ଆସନ୍ତାକାଲି ନିଟ୍ ୟୁଜି ପୁନଃପରୀକ୍ଷା । ସାରା ଦେଶରେ ୫ ହଜାରରୁ ଅଧିକ ସେଣ୍ଟରରେ ପରୀକ୍ଷା ଦେବେ ୨୩ ଲକ୍ଷ ପରୀକ୍ଷାର୍ଥୀ । ଓଡ଼ିଶାର ମୋଟ ୧୩୨ଟି ପରୀକ୍ଷା କେନ୍ଦ୍ର ପ୍ରସ୍ତୁତ । ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ସହ CCTV ନଜରରେ ସବୁ ପରୀକ୍ଷା କେନ୍ଦ୍ର । ସୁରକ୍ଷାକୁ ଦୃଷ୍ଟିରେ ରଖି ପରୀକ୍ଷା ପୂର୍ବରୁ ସାରା ଦେଶରେ ହୋଇଛି ମକ୍ ଡ୍ରିଲ୍ । ଏଥିରେ ଦୁଇ ଲକ୍ଷ ୫୦ ହଜାରରୁ ଅଧିକ ସୁରକ୍ଷା କର୍ମୀ ମୁତୟନ ହୋଇଛନ୍ତି ।

ସେପଟେ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ସହ ଜଡ଼ିତ ଏହି ପରୀକ୍ଷାକୁ ସମ୍ପୂର୍ଣ୍ଣ ସ୍ୱଚ୍ଛ ଏବଂ ନିରପେକ୍ଷ କରିବା ପାଇଁ ଏଥର ସରକାର ଅଣ୍ଟା ଭିଡ଼ିଛନ୍ତି । ପରୀକ୍ଷା ହଲ୍‌ରେ କେମିତି ହେବନି କୌଣସି ହେରଫେର୍, ପ୍ରଶ୍ନପତ୍ର ଲିକ୍ ରୋକିବାକୁ ସ୍ପେଶାଲ୍ ପ୍ଲାନ୍ କରିଛନ୍ତି ସରକାର । ନିଟ୍ ପରୀକ୍ଷାରେ କୌଣସି ପ୍ରକାର ତ୍ରୁଟି କିମ୍ବା ଜାଲିଆତିକୁ ବରଦାସ୍ତ କରାଯିବ ନାହିଁ । ଏଥିପାଇଁ କେନ୍ଦ୍ର ଶିକ୍ଷା ମନ୍ତ୍ରଣାଳୟ ଏବଂ ଜାତୀୟ ପରୀକ୍ଷା ସଂସ୍ଥା ପକ୍ଷରୁ ହୋଇଛି ବ୍ୟାପକ ପ୍ରସ୍ତୁତି । ପ୍ରଶ୍ନପତ୍ର ସୁରକ୍ଷା ପାଇଁ ଡିଜିଟାଲ୍ ଲକ୍ ଏବଂ ପରୀକ୍ଷା ହଲ୍‌ରେ ମୋବାଇଲ୍ ସିଗନାଲ୍ ଜାମ୍ କରିବାକୁ ଲାଗିଛି ହାଇ-ପାୱାର୍ ଜାମର୍ । ପରୀକ୍ଷାରେ କୌଣସି ଅନିୟମିତତା କଲେ କଠୋର ଜେଲ୍ ଦଣ୍ଡ ଏବଂ ଜରିମାନା ଲାଗିବ ।

ଓଡ଼ିଶାରେ ଚଳିତ ବର୍ଷ ନିଟ୍ ପରୀକ୍ଷା ପାଇଁ ମୋଟ ୧୩୨ଟି ପରୀକ୍ଷା କେନ୍ଦ୍ର ପ୍ରସ୍ତୁତ କରାଯାଇଛି। ଓଡ଼ିଶା ପୋଲିସ ଏବଂ ପ୍ରଶାସନ ପକ୍ଷରୁ ସମସ୍ତ ୧୩୨ଟି କେନ୍ଦ୍ରରେ ତ୍ରି-ସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଯାହା ଦ୍ୱାରା ପରୀକ୍ଷା ସମ୍ପୂର୍ଣ୍ଣ ସ୍ୱଚ୍ଛ ଓ ନିରପେକ୍ଷ ଭାବେ ଶେଷ ହୋଇପାରିବ। ପ୍ରଶ୍ନପତ୍ର ଓ OMR ସିଟ୍‌ର ସୁରକ୍ଷିତ ପରିବହନ ଏବଂ ଷ୍ଟ୍ରଙ୍ଗ ରୁମ୍ ବ୍ୟବସ୍ଥା ପାଇଁ ମଧ୍ୟ ଆବଶ୍ୟକ ପଦକ୍ଷେପ ନିଆଯାଇଛି। ପ୍ରତ୍ୟେକ ପରୀକ୍ଷା କେନ୍ଦ୍ରରେ ଡ୍ୟୁଟି ମାଜିଷ୍ଟ୍ରେଟ ମଧ୍ୟ ରହିବେ । କଡା ସୁରକ୍ଷା ବଳୟ ମଧ୍ୟରେ ପ୍ରଶ୍ନପତ୍ର ଅଣାଯିବ ଓ ଉତ୍ତର ଖାତା ନିଆଯିବ । ଏନେଇ ପ୍ରଶାସନ ପକ୍ଷରୁ ମକ ଡ୍ରିଲ ମଧ୍ୟ କରାଯାଇଛି । ଟ୍ରାଫିକ ମ୍ୟାନେଜମେଣ୍ଟ, କ୍ରାଉଡ କଣ୍ଟ୍ରୋଲ ପେରିଫେରିଆଲ ସିକ୍ୟୁରିଟି, ବ୍ଲକିଂ, ଚେକିଂ ପାଇଁ ମୁତୟନ ହୋଇଛନ୍ତି ବ୍ୟାପକ ଫୋର୍ସ ।

ସେପଟେ ଛାତ୍ରଛାତ୍ରୀମାନେ ପରୀକ୍ଷା କେନ୍ଦ୍ରକୁ ଯିବା ପାଇଁ ନିଶୁଳ୍କ ବସ୍‌ ସେବା ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଇଛି । ପରୀକ୍ଷାର୍ଥୀମାନେ ନିଜର ଆଡମିଟ୍ କାର୍ଡ ଦେଖାଇ ଏହି ସୁବିଧାର ଲାଭ ଉଠାଇ ପାରିବେ ।