288 Indians Missing / ନେପାଳରେ ପ୍ରଳୟଙ୍କରୀ ବନ୍ୟା, ୨୮୮ ଭାରତୀୟ ନିଖୋଜ...୨୧ ଉଦ୍ଧାର

ନେପାଳରେ ଭୟଙ୍କର ବନ୍ୟା ଓ ଭୂସ୍ଖଳନ ପରେ ସ୍ଥିତି ଭୟାବହ ହୋଇପଡ଼ିଛି । ଆଉ ଏହାରି ମଧ୍ୟରେ ଚିନ୍ତା ବଢ଼ାଇଛି ଭାରତୀୟଙ୍କ ନିଖୋଜ ଖବର । ବର୍ତ୍ତମାନ ସୁଦ୍ଧା ୨୮୮ ଜଣ ଭାରତୀୟ ନିଖୋଜ ଥିବା ସୂଚନା ମିଳିଛି । ନିଖୋଜ ଭାରତୀୟମାନଙ୍କୁ ଖୋଜିବା ପାଇଁ ଜୋରଦାର ରେସ୍କ୍ୟୁ ଅପରେସନ୍ ଚାଲିଛି । ଏପର୍ଯ୍ୟନ୍ତ ୨୧ ଜଣ ଭାରତୀୟଙ୍କୁ ଉଦ୍ଧାର କରାଯାଇଛି ।

ଗୁରୁବାର, ଅଗଷ୍ଟ ୨୭ ତାରିଖରେ ବିଦେଶ ମନ୍ତ୍ରଣାଳୟ ପକ୍ଷରୁ ରଣଧୀର ଜୟସ୍ବାଲ୍ ଏନେଇ ସୂଚନା ଦେଇଛନ୍ତି । ସେ କହିଛନ୍ତି ଯେ କୈଳାସ ମାନସରୋବର ଯାତ୍ରାରେ ଯାଇଥିବା ଅନେକ ଭାରତୀୟ ଏବେ ଚୀନ ପଟେ ଫସି ରହିଛନ୍ତି । ପ୍ରାୟ ୨୦୦ ଭାରତୀୟ ନାଗରିକ ସହାୟତା ପାଇଁ ଅନୁରୋଧ କରିଛନ୍ତି । ଚୀନରେ ଥିବା ଭାରତୀୟ ମିଶନ୍ ସ୍ଥାନୀୟ ପ୍ରଶାସନ ସହ ମିଶି ସେମାନଙ୍କୁ ଉଦ୍ଧାର କରିବା ଦିଗରେ କାମ କରୁଛି । ଈଶା ଫାଉଣ୍ଡେସନର କିଛି ସଦସ୍ୟ ମଧ୍ୟ ସେଠାରେ ଫସିଥିବା ଜଣାପଡ଼ିଛି ।

କେଉଁଠି ଫସିଛନ୍ତି ୨୮୮ ଭାରତୀୟ ?

ବିଦେଶ ମନ୍ତ୍ରଣାଳୟ ଅନୁସାରେ, ନିଖୋଜ ଭାରତୀୟଙ୍କ ମଧ୍ୟରେ ୭୩ ଜଣ ତ୍ରିଶୁଳୀ-୧ ପାୱାର ପ୍ରୋଜେକ୍ଟରେ କାମ କରୁଥିଲେ। ଏହାଛଡ଼ା ତାମିଲନାଡୁର ୩୭ ଓ ୪୯ ଜଣଙ୍କର ଦୁଇଟି ଅଲଗା ଗ୍ରୁପ୍ କୈଳାସ ମାନସରୋବର ଯାତ୍ରାରେ ଯାଇଥିଲେ ।

ପଶ୍ଚିମବଙ୍ଗର ୩୨ ଜଣ ଭାରତୀୟ ରସୁୱା ଜିଲ୍ଲାର ତିମୁରେ ଅଞ୍ଚଳରେ ଫସିଥିବା ସୂଚନା ମିଳିଛି । ଏହା ସହିତ ବିଭିନ୍ନ ରାଜ୍ୟର ୬୧ ଜଣ ଏବଂ କେରଳର ୩୩ ଜଣଙ୍କୁ ନେଇ ଆଉ ଦୁଇଟି ବଡ଼ ଗ୍ରୁପ୍ ରହିଛି । ଏହି ପାଞ୍ଚଟି ବଡ଼ ଗ୍ରୁପ୍‌ରେ ମୋଟ ୨୮୮ ଜଣ ଭାରତୀୟ ରହିଛନ୍ତି ।

ନେପାଳକୁ ଭାରତର ବଡ଼ ସହାୟତା

ସଙ୍କଟ ସମୟରେ ନେପାଳକୁ ସହାୟତା ପାଇଁ ଭାରତ ପକ୍ଷରୁ ରିଲିଫ୍ ଓ ରେସ୍କ୍ୟୁ ସାମଗ୍ରୀ ପଠାଯାଉଛି। ଦୁଇଟି ବିମାନରେ ଟନ୍ ଟନ୍ ରିଲିଫ୍ ସାମଗ୍ରୀ ପଠାଯାଇଛି। ଏଥିରେ ଔଷଧ ମଧ୍ୟ ରହିଛି। ନେପାଳ ସରକାରଙ୍କ ଅନୁରୋଧ ପରେ ଭାରତ ଏହି ସହାୟତା ପଠାଇଛି ।

ଉଦ୍ଧାର ଓ ରିଲିଫ୍ କାର୍ଯ୍ୟକୁ ସୁଗମ କରିବା ପାଇଁ ଭାରତ ବେଲି ବ୍ରିଜ୍ ପ୍ରସ୍ତୁତ କରୁଛି। ଏହା ସହିତ ବିଦେଶ ମନ୍ତ୍ରଣାଳୟରେ ୨୪ ଘଣ୍ଟା କାର୍ଯ୍ୟ କରିବା ପାଇଁ ଏକ କଣ୍ଟ୍ରୋଲ୍ ରୁମ୍ ଖୋଲାଯାଇଛି। କାଠମାଣ୍ଡୁ ଓ ବେଜିଂରେ ଥିବା ଭାରତୀୟ ଦୂତାବାସ ମଧ୍ୟ ୨୪/୭ ହେଲ୍ପଲାଇନ୍ ଆରମ୍ଭ କରିଛି ।

ପ୍ରଧାନମନ୍ତ୍ରୀ ମଧ୍ୟ ନେପାଳର ପ୍ରଧାନମନ୍ତ୍ରୀଙ୍କ ସହ କଥା ହୋଇ ଆବଶ୍ୟକ ସମସ୍ତ ସହାୟତା ଯୋଗାଇବାକୁ ଭାରତ ପ୍ରସ୍ତୁତ ଥିବା ଜଣାଇଛନ୍ତି। ଏହି କଠିନ ସମୟରେ ଭାରତ ନେପାଳ ସହ କାନ୍ଧରେ କାନ୍ଧ ମିଶାଇ ଛିଡ଼ା ହୋଇଛି ।

ନେପାଳରେ ବଢ଼ୁଛି ମୃତ୍ୟୁସଂଖ୍ୟା

ନେପାଳରେ ବନ୍ୟା ଓ ଭୂସ୍ଖଳନ ଯୋଗୁଁ ଏପର୍ଯ୍ୟନ୍ତ ୨୭୦ ଜଣଙ୍କ ମୃତ୍ୟୁ ନିଶ୍ଚିତ ହୋଇଛି। ଏକ ହଜାରରୁ ଅଧିକ ଲୋକ ଏବେବି ନିଖୋଜ ଅଛନ୍ତି। ପ୍ରଭାବିତ ଅଞ୍ଚଳରେ ଯୁଦ୍ଧକାଳୀନ ଭିତ୍ତିରେ ରିଲିଫ୍ ଓ ରେସ୍କ୍ୟୁ ଅପରେସନ୍ ଜାରି ରହିଛି। ନିଖୋଜ ଭାରତୀୟଙ୍କୁ ସୁରକ୍ଷିତ ଭାବେ ଫେରାଇ ଆଣିବା ଏବେ ଭାରତ ସରକାରଙ୍କ ପାଇଁ ପ୍ରମୁଖ ପ୍ରାଥମିକତା ପାଲଟିଛି ।