ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ନୂଆଦିଲ୍ଲୀର ଡକ୍ଟର ଆମ୍ବେଦକର ଆନ୍ତର୍ଜାତୀୟ କେନ୍ଦ୍ରରେ ରାଷ୍ଟ୍ରୀୟ ସ୍ୱୟଂସେବକ ସଂଘର ଶତବାର୍ଷିକୀ ସମାରୋହରେ ମୁଖ୍ୟଅତିଥି ଭାବରେ ଯୋଗଦେବେ। ଏହି ଅବସରରେ, ପ୍ରଧାନମନ୍ତ୍ରୀ ଦେଶ ପ୍ରତି ଆରଏସଏସର ଅବଦାନକୁ ଦର୍ଶାଇ ଏକ ସ୍ୱତନ୍ତ୍ର ଭାବରେ ଡିଜାଇନ୍ କରାଯାଇଥିବା ସ୍ମାରକୀ ଡାକଟିକଟ ଏବଂ ମୁଦ୍ରା ଉନ୍ମୋଚନ କରିବେ ଏବଂ ସମାବେଶକୁ ମଧ୍ୟ ସମ୍ବୋଧିତ କରିବେ।

RSSର ଐତିହ୍ୟ, ସାଂସ୍କୃତିକ ଅବଦାନ ଏବଂ ଭାରତର ଏକତାରେ ଭୂମିକା ଉପରେ ଆଲୋକପାତ କରାଯିବ। ୧୯୨୫ ମସିହାରେ ଡକ୍ଟର କେଶବ ବଳିରାମ ହେଡଗେୱାରଙ୍କ ଦ୍ୱାରା ମହାରାଷ୍ଟ୍ରର ନାଗପୁରରେ ପ୍ରତିଷ୍ଠିତ ଆରଏସଏସ ଏକ ସ୍ୱେଚ୍ଛାସେବୀ-ଆଧାରିତ ସଂଗଠନ ଭାବରେ ପ୍ରତିଷ୍ଠିତ ହୋଇଥିଲା ଯାହାର ଲକ୍ଷ୍ୟ ନାଗରିକମାନଙ୍କ ମଧ୍ୟରେ ସାଂସ୍କୃତିକ ସଚେତନତା, ଶୃଙ୍ଖଳା, ସେବା ଏବଂ ସାମାଜିକ ଦାୟିତ୍ୱକୁ ପ୍ରୋତ୍ସାହିତ କରିବା।

ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ମହାରାଷ୍ଟ୍ରର ନାଗପୁର ଗସ୍ତରେ ଯାଇଥିବାବେଳେ ଆରଏସ୍‌ଏସ୍‌ ମୁଖ୍ୟାଳୟ ପରିଦର୍ଶନ କରିଛନ୍ତି। ଏହି ଅବସରରେ ମୋଦି ଆରଏସ୍‌ଏସ୍‌ ପ୍ରତିଷ୍ଠାତା କେଶବ ବଳିରାମ ହେଡ୍‌ଗେୱାରଙ୍କ ସ୍ମୃତି ମନ୍ଦିର ପରିଦର୍ଶନ କରିବା ସହ ତାଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଛନ୍ତି।

ସୂଚନାଯୋଗ୍ୟ ୨୦୧୪ରେ ପ୍ରଧାନମନ୍ତ୍ରୀ ଦାୟିତ୍ବ ଗ୍ରହଣ କରିବା ପରେ ମୋଦି ପ୍ରଥମ ଥର ଆରଏସ୍‌ଏସ୍‌ ମୁଖ୍ୟାଳୟ ପରିଦର୍ଶନ କରିଛନ୍ତି। ଏଠାକୁ ଗସ୍ତ କରିବାରେ ସେ ହେଉଛନ୍ତି ଦ୍ବିତୀୟ ପ୍ରଧାନମନ୍ତ୍ରୀ। ୨୦୦୦ ମସିହାରେ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଆରଏସ୍‌ଏସ୍‌ ମୁଖ୍ୟାଳୟ ପରିଦର୍ଶନ କରିଥିଲେ। ମୋଦି ଏହି ଅବସରରେ ସଂଘ ପରିବାରକୁ ବରଗଛ ସହ ତୁଳନା କରିଛନ୍ତି।

ଏହାସହ ପଢ଼ନ୍ତୁ:- ଭସାଣୀ ବେଳେ କିଏ କେଉଁ ରାସ୍ତାରେ ଯିବେ, କ'ଣ ରହିଛି ବ୍ୟବସ୍ଥା ? ଜାଣନ୍ତୁ...

ଭାରତୀୟ ସଂସ୍କୃତି, ପରମ୍ପରା ଓ ମୂଲ୍ୟବୋଧକୁ ସୁରକ୍ଷିତ ରଖିବା ଏବଂ ଏହାକୁ ନୂତନ ଶିଖରରେ ପହଞ୍ଚାଇବାରେ ସଂଘର କାର୍ଯ୍ୟ ବାସ୍ତବିକ ପ୍ରଶଂସନୀୟ ବୋଲି ମୋଦି କହିଛନ୍ତି। ମୋଦି ‘ମାଧବ ନେତ୍ରାଳୟ ପ୍ରିମିୟମ ସେଣ୍ଟର’ରେ ପ୍ରସ୍ତାବିତ ନୂତନ ଅଟ୍ଟାଳିକାର ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଆରଏସ୍‌ଏସ୍‌ର ପୂର୍ବତନ ମୁଖ୍ୟ ମାଧବ ଗୋଲୱାଲକରଙ୍କ ନାମରେ ଏହି ନେତ୍ରାଳୟର ନାମକରଣ କରାଯାଇଛି। ଆରଏସ୍‌ଏସ୍‌ କେବଳ ଏକ ସଂଗଠନ ନୁହେଁ, ବରଂ ଦେଶର ବିକାଶ ଅଭିଯାନରେ ଏକ ମାଇଲଖୁଣ୍ଟ ବୋଲି ମୋଦି କହିଛନ୍ତି।

ଦେଶ ବର୍ତ୍ତମାନ ସମ୍ବିଧାନ ପ୍ରଣୟନର ୭୫ ବର୍ଷ ପାଳନ କରୁଥିବାବେଳେ ଆରଏସ୍‌ଏସ୍‌ ତାହାର ଶତବାର୍ଷିକୀ ପାଳନ କରୁଛି। ଆରଏସ୍‌ଏସ୍‌ର ପ୍ରତ୍ୟେକ କର୍ମୀ ଦେଶସେବାରେ ନିଜକୁ ନିୟୋଜିତ କରିବା ସୌଭାଗ୍ୟର ବିଷୟ ବୋଲି ମୋଦି କହିଛନ୍ତି। ଏମାନେ ନିଜର ସ୍ବାର୍ଥକୁ ବଳି ଦେଇ ଦେଶର ସ୍ବାର୍ଥକୁ ଅଗ୍ରାଧିକାର ଦେଇଥାନ୍ତି। ସଂଘର ଦୁଇ ବଳିଷ୍ଠ ବ୍ୟକ୍ତିତ୍ବ ହେଡ୍‌ଗେୱାର ଓ ଗୋଲୱାଲକରଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିବା ତାଙ୍କ ପାଇଁ ଗର୍ବ ଓ ଗୌରବର ବିଷୟ ବୋଲି ମୋଦି ପର୍ଯ୍ୟଟକ ପୁସ୍ତିକାରେ ଉଲ୍ଲେଖ କରିଛନ୍ତି।

ଏହାସହ ପଢ଼ନ୍ତୁ:- ଯୁଦ୍ଧ ବନ୍ଦ ନେଇ ଟ୍ରମ୍ପ-ନେତାନ୍ୟାହୁ ଆଲୋଚନା

ଗସ୍ତ ଅବସରରେ ମୋଦି ସମ୍ବିଧାନ ପ୍ରଣେତା ବାବାସାହେବ ଆମ୍ବେଦକରଙ୍କ ସ୍ମୃତିସ୍ଥଳ ‘ଦୀକ୍ଷାଭୂମି’ ପରିଦର୍ଶନ କରି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ମୋଦିଙ୍କ ସହ ଆରଏସ୍‌ଏସ୍‌ ମୁଖ୍ୟ ମୋହନ ଭାଗବତ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍‌ନବିସ ଏବଂ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ ମଧ୍ୟ ସେଠାରେ ଉପସ୍ଥିତ ଥିଲେ।