ପହଲଗାମ୍ ଆତଙ୍କବାଦୀ ଆକ୍ରମଣ ମାମଲାରେ ଚାର୍ଜସିଟ୍‌ ଦାଖଲ କରିଛି NIA । ପାକିସ୍ତାନର ସବୁ ମିଛକୁ ପଦାରେ ପକାଇଛି ଜାତୀୟ ତଦନ୍ତକାରୀ ସଂସ୍ଥା । ଚାର୍ଜସିଟ୍‌ରେ ରହିଛି ପାକିସ୍ତାନ ବିରୋଧରେ ଅକାଟ୍ୟ ପ୍ରମାଣ । ଯାହାକୁ ପାକିସ୍ତାନ ଅସ୍ୱୀକାର କରିପାରିବ ନାହିଁ । ମୋବାଇଲ୍ ଫୋନ୍, IP ଆଡ୍ରେସ୍‌ ଠାରୁ ଆରମ୍ଭ କରି ଟେରର ନେଟୱର୍କ ପର୍ଯ୍ୟନ୍ତ ସବୁ ସୂତ୍ର ଏବେ ସିଧାସଳଖ ପାକିସ୍ତାନ ସହ ଯୋଡ଼ି ହୋଇଛି ।

NIAର ଚାର୍ଜସିଟ୍ ଅନୁଯାୟୀ, ଆକ୍ରମଣର ମାଷ୍ଟରମାଇଣ୍ଡ ଥିଲା ପାକିସ୍ତାନରେ ବସିଥିବା ଲସ୍କର-ଇ-ତୋଏବା ଏବଂ ତା'ର ସହଯୋଗୀ ସଂଗଠନ 'ଦି ରେଜିଷ୍ଟାନ୍ସ ଫ୍ରଣ୍ଟ' ବା TRFର କମାଣ୍ଡର ସୈଫୁଲ୍ଲା ଓରଫ୍ ସାଜିଦ୍ ଜାଟ୍‌ । ଯାହାକୁ 'ଲଙ୍ଗଡ଼ା' ବୋଲି କୁହାଯାଏ । ଆକ୍ରମଣ ସମୟରେ ସାଜିଦ୍ ଜାଟ୍ ପାକିସ୍ତାନର ଲାହୋରରେ ବସି ଆତଙ୍କବାଦୀମାନଙ୍କୁ ଲାଇଭ୍ କୋଅର୍ଡିନେଟ୍ସ ଦେଉଥିଲା ଏବଂ ସେମାନଙ୍କୁ ଗାଇଡ୍ କରୁଥିଲା ।

ଅଧିକ ପଢ଼ନ୍ତୁ: ମନ୍ତ୍ରୀ ପରିଷଦ ବୈଠକ ଡାକିଲେ ମୋଦି, କ୍ୟାବିନେଟ୍ ଅଦଳବଦଳ ଓ ଯୁଦ୍ଧ ପରିସ୍ଥିତି ଉପରେ ହେବ ସମୀକ୍ଷା

NIAର ଡିଜିଟାଲ୍ ଫୋରେନ୍ସିକ ଯାଞ୍ଚରୁ ଟେଲିଗ୍ରାମ ଚ୍ୟାନେଲର IP ଆଡ୍ରେସ୍ ସିଧାସଳଖ ପାକିସ୍ତାନର ରାୱଲପିଣ୍ଡି ସହ ଜଡ଼ିତ ଥିବା ସ୍ପଷ୍ଟ ହୋଇଛି । ଏହା ବ୍ୟତୀତ 'ଅପରେସନ ମହାଦେବ' ସମୟରେ ନିହତ ହୋଇଥିବା ଦୁଇଜଣ ଆତଙ୍କବାଦୀଙ୍କ ପାଖରୁ ମିଳିଥିବା ମୋବାଇଲ୍ ଫୋନ୍ ପାକିସ୍ତାନର ମିଛକୁ ସମ୍ପୂର୍ଣ୍ଣ ଧରାପକାଇଥିଲା । ଏଥିମଧ୍ୟରୁ ଗୋଟିଏ ଫୋନ୍ ଲାହୋରର କୋଟ୍ ଲଖପତ ଏବଂ ଅନ୍ୟଟି କରାଚିର ଶାହରାହ-ଏ-ଫୈସଲ୍‌ ଆଡ୍ରେସରେ ଡେଲିଭରି ହୋଇଥିଲା ।

ଘଟଣାର ମୁଖ୍ୟ ଅଭିଯୁକ୍ତ ସାଜିଦ୍ ଜାଟ୍‌ର କାଶ୍ମୀର ସହ ଏକ ପୁରୁଣା ସମ୍ପର୍କ ମଧ୍ୟ ରହିଛି । ସେ ୨୦୦୫ରେ ଜମ୍ମୁ-କାଶ୍ମୀରକୁ ଅନୁପ୍ରବେଶ କରିଥିଲା ଏବଂ କୁଲଗାମରେ ଜଣେ ସ୍ଥାନୀୟ ମହିଳାଙ୍କୁ ବିବାହ କରିଥିଲା । ପରବର୍ତ୍ତୀ ସମୟରେ ସେ ପାକିସ୍ତାନ ଫେରିଯାଇଥିଲେ ମଧ୍ୟ ସେଠାରେ ରହି ଦକ୍ଷିଣ କାଶ୍ମୀରରେ ଓଭରଗ୍ରାଉଣ୍ଡ ୱାର୍କର୍ସଙ୍କର ଏକ ବଡ଼ ନେଟୱର୍କ ତିଆରି କରିଥିଲା । ଏହି ନେଟୱର୍କ ଜରିଆରେ ସେ ଡ୍ରୋନ୍ ସାହାଯ୍ୟରେ ଅସ୍ତ୍ରଶସ୍ତ୍ର ଏବଂ ନିଶାଦ୍ରବ୍ୟ ଚୋରା ଚାଲାଣ କରୁଥିଲା । ଏପ୍ରିଲ ୧୫-୧୬ ତାରିଖରେ ସେ ୩ ଜଣ ଆତଙ୍କବାଦୀଙ୍କୁ ବୈସରନ ଉପତ୍ୟକାକୁ ପଠାଇ ନରସଂହାରର ଚୂଡ଼ାନ୍ତ ରୂପରେଖ ପ୍ରସ୍ତୁତ କରିଥିଲା ।