଣଙ୍କ ହେଉଛନ୍ତି NTA ପରୀକ୍ଷା ପ୍ରକ୍ରିୟାରେ ସାମିଲ ଥିବା ରସାୟନ ବିଜ୍ଞାନ ଅଧ୍ୟାପକ P.V. କୁଲକର୍ଣ୍ଣି । CBI ତଦନ୍ତରେ ଏକ ଚାଞ୍ଚଲ୍ୟକର ଖୁଲାସା ହୋଇଛି ଯେ ମୁଖ୍ୟ ଅଭିଯୁକ୍ତ, P.V. କୁଲକର୍ଣ୍ଣି ପୁଣେର ଜଣେ ରସାୟନ ବିଜ୍ଞାନ ଅଧ୍ୟାପକ । ସେ ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ପକ୍ଷରୁ ପରୀକ୍ଷା ପ୍ରକ୍ରିୟାରେ ସାମିଲ ଥିଲେ ।

କୁଲକର୍ଣ୍ଣି ଲାତୁରର ଦୟାନନ୍ଦ କଲେଜରେ ରସାୟନ ବିଜ୍ଞାନ ପ୍ରଫେସର ଭାବରେ କାର୍ଯ୍ୟ କରୁଥିଲେ । ସେ ବର୍ତ୍ତମାନ ଅବସରପ୍ରାପ୍ତ । ଅଭିଯୁକ୍ତ ମନୀଷା ୱାଘମାରେଙ୍କୁ ପଚରାଉଚରା କରିବା ପରେ CBI କୁଲକର୍ଣ୍ଣିଙ୍କୁ ଟ୍ରାକ୍ କରିଥିଲା । ଦୀର୍ଘ ପଚରାଉଚରା ପରେ ତାଙ୍କୁ ଗିରଫ କରାଯାଇଥିଲା ।

ତଦନ୍ତ ସଂସ୍ଥା ଅନୁଯାୟୀ, ଏପ୍ରିଲ ୨୦୨୬ର ଶେଷ ସପ୍ତାହରେ କୁଲକର୍ଣ୍ଣି, ଅନ୍ୟ ଜଣେ ଅଭିଯୁକ୍ତ ମନୀଷା ୱାଘମାରେଙ୍କ ସହାୟତାରେ ଛାତ୍ରମାନଙ୍କୁ ଏକାଠି କରିଥିଲେ ଏବଂ ପୁଣେରେ ତାଙ୍କ ଘରେ ସ୍ୱତନ୍ତ୍ର କୋଚିଂ କ୍ଲାସ କରିଥିଲେ । ମନୀଷା ୱାଘମାରେଙ୍କୁ ପୂର୍ବରୁ ୧୪ ମେ' ୨୦୨୬ରେ CBI ଗିରଫ କରିଥିଲା ।

ଅଧିକ ପଢ଼ନ୍ତୁ: ଛାତ୍ରଛାତ୍ରୀଙ୍କ ପରିଶ୍ରମ ପ୍ରତି ସରକାର ସମ୍ବେଦନଶୀଳ, ଆସନ୍ତା ବର୍ଷଠୁ CBT ମୋଡ୍‌ରେ ହେବ ନିଟ୍‌ ପରୀକ୍ଷା

ଏହି କ୍ଲାସ୍‌ଗୁଡ଼ିକରେ ସେ ଛାତ୍ରଛାତ୍ରୀମାନଙ୍କୁ ପ୍ରଶ୍ନ, ସେମାନଙ୍କର ବିକଳ୍ପ ଏବଂ ସଠିକ୍ ଉତ୍ତର କହୁଥିଲେ । ଛାତ୍ରମାନେ ଏହି ପ୍ରଶ୍ନଗୁଡ଼ିକୁ ସେମାନଙ୍କର ନୋଟବୁକରେ ଲେଖିଥିଲେ । ପରେ ଏକ ତଦନ୍ତରୁ ଜଣାପଡିଛି ଯେ ସମାନ ପ୍ରଶ୍ନଗୁଡ଼ିକ ୩ ମେ' ୨୦୨୬ରେ ଅନୁଷ୍ଠିତ ପ୍ରକୃତ NEET-UG ପରୀକ୍ଷା ପ୍ରଶ୍ନ ସହିତ ମେଳ ଖାଉଥିଲା ।
ଗତ ୨୪ ଘଣ୍ଟା ମଧ୍ୟରେ CBI ଦେଶର ବିଭିନ୍ନ ସ୍ଥାନରେ ଚଢାଉ କରିଛି । ଅନେକ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ, ଇଲେକ୍ଟ୍ରୋନିକ୍ ଡିଭାଇସ୍ ଏବଂ ମୋବାଇଲ୍ ଫୋନ୍ ଜବତ କରାଯାଇଛି । ଏହି ଜବତ ସାମଗ୍ରୀର ଫୋରେନସିକ୍ ଏବଂ ବୈଷୟିକ ତଦନ୍ତ ଜାରି ରହିଛି ।

ଏହି ମାମଲାରେ ଜୟପୁର, ଗୁରୁଗ୍ରାମ, ନାସିକ୍, ପୁଣେ ଏବଂ ଅହଲ୍ୟାନଗରରୁ ମୋଟ ସାତ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ଏହି ଅଭିଯୁକ୍ତମାନଙ୍କ ମଧ୍ୟରୁ ପାଞ୍ଚ ଜଣଙ୍କୁ କୋର୍ଟରେ ହାଜର କରାଯାଇ ସାତ ଦିନିଆ ରିମାଣ୍ଡରେ ପଠାଯାଇଛି । ଗୁରୁବାର ଗିରଫ ହୋଇଥିବା ଅନ୍ୟ ଦୁଇ ଅଭିଯୁକ୍ତଙ୍କୁ ଟ୍ରାଞ୍ଜିଟ୍ ରିମାଣ୍ଡ ପାଇଁ ପୁଣେ କୋର୍ଟରେ ହାଜର କରାଯାଉଛି ଏବଂ ସେମାନଙ୍କୁ ଦିଲ୍ଲୀ ଅଣାଯିବ ।