Surinder Koli Death / ଜୀବନ ହାରିଲେ ନିଠାରୀ କାଣ୍ଡରୁ ଦୋଷମୁକ୍ତ ସୁରେନ୍ଦ୍ର କୋଲି, ହରିଦ୍ୱାରରେ ଚା’ ଦୋକାନରୁ ମିଳିଲା ମୃତଦେହ

ଉତ୍ତରପ୍ରଦେଶର ଗୌତମବୁଦ୍ଧନଗର (ନୋଏଡା)ର ବହୁଚର୍ଚ୍ଚିତ ନିଠାରୀ କାଣ୍ଡର ଅଭିଯୁକ୍ତ ସୁରେନ୍ଦ୍ର କୋଲିଙ୍କ ମୃତଦେହ ହରିଦ୍ୱାରରୁ ଉଦ୍ଧାର ହୋଇଛି । ଉତ୍ତର ହରିଦ୍ୱାରର ଭୂପତୱାଲା ଅଞ୍ଚଳର ସପ୍ତ ସରୋବର ରୋଡ୍‌ରେ ଥିବା ଲାଲମାତା ମନ୍ଦିର ସମ୍ମୁଖରୁ ତାଙ୍କ ମୃତଦେହ ମିଳିଥିବା ଜଣାପଡ଼ିଛି ।

ସୂଚନା ଅନୁସାରେ, ସୁରେନ୍ଦ୍ର କୋଲି ଗତ କିଛି ଦିନ ଧରି ସେହି ଅଞ୍ଚଳରେ ଏକ ଚା’ ଦୋକାନ କରିଥିଲେ । ଆଉ ସେହି ଦୋକାନ ଭିତରେ ଦଉଡ଼ି ସାହାଯ୍ୟରେ ତାଙ୍କ ମୃତଦେହ ଝୁଲୁଥିବା ଅବସ୍ଥାରେ ଦେଖିବାକୁ ମିଳିଥିଲା । ଘଟଣାର ସୂଚନା ପାଇବା ପରେ ସପ୍ତଋଷି ପୋଲିସ ଫାଣ୍ଡିର ଟିମ୍‌ ଘଟଣାସ୍ଥଳରେ ପହଞ୍ଚିଥିଲା । ପୋଲିସ ମୃତଦେହକୁ ନିଜ ହେପାଜତକୁ ନେଇ ଘଟଣାର ତଦନ୍ତ ଆରମ୍ଭ କରିଛି ।

ପୋଲିସର ସୂଚନା ଅନୁସାରେ, ମୃତକଙ୍କ ପରିଚୟ ଆଲମୋଡ଼ା ଜିଲ୍ଲାର ଭିକିଆସୈଣ ଅଞ୍ଚଳ ଅନ୍ତର୍ଗତ ମଙ୍ଗରୁଖାଲ ଗାଁର ବାସିନ୍ଦା ସୁରେନ୍ଦ୍ର କୋଲି ଭାବେ ହୋଇଛି । ଘଟଣା ସମ୍ପର୍କରେ ପୋଲିସ ତାଙ୍କ ପରିବାରକୁ ମଧ୍ୟ ସୂଚନା ଦେଇଛି । ମୃତ୍ୟୁର ସମସ୍ତ ସମ୍ଭାବ୍ୟ ଦିଗକୁ ନେଇ ତଦନ୍ତ ଜାରି ରହିଛି ।

ଡିସେମ୍ବର ୨୦୨୫ରେ ଜେଲ୍‌ରୁ ମୁକ୍ତ ହୋଇଥିଲେ

ସୁରେନ୍ଦ୍ର କୋଲି ଡିସେମ୍ବର ୨୦୨୫ରେ ଜେଲ୍‌ରୁ ବାହାରି ଥିଲେ । ଏହା ପୂର୍ବରୁ ନିଠାରୀ କାଣ୍ଡ ମାମଲାରେ ତାଙ୍କ ବିରୋଧରେ ଏକାଧିକ ମାମଲା ଚାଲିଥିଲା । ୨୯ ଡିସେମ୍ବର ୨୦୦୬ରେ ନୋଏଡାର ନିଠାରୀ ଅଞ୍ଚଳରେ ମୋନିନ୍ଦର ସିଂହ ପଂଢେରଙ୍କ ଘର ପଛପଟେ ଥିବା ନାଳରୁ ୮ ଜଣ ଶିଶୁଙ୍କ କଙ୍କାଳ ମିଳିଥିଲା । ଏହାପରେ ଘର ଆଖପାଖରେ ଥିବା ନାଳଗୁଡ଼ିକରେ ତଲାସି ଓ ଖନନ କରାଯାଇଥିଲା। ଏହି ସମୟରେ ଆହୁରି ଅନେକ କଙ୍କାଳ ମିଳିଥିଲା ।

ଏହି ଘଟଣାକୁ ନେଇ ମୋନିନ୍ଦର ସିଂହ ପଂଢେର ଏବଂ ତାଙ୍କ ଘରର କାମ କରୁଥିବା ସୁରେନ୍ଦ୍ର କୋଲିଙ୍କ ବିରୋଧରେ ମୋଟ ୧୯ଟି ମାମଲା ରୁଜୁ ହୋଇଥିଲା । ମୋନିନ୍ଦର ସିଂହଙ୍କୁ ଏଥିରୁ ୨ଟି ମାମଲାରେ ଦୋଷୀ ସାବ୍ୟସ୍ତ କରାଯାଇଥିବା ବେଳେ, ନିମ୍ନ ଅଦାଲତ ସୁରେନ୍ଦ୍ର କୋଲିଙ୍କୁ ୧୩ଟି ମାମଲାରେ ମୃତ୍ୟୁଦଣ୍ଡ ଦେଇଥିଲା ।

ହାଇକୋର୍ଟରୁ ମିଳିଥିଲା ବଡ଼ ଆଶ୍ୱସ୍ତି

ତେବେ ୧୬ ଅକ୍ଟୋବର ୨୦୨୩ରେ ଆଲାହାବାଦ ହାଇକୋର୍ଟ ଏହି ମାମଲାଗୁଡ଼ିକରେ ଗୁରୁତ୍ୱପୂର୍ଣ୍ଣ ରାୟ ଦେଇଥିଲେ। ହାଇକୋର୍ଟ ସୁରେନ୍ଦ୍ର କୋଲିଙ୍କୁ ୧୨ଟି ମାମଲାରେ ଦୋଷମୁକ୍ତ କରିଥିଲେ । ସେହିପରି ମୋନିନ୍ଦର ସିଂହ ପଂଢେରଙ୍କ ବିରୋଧରେ ଚାଲିଥିବା ଦୁଇଟି ମାମଲାରେ ମଧ୍ୟ ତାଙ୍କୁ ଦୋଷମୁକ୍ତ କରାଯାଇଥିଲା ।
ପରେ ସୁପ୍ରିମକୋର୍ଟ ମଧ୍ୟ ସୁରେନ୍ଦ୍ର କୋଲି ଓ ମୋନିନ୍ଦର ସିଂହ ପଂଢେରଙ୍କୁ ଦୋଷମୁକ୍ତ କରିଥିବା ହାଇକୋର୍ଟର ରାୟକୁ ବଜାୟ ରଖିଥିଲେ ।