November 1 Rule Changes / କାଲିଠୁ ଦେଶରେ ଲାଗୁ ହେବ ନୂଆ ନିୟମ, ଆପଣଙ୍କ ପକେଟ୍ ଉପରେ ପଡ଼ିବ ସିଧା ପ୍ରଭାବ...ଜାଣନ୍ତୁ ନୂଆ ନିୟମ

ଆଜି ସରୁଛି ଅକ୍ଟୋବର ମାସ । ଅର୍ଥାତ ଆସନ୍ତାକାଲିଠାରୁ ଆରମ୍ଭ ହେବ ନଭେମ୍ବର ମାସ । ତେବେ ନୂଆ ମାସ ଆରମ୍ଭ ହେବା ସହ ଦେଶରେ ଲାଗୁ ହେବାକୁ ଯାଉଛି ଅନେକ ବଡ଼ ପରିବର୍ତ୍ତନ । ଏହି ନିୟମଗୁଡ଼ିକର ସିଧାସଳଖ ପ୍ରଭାବ ସାଧାରଣ ଲୋକଙ୍କ ଦୈନନ୍ଦିନ ଜୀବନ ଓ ପକେଟ୍ ଉପରେ ପଡ଼ିପାରେ । ଏଲପିଜି ଗ୍ୟାସ୍ ଦରଠାରୁ ଆରମ୍ଭ କରି ଟୋଲ୍ ପାସ୍, ଜିଏସ୍‌ଟି, ମଦ କିଣିବାର ପେମେଣ୍ଟ ନିୟମ ଏବଂ ମୋବାଇଲ୍ କଲ୍ ପର୍ଯ୍ୟନ୍ତ ଅନେକ କ୍ଷେତ୍ରରେ ପରିବର୍ତ୍ତନ ହେବାକୁ ଯାଉଛି । ଆସନ୍ତୁ ଜାଣିବା ନଭେମ୍ବର ୧ରୁ କେଉଁ କେଉଁ ନିୟମ ବଦଳିବ ।

ପ୍ରଥମ ପରିବର୍ତ୍ତନ – ଏଲପିଜି ଗ୍ୟାସ୍ ସିଲିଣ୍ଡର ଦର

ପ୍ରତି ମାସର ପ୍ରଥମ ତାରିଖରେ ତୈଳ ବିପଣନକାରୀ କମ୍ପାନୀଗୁଡ଼ିକ ଏଲପିଜି ଗ୍ୟାସ୍ ସିଲିଣ୍ଡରର ନୂଆ ଦର ଘୋଷଣା କରିଥାନ୍ତି । ତେଣୁ ନଭେମ୍ବର ୧ ତାରିଖରେ ମଧ୍ୟ ଗ୍ୟାସ୍ ଦରରେ ପରିବର୍ତ୍ତନ ହେବାର ସମ୍ଭାବନା ରହିଛି । ଗତ ଅକ୍ଟୋବର ୧ ତାରିଖରେ ୧୯ କିଲୋଗ୍ରାମ୍ ବିଶିଷ୍ଟ କମର୍ସିଆଲ୍ ଗ୍ୟାସ୍ ସିଲିଣ୍ଡର ଦାମ୍‌ରେ ୬୨ ଟଙ୍କା ୫୦ ପଇସା ପର୍ଯ୍ୟନ୍ତ ବୃଦ୍ଧି ହୋଇଥିଲା । ତେବେ ୧୪ କିଲୋଗ୍ରାମ୍ ବିଶିଷ୍ଟ ଘରୋଇ ଗ୍ୟାସ୍ ସିଲିଣ୍ଡର ଦାମ୍ ଅପରିବର୍ତ୍ତିତ ରହିଥିଲା । ଏବେ ନଭେମ୍ବର ୧ରେ ଉଭୟ ଗ୍ୟାସ୍ ଦର ଉପରେ ସମସ୍ତଙ୍କ ନଜର ରହିଛି । ଏହା ସହିତ ବିମାନ ଇନ୍ଧନ ଅର୍ଥାତ୍ ଏଟିଏଫ୍ ଦରରେ ମଧ୍ୟ ପରିବର୍ତ୍ତନ ହୋଇପାରେ ।

ଦ୍ୱିତୀୟ ପରିବର୍ତ୍ତନ – ୧୫୦୦ ଟଙ୍କାରେ ନୂଆ ଟୋଲ୍ ପାସ୍

ଟୋଲ୍ ପ୍ଲାଜା ନିକଟରେ ରହୁଥିବା ଲୋକଙ୍କ ପାଇଁ ଆସିବ ନୂଆ ଟୋଲ୍ ପାସ୍ । ନଭେମ୍ବର ୧ରୁ ଏହି ନୂଆ ନିୟମ ଲାଗୁ ହେବାକୁ ଯାଉଛି । ଏହି ବାର୍ଷିକ ପାସ୍ ପାଇଁ ୧୫୦୦ ଟଙ୍କା ଦେବାକୁ ପଡ଼ିବ । ଟୋଲ୍ ପ୍ଲାଜାର ୨୦ କିଲୋମିଟର ପରିଧି ମଧ୍ୟରେ ରହୁଥିବା ବ୍ୟକ୍ତିଗତ ଗାଡ଼ି ମାଲିକମାନେ ଏହି ପାସ୍‌ର ସୁବିଧା ପାଇପାରିବେ । ଏହାଦ୍ୱାରା ନିୟମିତ ଟୋଲ୍ ଦେଇ ଯାତାୟାତ କରୁଥିବା ଲୋକଙ୍କୁ ଆଶ୍ୱସ୍ତି ମିଳିପାରେ ।

ତୃତୀୟ ପରିବର୍ତ୍ତନ – ଦିଲ୍ଲୀରେ ପୁରୁଣା ଗାଡ଼ି ଚଳାଚଳ ଉପରେ କଟକଣା

ଦିଲ୍ଲୀରେ ପ୍ରଦୂଷଣ ରୋକିବା ପାଇଁ ନଭେମ୍ବର ୧ରୁ ଅନ୍ୟ ରାଜ୍ୟରେ ପଞ୍ଜୀକୃତ ପୁରୁଣା ନନ୍-BS6 ଗାଡ଼ିର ପ୍ରବେଶ ଉପରେ କଟକଣା ଲାଗୁ ହେବ । ଏହି ନିୟମ ଶୀତକାଳୀନ ପ୍ରଦୂଷଣ ନିୟନ୍ତ୍ରଣ ଯୋଜନା ଅନୁସାରେ ଲାଗୁ ହେବାକୁ ଯାଉଛି । ସୂଚନା ଅନୁସାରେ, ଏହି କଟକଣା ଜାନୁଆରୀ ୩୧, ୨୦୨୬ ପର୍ଯ୍ୟନ୍ତ ରହିବ ବୋଲି ଉଲ୍ଲେଖ ରହିଛି ।

ଚତୁର୍ଥ ପରିବର୍ତ୍ତନ – ମୁମ୍ବାଇ-ପୁଣେ ଏକ୍ସପ୍ରେସ୍‌ ୱେ'ରେ ନୂଆ ନିୟମ

ମୁମ୍ବାଇ-ପୁଣେ ଏକ୍ସପ୍ରେସ୍‌ୱେର ନୂଆ କନେକ୍ଟିଂ ଲିଙ୍କ୍‌ରେ ଯାତାୟାତକୁ ନେଇ ମଧ୍ୟ ନିୟମ ବଦଳିବ। ମହାରାଷ୍ଟ୍ର ହାଇୱେ ପୋଲିସ୍ ଏହି ରାସ୍ତାରେ ମାଲବାହୀ ଗାଡ଼ି ଚଳାଚଳ ଉପରେ ସ୍ଥାୟୀ ରୋକ୍ ଲଗାଇବାକୁ ନିଷ୍ପତ୍ତି ନେଇଛି । ନଭେମ୍ବର ୧ରୁ ଏହି ନିୟମ ଲାଗୁ ହେବ । ତେଣୁ ଏହି ରାସ୍ତା ଦେଇ ଯାତାୟାତ କରୁଥିବା ଗାଡ଼ି ଚାଳକମାନେ ନୂଆ ନିୟମ ସମ୍ପର୍କରେ ଜାଣି ରଖିବା ଆବଶ୍ୟକ ।

ପଞ୍ଚମ ପରିବର୍ତ୍ତନ – ମଦ କିଣିବା ପାଇଁ ଡିଜିଟାଲ୍ ପେମେଣ୍ଟ ବାଧ୍ୟତାମୂଳକ

ତାମିଲନାଡୁରେ ମଦ କିଣିବାର ପେମେଣ୍ଟ ନିୟମରେ ବଡ଼ ପରିବର୍ତ୍ତନ ହେବାକୁ ଯାଉଛି । ତାମିଲନାଡୁ ଷ୍ଟେଟ୍ ମାର୍କେଟିଂ କର୍ପୋରେସନ୍ ବା TASMAC ନୂଆ ନିଷ୍ପତ୍ତି ନେଇଛି । ନଭେମ୍ବର ୧ରୁ ୧୦୦୦ ଟଙ୍କାରୁ ଅଧିକ ଦାମ୍‌ର ମଦ ବୋତଲ କିଣିଲେ ଡିଜିଟାଲ୍ ପେମେଣ୍ଟ କରିବା ବାଧ୍ୟତାମୂଳକ ହେବ । ଅର୍ଥାତ୍ ୧୦୦୦ ଟଙ୍କାରୁ ଅଧିକ ମୂଲ୍ୟର ମଦ କିଣିବା ସମୟରେ ଗ୍ରାହକମାନେ ଆଉ ନଗଦ ଟଙ୍କା ଦେଇପାରିବେ ନାହିଁ। ଡିଜିଟାଲ୍ ମାଧ୍ୟମରେ ପେମେଣ୍ଟ କରିବାକୁ ପଡ଼ିବ ।

ଷଷ୍ଠ ପରିବର୍ତ୍ତନ – GST ରିଟର୍ଣ୍ଣ ନିୟମରେ ପରିବର୍ତ୍ତନ

ନଭେମ୍ବର ୧ରୁ ଜିଏସ୍‌ଟି କ୍ଷେତ୍ରରେ ମଧ୍ୟ କିଛି ନୂଆ ବ୍ୟବସ୍ଥା ଆସିବା ନେଇ ରିପୋର୍ଟ ପ୍ରକାଶ ପାଇଛି । ଏହାଦ୍ୱାରା ଛୋଟ ବ୍ୟବସାୟୀ ଓ ବ୍ୟବସାୟ କରୁଥିବା ଲୋକଙ୍କୁ ଆଶ୍ୱସ୍ତି ମିଳିପାରେ । ଟ୍ୟାକ୍ସ ରିଫଣ୍ଡ ପାଇବାରେ ବିଳମ୍ବ କମାଇବା ଏବଂ ଦସ୍ତାବିଜ୍‌ପତ୍ର କାମର ବୋଝ ହ୍ରାସ କରିବା ପାଇଁ କିଛି କ୍ଷେତ୍ରରେ ଅଟୋମେଟିକ୍ ରିଫଣ୍ଡ ଅନୁମୋଦନ ବ୍ୟବସ୍ଥା ଆଣିବାର ଯୋଜନା ରହିଛି। ଏହା ସହିତ ବାର୍ଷିକ ୫ କୋଟି ଟଙ୍କାରୁ କମ୍ କାରବାର କରୁଥିବା ଏବଂ ସିଧାସଳଖ ଗ୍ରାହକଙ୍କୁ ସାମଗ୍ରୀ ବା ସେବା ଯୋଗାଉଥିବା ବ୍ୟବସାୟୀଙ୍କ ପାଇଁ ନୂଆ ରିଟର୍ଣ୍ଣ ବ୍ୟବସ୍ଥା ଆସିପାରେ ।

ସପ୍ତମ ପରିବର୍ତ୍ତନ – ମୋବାଇଲ୍‌ରେ ଅଜଣା କଲ୍ କରୁଥିବା ବ୍ୟକ୍ତିଙ୍କ ନାଁ ଦେଖାଯିବ

ମୋବାଇଲ୍ ଫୋନ୍ ବ୍ୟବହାରକାରୀଙ୍କ ପାଇଁ ମଧ୍ୟ ନଭେମ୍ବର ୧ରୁ ଏକ ନୂଆ ନିୟମ ଲାଗୁ ହେବାକୁ ଯାଉଛି । ଦୂରସଞ୍ଚାର ବିଭାଗ ବା DoT ପକ୍ଷରୁ କଲିଂ ନେମ୍ ପ୍ରେଜେଣ୍ଟେସନ୍ (CNAP) ବ୍ୟବସ୍ଥା ଲାଗୁ କରିବାକୁ ନିର୍ଦ୍ଦେଶ ଦିଆଯାଇଛି। ଏହା ଲାଗୁ ହେଲେ ଅଜଣା ନମ୍ବରରୁ କଲ୍ ଆସିବା ସମୟରେ ମୋବାଇଲ୍ ସ୍କ୍ରିନ୍‌ରେ କଲ୍ କରୁଥିବା ବ୍ୟକ୍ତିଙ୍କ ନାମ ଦେଖାଯାଇପାରିବ । ଏଥିପାଇଁ ଆଉ କେବଳ Truecaller ଭଳି ଆପ୍ ଉପରେ ନିର୍ଭର କରିବାକୁ ପଡ଼ିବ ନାହିଁ। ଟେଲିକମ୍ ସେବା ପ୍ରଦାନକାରୀ କମ୍ପାନୀମାନଙ୍କୁ ୧ ନଭେମ୍ବର ୨୦୨୬ରୁ ଏହି ବ୍ୟବସ୍ଥା ଲାଗୁ କରିବା ପାଇଁ ନିର୍ଦ୍ଦେଶ ରହିଛି ।