ଆନ୍ତର୍ଜାତୀୟ ସମ୍ପର୍କରେ କୌଣସି ସ୍ଥାୟୀ ବନ୍ଧୁ କିମ୍ବା ଶତ୍ରୁ ନଥାଏ, କେବଳ ସ୍ଥାୟୀ ସ୍ୱାର୍ଥ ଥାଏ । ଏଭଳି ଏକ ବଡ଼ ବୟାନ ଦେଇଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି, ରାଜନାଥଙ୍କ ଏହି ବୟାନ ଏପରି ଏକ ସମୟରେ ଆସିଛି ଯେତେବେଳେ ଆମେରିକା ଏବଂ ଭାରତ ମଧ୍ୟରେ ଶୁଳ୍କକୁ ନେଇ ଉତ୍ତେଜନା ଲାଗି ରହିଛି । ଏହା ସହିତ, ଭାରତ-ଚୀନ୍ ସମ୍ପର୍କ ମଜଭୁତ ହୋଇଛି । ସୂଚନା ଅନୁସାରେ, ଅଗଷ୍ଟ ୨୭ ତାରିଖରୁ ଆମେରିକାରେ ଭାରତୀୟ ସାମଗ୍ରୀ ଉପରେ ୫୦% ଶୁଳ୍କ ଲାଗୁ କରାଯାଇଛି।

ରାଜନାଥ ସିଂହ ଜାତୀୟ ଗଣମାଧ୍ୟମର ଏକ ଡିଫେନ୍ସ ସମ୍ମିଟରେ ଭାଗ ନେଇ କହିଛନ୍ତି, ପରିବର୍ତ୍ତିତ ବିଶ୍ୱ ପରିସ୍ଥିତିରେ, ଭାରତକୁ ଏହାର ଜାତୀୟ ସ୍ୱାର୍ଥକୁ ସର୍ବୋପରି ରଖିବାକୁ ପଡିବ । ସେ ଆହୁରି କହିଛନ୍ତି ଯେ ଆଜିର ବିଶ୍ୱ ଦ୍ରୁତ ଗତିରେ ବଦଳୁଛି ଏବଂ ପ୍ରତିଦିନ ନୂଆ ଚ୍ୟାଲେଞ୍ଜ ଦେଖାଯାଉଛି। ଏହା ମହାମାରୀ, ଆତଙ୍କବାଦ କିମ୍ବା ଆଞ୍ଚଳିକ ସଂଘର୍ଷ ହେଉ । ଏହି ଶତାବ୍ଦୀ ସବୁଠାରୁ ଅସ୍ଥିର ଏବଂ ଚ୍ୟାଲେଞ୍ଜିଂ ପ୍ରମାଣିତ ହୋଇଛି।'

ସେହିପରି ଆତ୍ମନିର୍ଭରଶୀଳତା ଉପରେ ଗୁରୁତ୍ୱାରୋପ କରି ପ୍ରତିରକ୍ଷା ମନ୍ତ୍ରୀ କହିଛନ୍ତି, 'ଆଜି ଆତ୍ମନିର୍ଭରଶୀଳତା କେବଳ ଏକ ଲାଭ ନୁହେଁ ବରଂ ଏକ ଆବଶ୍ୟକତା ପାଲଟିଛି। ପୂର୍ବରୁ ଏହାକୁ ଏକ ସୁବିଧା ଭାବରେ ବିବେଚନା କରାଯାଉଥିଲା, ଏବେ ଏହା ଆମର ବଞ୍ଚିବା ଏବଂ ପ୍ରଗତି ପାଇଁ ଅତ୍ୟାବଶ୍ୟକ।' ସେ ଆହୁରି କହିଛନ୍ତି ଯେ ଭାରତ କାହାକୁ ଶତ୍ରୁ ବୋଲି ବିବେଚନା କରେ ନାହିଁ, କିନ୍ତୁ ଚାଷୀ ଏବଂ ଉଦ୍ୟୋଗୀମାନଙ୍କ ସ୍ୱାର୍ଥ ସବୁଠାରୁ ଗୁରୁତ୍ୱପୂର୍ଣ୍ଣ ।

ସେହିପରି ସେ ଆହୁରି କହିଛନ୍ତି, ପରିବର୍ତ୍ତିତ ଭୂରାଜନୀତି ଏହା ସ୍ପଷ୍ଟ କରିଛି ଯେ ପ୍ରତିରକ୍ଷା କ୍ଷେତ୍ରରେ ବାହ୍ୟ ନିର୍ଭରଶୀଳତା ଆଉ ଏକ ବିକଳ୍ପ ନୁହେଁ। ସେ କହିଛନ୍ତି ଯେ ୨୦୧୪ରେ ଭାରତର ପ୍ରତିରକ୍ଷା ରପ୍ତାନି ₹ ୭୦୦ କୋଟିରୁ କମ୍ ଥିଲା, କିନ୍ତୁ ଆଜି ଏହା ପ୍ରାୟ ₹ ୨୪ ହଜାର କୋଟିରେ ପହଞ୍ଚିଛି। ଏହାର ଅର୍ଥ ହେଉଛି ଯେ ଭାରତ ଏବେ କେବଳ ଏକ କ୍ରେତା ନୁହେଁ, ବରଂ ଏକ ପ୍ରତିରକ୍ଷା ଉତ୍ପାଦକ ଏବଂ ରପ୍ତାନିକାରୀ ମଧ୍ୟ ହେବାକୁ ଯାଉଛି।

ସେନାର କ୍ଷମତା ଉପରେ ଗୁରୁତ୍ୱାରୋପ କରି ପ୍ରତିରକ୍ଷା ମନ୍ତ୍ରୀ କହିଛନ୍ତି, 'ଆମର ସେନା ସ୍ୱଦେଶୀ ଉପକରଣ ସହିତ ଲକ୍ଷ୍ୟସ୍ଥଳ ଉପରେ ସଠିକ ଆକ୍ରମଣ କରିଛି, ଯାହା ଦର୍ଶାଏ ଯେ ଏକ ମିଶନର ସଫଳତା ପାଇଁ ଦୂରଦୃଷ୍ଟି, ଦୀର୍ଘ ପ୍ରସ୍ତୁତି ଏବଂ ସମନ୍ୱୟ ଜରୁରୀ।'

ଅପରେସନ୍ ସିନ୍ଦୂର ବିଷୟରେ ଉଲ୍ଲେଖ କରି ରାଜନାଥ ସିଂହ କହିଛନ୍ତି ଯେ ଏହା କେବଳ କିଛି ଦିନର ଯୁଦ୍ଧ ନୁହେଁ ବରଂ ଏହା ପଛରେ ବର୍ଷ ବର୍ଷର ରଣନୈତିକ ପ୍ରସ୍ତୁତି ଏବଂ ପ୍ରତିରକ୍ଷା ପ୍ରସ୍ତୁତିର ଏକ ଲମ୍ବା ଇତିହାସ ରହିଛି।