Dimagi Naxals / ପ୍ରଥମେ ସହରୀ ନକ୍ସଲ, ଏବେ ଦିମାଗୀ ନକ୍ସଲ…

ନୂଆଦିଲ୍ଲୀ: ଦେଶର ଐତିହାସିକ ପ୍ରତୀକ ଲାଲକିଲ୍ଲାରୁ ପ୍ରଧାନମନ୍ତ୍ରୀ ଦେଶବାସୀଙ୍କୁ ସମ୍ବୋଧନ କରିଛନ୍ତି । ସ୍ଵାଧୀନତା ଦିବସ ଅବସରରେ ପ୍ରଧାନମନ୍ତ୍ରୀ ମୋଦି ସମ୍ବୋଧିତ କରି ଦେଶକୁ ନୂଆ ଦିଗ, ସଂକଳ୍ପ ଓ ବିକାଶର ଭବିଷ୍ୟତ ଯୋଜନାର ପଥ ଦେଖାଇଛନ୍ତି ।

ସମ୍ବୋଧନ ବେଳେ ପ୍ରଧାନମନ୍ତ୍ରୀ 'ଦିମାଗୀ ନକ୍ସଲ' ଶବ୍ଦର ପ୍ରୟୋଗ କରି ଦେଶର ସୁରକ୍ଷା, ବିଚାରଗତ ସ୍ଥିରତା ଓ ସାମାଜିକ ଏକତା ସହ ଜଡ଼ିତ ସ୍ପଷ୍ଟ ଓ କଡ଼ା ସନ୍ଦେଶ ଦେବାକୁ ପ୍ରୟାସ କରିଛନ୍ତି । ଏଥିସହ ଯୁବବର୍ଗଙ୍କୁ ହିଂସା ଓ ଅରାଜକତାରୁ ଦୂରେଇ ରହି ବିକାଶ, ଏକତା ଓ ରଚନାତ୍ମକ କାର୍ଯ୍ୟରେ ଯୋଗଦାନ ଦେବାକୁ ନିବେଦନ କରିଛନ୍ତି ।

ଏଥିସହ ପଢ଼ନ୍ତୁ: ପ୍ରଧାନମନ୍ତ୍ରୀ 'ସପ୍ତଧାରା'ର ଶକ୍ତି ବିଷୟରେ କହିଲେ, ଦେଶକୁ ଆଗାମୀ ୫ବର୍ଷ ପାଇଁ ଏକ ବଡ଼ ଯୋଜନା ଦେଲେ… 

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, "ଜଙ୍ଗଲରୁ ନକ୍ସଲ ଶେଷ ହୋଇଛନ୍ତି କିନ୍ତୁ, 'ଦିମାଗୀ ନକ୍ସଲ' ଏବେ ସୁଯୋଗ ସନ୍ଧାନରେ ଅଛନ୍ତି । ସେମାନଙ୍କୁ ଚିହ୍ନଟ କରି ଅଲଗା କରିବାକୁ ପଡ଼ିବ ।"

ସମ୍ବୋଧନ ବେଳେ ପ୍ରଧାନମନ୍ତ୍ରୀ ମୋଦି ସମାଜରେ ହିଂସା ଓ ଅରାଜକତାକୁ ପ୍ରୋତ୍ସାହନ ଦେଉଥିବା ମାନସିକତାଧାରୀଙ୍କ ବିପକ୍ଷରେ ସତର୍କ ରହିବାକୁ ଆହ୍ଵାନ ଦେଇଛନ୍ତି । ପ୍ରଧାନମନ୍ତ୍ରୀ କହିଛନ୍ତି, "କିଛି ଲୋକ ସମାଜକୁ ଭୁଲ୍ ବାଟରେ ନେବା ଲାଗି ଭିନ୍ନ ଭିନ୍ନ ଦାବି କରୁଛନ୍ତି ଏଭଳି ତତ୍ତ୍ଵଙ୍କୁ ଚିହ୍ନିବା ଜରୁରୀ ଅଟେ ।"

ପ୍ରଧାନମନ୍ତ୍ରୀ ମୋଦି କହିଛନ୍ତି, "ଆମେ ନକ୍ସଲବାଦର ଅନ୍ତ କରିବା ପାଇଁ ସଂକଳ୍ପ ନେଇଥିଲୁ । ଏକବିଂଶ ଶତାବ୍ଦୀରେ ଦଶନ୍ଧି ପୁରୁଣା ଆହ୍ଵାନକୁ ଶେଷ କରିବା ଅନିବାର୍ଯ୍ୟ ଅଟେ । ନକ୍ସଲବାଦ ଓ ମାଓବାଦ ଲକ୍ଷ ଲକ୍ଷ ଯୁବକଙ୍କ ଭବିଷ୍ୟ ଧ୍ଵଂସ କରି ଦେଇଛି । ଅନେକ ମାଆଙ୍କ ଠାରୁ ନବଜାତଙ୍କୁ ଛଡ଼ାଇ ନେଇଛି, ମାଆବାପାଙ୍କ ସ୍ଵପ୍ନ ଭାଙ୍ଗି ଦେଇଛି ।"

ଏମାନେ ଦଶନ୍ଧି ଦଶନ୍ଧି ଧରି ଦେଶ ସଂଖ୍ୟାର ବଡ଼ ଭାଗକୁ ବନ୍ଧୁକ ମୁନରେ ଦବାଇ ରଖିଥିଲେ । ସମ୍ବିଧାନକୁ ଅପମାନିତ କରୁଥିଲେ । ଦେଶର ନାଗରିକଙ୍କ ରକ୍ଷାରେ ୩୫୦୦ରୁ ଅଧିକ ସୁରକ୍ଷାକର୍ମୀ ସହିଦ ହୋଇଛନ୍ତି । କିନ୍ତୁ ଏବେ ନକ୍ସଲବାଦ ଅନ୍ତିମ ନିଶ୍ଵାସ ନେଉଛି, ଯାହା ସୁରକ୍ଷାକର୍ମୀଙ୍କ ପାଇଁ ସମ୍ଭବ ହୋଇଛି । ଏବେ ନକ୍ସଲ କ୍ଷେତ୍ର ବିକାଶର ତ୍ରିରଙ୍ଗା ଉଡ଼ାଉଛି ।

ଏଥିସହ ପଢ଼ନ୍ତୁ: ଯୁବପିଢ଼ିଙ୍କ ପାଇଁ ପ୍ରଧାନମନ୍ତ୍ରୀ ମୋଦିଙ୍କ ବଡ଼ ଘୋଷଣା 

ପ୍ରଧାନମନ୍ତ୍ରୀ କହିଛନ୍ତି, "ଜଙ୍ଗଲ ନକ୍ସଲଙ୍କ ବଦଳରେ ଏବେ ସହର, ଶିକ୍ଷାନୁଷ୍ଠାନ ଓ ବୌଦ୍ଧିକ ମଞ୍ଚରେ 'ଦିମାଗୀ ନକ୍ସଲ' ସକ୍ରିୟ ହୋଇ ଉଠିଛନ୍ତି । ଆମକୁ ସାବଧାନ ରହିବାକୁ ପଡ଼ିବ । ଅସ୍ତ୍ରଶସ୍ତ୍ରଧଧାରୀ ନକ୍ସଲ ତ ଗଲେ, ଏବେ 'ଦିମାଗୀ ନକ୍ସଲ' ସୁଯୋଗ ଖୋଜୁଛନ୍ତି । ଏହି ବର୍ଗ ଅସ୍ତ୍ର ନିଜେ ଧରୁ ନାହାନ୍ତି । କିନ୍ତୁ ନିଜ ବିଚାରଧାରାରେ ଦେଶରେ ଅରାଜକତା ଓ ଗୁଜବ ଖେଳାଉଛନ୍ତି ।"