ଦିନେ ପାରା ଥିଲେ ସନ୍ଦେଶ ପହଞ୍ଚାଇବାର ସବୁଠୁ ଭରସାଯୋଗ୍ୟ ମାଧ୍ୟମ । ସମୟ ବଦଳିବା ସହ ସଂଚାରର ନୂଆ ନୂଆ ମାଧ୍ୟମ ଆସିଛି । ହେଲେ ଆଜି ବି କିଛି ଲୋକଙ୍କ ମନରେ ପାରାଙ୍କ ପ୍ରତି ଭଲପାଇବା ଓ ଆକର୍ଷଣ କମିନାହିଁ । ଏହାର ଏକ ନିଆରା ଉଦାହରଣ ହେଉଛନ୍ତି ବିହାରର ଗୟାରେ ରହୁଥିବା ୫୮ ବର୍ଷୀୟ ଅନୱର ରିଜୱାନ ଓରଫ ଅନ୍ନୁ ।

ମାରୁଫଗଞ୍ଜର ବାସିନ୍ଦା ଅନୱରଙ୍କୁ ଲୋକେ ‘ପିଗନ୍ ମ୍ୟାନ୍’ ନାମରେ ଜାଣନ୍ତି । ତାଙ୍କ ପାଖରେ ପ୍ରାୟ ୫୦୦ଟି ପାରା ଅଛନ୍ତି । ଏଥିରେ ଭାରତ ସହିତ ସାଉଦି ଆରବ ଓ ପାକିସ୍ତାନର ବିରଳ ପ୍ରଜାତିର ପାରା ମଧ୍ୟ ସାମିଲ ଅଛନ୍ତି । ଦୀର୍ଘ ୪୫ ବର୍ଷରୁ ଅଧିକ ସମୟ ଧରି ପାରା ପାଳନ କରୁଥିବା ଅନୱରଙ୍କ ପାଇଁ ଏମାନେ କେବଳ ପକ୍ଷୀ ନୁହନ୍ତି, ବରଂ ପରିବାରର ସଦସ୍ୟ ।

୧୩-୧୪ ବର୍ଷ ବୟସରୁ ଆରମ୍ଭ ହୋଇଥିଲା ଶୌକ
ଅନୱର କୁହନ୍ତି, ତାଙ୍କୁ ୧୩-୧୪ ବର୍ଷ ବୟସରୁ ପାରା ପାଳିବାର ସଉକ ଲାଗିଥିଲା । ସେହି ସମୟରେ ସେ ନିଜ ମାମୁଁ ଘରୁ କିଛି ପାରା ଆଣିଥିଲେ । ପ୍ରଥମେ ଏହା ଏକ ସାଧାରଣ ଶୌକ ଥିଲା । କିନ୍ତୁ ଧୀରେ ଧୀରେ ପାରାଙ୍କ ପ୍ରତି ତାଙ୍କର ଭଲପାଇବା ଏକ ନିଶାରେ ପରିଣତ ହୋଇଗଲା ।

ଆଜି ତାଙ୍କ ପାଖରେ ବନାରସୀ, ଇଲାହାବାଦୀ, ଶାହଜାହାନପୁରୀ, କମଗର, ଟେଡି ଓ ଗିରେହବାଜ ଭଳି ଅନେକ ପ୍ରଜାତିର ରହିଛନ୍ତି । ଏହା ବ୍ୟତୀତ ଆମରସରେ ପ୍ରଜାତିର ସବୁଜ ଓ ନାଲି ରଙ୍ଗର ଆକର୍ଷଣୀୟ କବୁତର ମଧ୍ୟ ତାଙ୍କ ସଂଗ୍ରହରେ ଅଛନ୍ତି ।
ଏଥି ସହ ପଢନ୍ତୁ:   'ହାଲୋୱିନ୍' କ’ଣ, କ'ଣ ରହିଛି ଏହାର ଇତିହାସ? କିପରି ହୋଇଥିଲା ଏହାର ଉତ୍ପତ୍ତି? କାହିଁକି ହୋଇଥାଏ ପାଳନ?
ପାରାଙ୍କ ଯତ୍ନରେ ପ୍ରତିବର୍ଷ ଖର୍ଚ୍ଚ ହୁଏ ଲକ୍ଷାଧିକ ଟଙ୍କା
ଅନୱର ନିଜ କବୁତରମାନଙ୍କୁ ପାରମ୍ପରିକ ପଦ୍ଧତିରେ ଉଡ଼ିବାର ପ୍ରଶିକ୍ଷଣ ଦିଅନ୍ତି । ତାଙ୍କ କବୁତରମାନେ ପ୍ରାୟ ୩ରୁ ୪ ହଜାର ଫୁଟ ଉଚ୍ଚତା ପର୍ଯ୍ୟନ୍ତ ଉଡ଼ିପାରନ୍ତି। ବିଶେଷ କଥା ହେଉଛି, ଘଣ୍ଟା ଘଣ୍ଟା ଧରି ଆକାଶରେ ଉଡ଼ିବା ପରେ ମଧ୍ୟ ସେମାନେ ନିଜ ଠିକଣାକୁ ଫେରି ଆସନ୍ତି । ପାରାଙ୍କ ସ୍ୱାସ୍ଥ୍ୟ ଓ ଉଡ଼ିବା କ୍ଷମତା ବଜାୟ ରଖିବା ପାଇଁ ସେ ସେମାନଙ୍କ ଖାଦ୍ୟପେୟ ଉପରେ ବିଶେଷ ଧ୍ୟାନ ଦିଅନ୍ତି । ନିୟମିତ ଭାବେ ରାଗି, ବୁଟ, ମକା, ବାଜରା, ସୋରିଷ ଓ ଅଳସୀ ଆଦି ଖାଦ୍ୟ ଦିଆଯାଏ ।
ସେହିପରି ଉଡ଼ାଣ ପ୍ରତିଯୋଗିତା ପୂର୍ବରୁ ପାରାମାନଙ୍କୁ ବାଦାମ, କାଜୁ, କିସମିସ୍ ଓ ହାଲୱା ଖାଇବାକୁ ଦିଆଯାଏ । ପିଇବା ପାଇଁ ଆର୍‌ଓ ପାଣିର ବ୍ୟବସ୍ଥା ମଧ୍ୟ ରହିଛି । ପ୍ରାୟ ୫୦୦ ପାରାଙ୍କ ଖାଦ୍ୟ ଓ ରକ୍ଷଣାବେକ୍ଷଣ ପାଇଁ ଅନୱର ପ୍ରତିବର୍ଷ ଲକ୍ଷାଧିକ ଟଙ୍କା ଖର୍ଚ୍ଚ କରନ୍ତି ।

୧୫ଟି ପ୍ରତିଯୋଗିତାରେ ହାସଲ କରିଛନ୍ତି ବିଜୟ
ପାରା ଉଡ଼ାଇବାର ଶୌକକୁ ଅନୱର ପ୍ରତିଯୋଗିତା ପର୍ଯ୍ୟନ୍ତ ନେଇଯାଇଛନ୍ତି । ସେ ଏପର୍ଯ୍ୟନ୍ତ ପ୍ରାୟ ୧୫ଟି ପ୍ରତିଯୋଗିତାରେ ବିଜୟୀ ହୋଇଛନ୍ତି । ବିହାର-ଉତ୍ତରପ୍ରଦେଶ ସ୍ତରୀୟ ପ୍ରତିଯୋଗିତାରେ ଦୁଇଥର ଚାମ୍ପିୟନ ହୋଇଛନ୍ତି । ଏହା ବ୍ୟତୀତ ଜାତୀୟ ସ୍ତରରେ ଆୟୋଜିତ ଉସ୍ତାଦୀ କପ୍‌ରେ ରନର୍ସଅପ୍ ହୋଇଥିବାର ଗୌରବ ମଧ୍ୟ ତାଙ୍କର ରହିଛି । ଜିଲ୍ଲା ଓ ରାଜ୍ୟସ୍ତରରେ ମଧ୍ୟ ସେ ଅନେକ ପ୍ରତିଯୋଗିତା ଜିତିଛନ୍ତି ।

ପୁଅର ମୃ*ତ୍ୟୁ ପରେ ପାରା ପାଲଟିଲେ ସାହାରା
ଅନୱରଙ୍କ ଜୀବନରେ ଏମିତି ଏକ ଦୁଃଖଦ ସମୟ ଆସିଥିଲା, ଯାହା ତାଙ୍କୁ ଭିତରୁ ଭାଙ୍ଗି ଦେଇଥିଲା । ଅସୁସ୍ଥତା କାରଣରୁ ତାଙ୍କ ଏକମାତ୍ର ପୁଅର ମୃ*ତ୍ୟୁ ହୋଇଥିଲା । ଏହି ଦୁଃଖରୁ ବାହାରିବା ତାଙ୍କ ପାଇଁ ବେଶ୍ କଷ୍ଟକର ଥିଲା । ଅନୱର କୁହନ୍ତି, ଜୀବନର ସେହି କଠିନ ସମୟରେ ପାରାମାନଙ୍କ ସାଥ୍ ତାଙ୍କୁ ମାନସିକ ଭାବେ ସମ୍ଭାଳିବାରେ ସାହାଯ୍ୟ କରିଥିଲା । ଧୀରେ ଧୀରେ ଏହି ପକ୍ଷୀମାନଙ୍କ ପ୍ରତି ତାଙ୍କର ଭଲପାଇବା ଆହୁରି ଗଭୀର ହୋଇଥିଲା ।

ଅନୱରଙ୍କ କହିବା ଅନୁଯାୟୀ, “ମଦର ନିଶା ଛାଡ଼ି ହୋଇପାରେ, କିନ୍ତୁ ପାରା ପାଳିବାର ସଉକ ଜୀବନସାରା ଛାଡ଼ି ହୁଏନାହିଁ । ଏମାନେ ମୋ ପରିବାରର ସଦସ୍ୟ। ଜୀବନ ଯିବା ପର୍ଯ୍ୟନ୍ତ ଏମାନଙ୍କ ସାଥ୍ ଛାଡ଼ିବି ନାହିଁ ।” ଆଜି ୫୦୦ ପାରାଙ୍କ ଗହଣରେ ହିଁ ଅନୱରଙ୍କ ଦୁନିଆ । ତାଙ୍କ ପାଇଁ ଏହା କେବଳ ଏକ ସଉକ ନୁହେଁ, ବରଂ ଜୀବନକୁ ଜୀଇଁବାର ଏକ ନିଆରା ଶୈଳୀ ଏବଂ ଅସରନ୍ତି ଭଲପାଇବାର କାହାଣୀ ।