ନେପାଳକୁ ହରାଇ ପ୍ରଥମ ଦୃଷ୍ଟିହୀନ ଟି-୨୦ ବିଶ୍ବକପ୍‌ ଜିତିଛି ଭାରତୀୟ ମହିଳା ଦଳ । ଗୁରୁବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ବକପ୍‌ ବିଜେତା ଖେଳାଳିମାନଙ୍କୁ ଭେଟି ଅଭିନନ୍ଦନ ଜଣାଇଛନ୍ତି । ଭାରତୀୟ ମହିଳା ଦଳର ସଦସ୍ୟମାନେ ପ୍ରଧାନମନ୍ତ୍ରୀ ମୋଦିଙ୍କୁ ସେମାନଙ୍କର ଅଟୋଗ୍ରାଫ୍‌ ଥିବା ଏକ ବ୍ୟାଟ୍ ପ୍ରଦାନ କରିଥିଲେ । ସେହିପରି ପ୍ରଧାନମନ୍ତ୍ରୀ ମଧ୍ୟ ଦଳ ପାଇଁ ଏକ ବଲ୍‌ରେ ସ୍ବାକ୍ଷର କରିଥିଲେ । ଏହି କାର୍ଯ୍ୟକ୍ରମ ସମୟରେ, ପ୍ରଧାନମନ୍ତ୍ରୀ ମୋଦୀ ବ୍ୟକ୍ତିଗତ ଭାବରେ ଦଳର ସଦସ୍ୟମାନଙ୍କୁ ମିଠା ବାଣ୍ଟି କରିଥିଲେ।

ସେହିପରି ପ୍ରଧାନମନ୍ତ୍ରୀ ପ୍ରତ୍ୟେକ ଖେଳାଳିଙ୍କୁ ବ୍ୟକ୍ତିଗତ ଭାବରେ ଭେଟି ବିଶ୍ୱକପର କାହାଣୀ ସେମାନଙ୍କଠାରୁ ଶୁଣିଥିଲେ । ସମସ୍ତ ଖେଳାଳି ପ୍ରଧାନମନ୍ତ୍ରୀଙ୍କ ସହିତ ବହୁତ ରିଲାକ୍ସ ନଜର ଆସିଥିଲେ । ବୈଠକ ପରେ ପ୍ରଧାନମନ୍ତ୍ରୀ ମୋଦି ବ୍ୟକ୍ତିଗତ ଭାବରେ ସମସ୍ତ ଖେଳାଳିଙ୍କୁ ମିଠା ଖୁଆଇଥିଲେ ।

It was a delight to host the Indian Blind Women’s Cricket Team that won the Blind Women’s T20 World Cup! They shared their experiences, which were very inspiring indeed. pic.twitter.com/ar6SuQWHC9

— Narendra Modi (@narendramodi) November 27, 2025

ଭାରତୀୟ ମହିଳା ଦୃଷ୍ଟିହୀନ କ୍ରିକେଟ୍ ଦଳ ରବିବାର କଲମ୍ବୋରେ ଖେଳାଯାଇଥିବା ଫାଇନାଲ ମ୍ୟାଚ୍ ରେ ନେପାଳକୁ ୭ ୱିକେଟରେ ପରାସ୍ତ କରିଥିଲା । ଟସ୍ ଜିତି ଭାରତ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । ପ୍ରଥମେ ବ୍ୟାଟିଂ କରି ନେପାଳ ୨୦ ଓଭରରେ ୫ ୱିକେଟରେ ୧୧୪ ରନ କରିଥିଲା । ଏହି ଲକ୍ଷ୍ୟକୁ ଭାରତୀୟ ଦଳ ୧୨.୧ ଓଭରରେ ହାସଲ କରି ଏକ ଐତିହାସିକ ବିଜୟ ହାସଲ କରିଥିଲା ।

ଭାରତୀୟ ଦୃଷ୍ଟିହୀନ ଦଳ ସେମିଫାଇନାଲ୍‌ରେ ଅଷ୍ଟ୍ରେଲିଆକୁ ପରାସ୍ତ କରିଥିଲା। ନେପାଳ ଦଳ ପାକିସ୍ତାନକୁ ପରାସ୍ତ କରି ଫାଇନାଲରେ ପହଞ୍ଚିଥିଲା। ଏହି ଟୁର୍ଣ୍ଣାମେଣ୍ଟରେ ଭାରତୀୟ ଦଳ ଗୋଟିଏ ବି ମ୍ୟାଚ୍ ହାରି ନଥିଲା। ଲିଗ୍ ମ୍ୟାଚ୍‌ଗୁଡ଼ିକରେ ଭାରତ ଶ୍ରୀଲଙ୍କାକୁ ୧୦ ୱିକେଟ୍‌ରେ, ଅଷ୍ଟ୍ରେଲିଆକୁ ୨୦୯ ରନ୍‌ରେ, ନେପାଳକୁ ୮୫ ରନ୍‌ରେ, ଆମେରିକାକୁ ୧୦ ୱିକେଟ୍‌ରେ ଏବଂ ପାକିସ୍ତାନକୁ ୮ ୱିକେଟ୍‌ରେ ପରାସ୍ତ କରିଥିଲା।

ଭାରତୀୟ ମହିଳା କ୍ରିକେଟ୍ ଦଳ ଚଳିତ ମାସ ନଭେମ୍ବର ୨ ତାରିଖରେ ଦକ୍ଷିଣ ଆଫ୍ରିକାକୁ ପରାସ୍ତ କରି ପ୍ରଥମ ଥର ପାଇଁ ଦିନିକିଆ ବିଶ୍ୱକପ୍ ଜିତିଥିଲା । ସେହି ବିଜୟର ମାତ୍ର ୨୧ ଦିନ ପରେ ମହିଳା ଦୃଷ୍ଟିହୀନ କ୍ରିକେଟ୍ ଦଳର ଟାଇଟଲ୍ ବିଜୟ, କ୍ରିକେଟର ପ୍ରତ୍ୟେକ କ୍ଷେତ୍ରରେ ଭାରତର ବଢ଼ୁଥିବା ପ୍ରାଧାନ୍ୟକୁ ପ୍ରତିଫଳିତ କରିଛି ।