ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଶୁଳ୍କ ଘୋଷଣା କରିବା ପରଠାରୁ, ଦୁଇ ଦେଶ ମଧ୍ୟରେ ସମ୍ପର୍କ ତିକ୍ତ ହେବାରେ ଲାଗିଛି । ତେବେ ଏହାରି ମଧ୍ୟରେ, ଏକ ଜର୍ମାନ ଖବରକାଗଜ ଏକ ବଡ଼ ଦାବି କରିଛି । ଟ୍ରମ୍ପ ଶୁଳ୍କ ବିବାଦ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚାରିଥର ଫୋନ୍ କରିଥିଲେ, କିନ୍ତୁ ପ୍ରଧାନମନ୍ତ୍ରୀ ମୋଦି ତାଙ୍କ ସହ କଥା ହେବାକୁ ମନା କରିଦେଇଛନ୍ତି।

ଜର୍ମାନ ଖବରକାଗଜ FAZ ଦାବି କରିଛି ଯେ ଡୋନାଲ୍ଡ ଟ୍ରମ୍ପ ଭାରତକୁ ଡେଡ୍ ଇକୋନୋମୀ ବୋଲି କହିବା ପରେ ଆମେରିକା ରାଷ୍ଟ୍ରପତିଙ୍କ ଉପରେ ଖପ୍ପା ଅଛନ୍ତି PM ମୋଦି । ଟ୍ରମ୍ପଙ୍କ ଶୁଳ୍କ ୨୫ ବର୍ଷ ପୁରୁଣା ଭାରତ-ଆମେରିକା ସମ୍ପର୍କକୁ ଖରାପ କରିଛି । ଆମେରିକା ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଛି, ଯାହା ବ୍ରାଜିଲ ବ୍ୟତୀତ ଅନ୍ୟ କୌଣସି ଦେଶ ପାଇଁ ସର୍ବାଧିକ । ଋଷରୁ ଅଶୋଧିତ ତେଲ କିଣିବା ପାଇଁ ଆମେରିକା ଭାରତ ଉପରେ ଜରିମାନା ମଧ୍ୟ ଲଗାଇଛି । FAZ ଦାବି କରିଛି ଯେ ଟ୍ରମ୍ପ ଗତ କିଛି ସପ୍ତାହରେ ପ୍ରଧାନମନ୍ତ୍ରୀ ମୋଦିଙ୍କୁ ଚାରିଥର ଫୋନ୍ କରିଥିଲେ, କିନ୍ତୁ ସେ କଥା ହେବାକୁ ମନା କରିଦେଇଥିଲେ। ତେବେ ଆମେରିକା କିମ୍ବା ଭାରତ ସରକାର ଏହି ପ୍ରସଙ୍ଗରେ ଆନୁଷ୍ଠାନିକ ଭାବରେ କିଛି କହିନାହାଁନ୍ତି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୩୧ ଜୁଲାଇରେ କହିଥିଲେ, "ଭାରତ ଋଷ ସହିତ କ'ଣ କରେ ତାହା ମୋତେ ଚିନ୍ତା ନାହିଁ। ସେମାନେ ଏକାଠି ସେମାନଙ୍କର ଡେଡ୍‌ ଇକୋନୋମୀକୁ ତଳକୁ ଆଣିପାରିବେ। ଆମେ ଭାରତ ସହିତ ବହୁତ କମ୍ ବାଣିଜ୍ୟ କରିଛୁ, ସେମାନଙ୍କର ଶୁଳ୍କ ବହୁତ ଅଧିକ, ଯାହା ବିଶ୍ୱର ସର୍ବାଧିକ ଶୁଳ୍କ ଥିବା ଦେଶଗୁଡ଼ିକ ମଧ୍ୟରୁ ଗୋଟିଏ ।

ଜର୍ମାନ ଖବରକାଗଜ ଦାବି କରିଛି ଯେ ଟ୍ରମ୍ପ ଏହା ପରେ ପ୍ରଧାନମନ୍ତ୍ରୀ ମୋଦିଙ୍କୁ ଅନେକ ଥର ମନାଇବାକୁ ଚେଷ୍ଟା କରିଥିଲେ। ଏଥିରେ କୁହାଯାଇଛି ଯେ ଭାରତ ବର୍ତ୍ତମାନ ବହୁତ ସତର୍କ ପଦକ୍ଷେପ ନେଉଛି। ରିପୋର୍ଟ ଅନୁଯାୟୀ, ପ୍ରଧାନମନ୍ତ୍ରୀ ମୋଦି ଆମେରିକୀୟ କୃଷି ବ୍ୟବସାୟ ପାଇଁ ଭାରତର ବଜାର ଖୋଲିବା ପାଇଁ ଟ୍ରମ୍ପଙ୍କ ଚାପର ମଧ୍ୟ ବିରୋଧ କରୁଛନ୍ତି।