କଂଗ୍ରେସ ପୋଲ୍ ଖୋଲିଲେ ପ୍ରଧାନମନ୍ତ୍ରୀ ମୋଦି । କଂଗ୍ରେସ ଶାସନ ସମୟରେ ଆତଙ୍କବାଦୀ ଆକ୍ରମଣ ଘଟଣାରେ ବି ଭାରତ ଉପରେ ରହୁଥିଲା ବିଦେଶୀ ଚାପ । ଖୁଲମଖୁଲା ବୁଲୁଥିଲେ ଆତଙ୍କୀ । ୨୦୦୮ ମୁମ୍ବାଇ ଆତଙ୍କୀ ଆକ୍ରମଣ ଘଟଣାକୁ ନେଇ କଂଗ୍ରେସକୁ ଆଟାକ୍ କରିଛନ୍ତି ମୋଦି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନଭି ମୁମ୍ବାଇରେ କହିଥିଲେ ଯେ ମୁମ୍ବାଇ କେବଳ ଆର୍ଥିକ ରାଜଧାନୀ ନୁହେଁ ବରଂ ଦେଶର ସବୁଠାରୁ ସ୍ପନ୍ଦନଶୀଳ ସହର ମଧ୍ୟରୁ ଗୋଟିଏ। ଏହି କାରଣରୁ ଆତଙ୍କବାଦୀମାନେ ୨୬/୧୧ ଆକ୍ରମଣ କରିଥିଲେ ।

ପ୍ରଧାନମନ୍ତ୍ରୀ ମୋଦି ଅଭିଯୋଗ କରିଛନ୍ତି ଯେ ତତ୍କାଳୀନ କଂଗ୍ରେସ ସରକାର ଆତଙ୍କବାଦୀମାନଙ୍କୁ ଦୁର୍ବଳତାର ବାର୍ତ୍ତା ପଠାଇଥିଲେ । ସେ କହିଛନ୍ତି, "ସମ୍ପ୍ରତି ଜଣେ ବରିଷ୍ଠ କଂଗ୍ରେସ ନେତା ଏବଂ ପୂର୍ବତନ ଗୃହମନ୍ତ୍ରୀ ପ୍ରକାଶ କରିଛନ୍ତି ଯେ ୨୦୦୮ ମୁମ୍ବାଇ ଆକ୍ରମଣ ପରେ ଆମର ସୁରକ୍ଷା ବାହିନୀ ପାକିସ୍ତାନ ଉପରେ ଆକ୍ରମଣ କରିବାକୁ ପ୍ରସ୍ତୁତ ଥିଲେ, କିନ୍ତୁ ଅନ୍ୟ ଦେଶର ଚାପରେ ତତ୍କାଳୀନ କଂଗ୍ରେସ ସରକାର ଆମର ସୁରକ୍ଷା ବାହିନୀକୁ ଅଟକାଇ ଦେଇଥିଲେ ଏବଂ ବିଦେଶୀ ଶକ୍ତି ଆଗରେ ଆତ୍ମସମର୍ପଣ କରିଦେଇଥିଲେ । ବିଦେଶୀ ଚାପରେ କିଏ ଏହି ନିଷ୍ପତ୍ତି ନେଇଥିଲା ତାହା କଂଗ୍ରେସ ବୁଝାଇବା ଉଚିତ। ଦେଶକୁ ଏହା ବିଷୟରେ ଜାଣିବାର ସମ୍ପୂର୍ଣ୍ଣ ଅଧିକାର ଅଛି। କଂଗ୍ରେସର ଦୁର୍ବଳତା ଆତଙ୍କବାଦୀଙ୍କୁ ଶକ୍ତିଶାଳୀ କରିଥିଲା, ଏବଂ ଦେଶ ଏହି ଭୁଲ ପାଇଁ ବାରମ୍ବାର ମୂଲ୍ୟ ଦେଇସାରିଛି।"

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହା ମଧ୍ୟ କହିଛନ୍ତି ଯେ ତାଙ୍କ ସରକାର ପାଇଁ ଜାତୀୟ ସୁରକ୍ଷା ଏବଂ ନାଗରିକଙ୍କ ସୁରକ୍ଷା ଅପେକ୍ଷା ଆଉ କିଛି ଗୁରୁତ୍ୱପୂର୍ଣ୍ଣ ନୁହେଁ ।

ସୂଚନା ଅନୁସାରେ, ନିକଟରେ ଦୀର୍ଘ ବର୍ଷ ପରେ ୨୬/୧୧ ମୁମ୍ବାଇ ଆକ୍ରମଣକୁ ନେଇ ବଡ଼ ଖୁଲାସା କରିଥିଲେ ବରିଷ୍ଠ କଂଗ୍ରେସ ନେତା ଏବଂ ପୂର୍ବତନ କେନ୍ଦ୍ର ଗୃହମନ୍ତ୍ରୀ ପି. ଚିଦାମ୍ବରମ । ୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣ ସମ୍ପର୍କରେ ସେ କହିଥିଲେ ଯେ ତତ୍କାଳୀନ ୟୁପିଏ ସରକାର ପ୍ରବଳ ଅନ୍ତର୍ଜାତୀୟ ଚାପରେ ଥିଲା । ବୈଦେଶିକ ବ୍ୟାପାର ମନ୍ତ୍ରଣାଳୟର ମତକୁ ଦୃଷ୍ଟିରେ ରଖି ପାକିସ୍ତାନ ବିରୁଦ୍ଧରେ ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିଲା ।

ସେହି ସମୟରେ ମୁଁ ପ୍ରଧାନମନ୍ତ୍ରୀ ଏବଂ ଅନ୍ୟାନ୍ୟ ପ୍ରମୁଖ ବ୍ୟକ୍ତିବିଶେଷଙ୍କ ସହିତ ଏହି ବିଷୟରେ ଆଲୋଚନା କରିଥିଲି । କିନ୍ତୁ MEA ଏବଂ IFSର ନିଷ୍କର୍ଷଟି ଥିଲା ଯେ ଆମେ ଆମେ ଯେକୌଣସି ପରିସ୍ଥିତିରେ ସାମରିକ ପ୍ରତିକ୍ରିୟା ଦେବା ଉଚିତ୍ ନୁହେଁ । ବରଂ ଏକ କୂଟନୈତିକ ଆଭିମୁଖ୍ୟ ଗ୍ରହଣ କରିବା ଉଚିତ୍ ବୋଲି ସେ କହିଥିଲେ ।