ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବର ରାଜ୍ୟସଭାରେ ଉତ୍ତର ରଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ନିଜ ଅଭିଭାଷଣରେ କଂଗ୍ରେସ ସମେତ ବିରୋଧୀଙ୍କୁ କଡ଼ା ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ ମୋଦି । ପ୍ରଧାନମନ୍ତ୍ରୀ କହିଛନ୍ତି ଯେ, ଯେଉଁମାନେ ନିଜକୁ ‘ରାଜା’ କହିବାରେ ଗର୍ବ କରନ୍ତି, ସେମାନେ ଆର୍ଥିକ ଅସମାନତା ଉପରେ କହିବା ମୂଲ୍ୟହୀନ । କଂଗ୍ରେସ, ଟିଏମସି, ଡିଏମକେ ଏବଂ ବାମଦଳଗୁଡ଼ିକୁ ସମାଲୋଚନା କରି ମୋଦି କହିଛନ୍ତି ଯେ, ଏହି ଦଳଗୁଡ଼ିକ ଦଶନ୍ଧି ଦଶନ୍ଧି ଧରି କ୍ଷମତାରେ ରହିଥିଲେ, କିନ୍ତୁ ସେମାନଙ୍କର ପ୍ରାଥମିକତା କେବଳ ନିଜ ପକେଟ୍ ଗରମ କରିବା ଥିଲା ।

ଆଜି ଯେତେବେଳେ ସାଧାରଣ ନାଗରିକଙ୍କ ଜୀବନରେ ପରିବର୍ତ୍ତନ ଆସୁଛି, ସେତେବେଳେ ବିରୋଧୀଙ୍କୁ କଷ୍ଟ ହେଉଛି । ପଶ୍ଚିମବଙ୍ଗ ସରକାରଙ୍କୁ ଟାର୍ଗେଟ୍ କରି ମୋଦି କହିଛନ୍ତି ଯେ, ଯେଉଁମାନେ ଅନୁପ୍ରବେଶକାରୀଙ୍କୁ ବଞ୍ଚାଇବା ପାଇଁ କୋର୍ଟରେ ନିଜର ସମସ୍ତ ଶକ୍ତି ଲଗାଉଛନ୍ତି, ସେମାନେ ଆଜି ଆମକୁ ଉପଦେଶ ଦେଉଛନ୍ତି । ଏହି ଅନୁପ୍ରବେଶକାରୀମାନେ ଯୁବକମାନଙ୍କ ରୋଜଗାର ଏବଂ ଆଦିବାସୀଙ୍କ ଜମି ଛଡ଼ାଇ ନେଉଛନ୍ତି ।
ସେହିପରି ଆମ୍ ଆଦମୀ ପାର୍ଟିକୁ ଇଙ୍ଗିତ କରି ସେ କହିଛନ୍ତି, ଯାହାର ସରକାର ନିଜେ ମଦ ଦୁର୍ନୀତିରେ ବୁଡ଼ି ରହିଛନ୍ତି, ସେମାନେ ନୀତି ଆଦର୍ଶର କଥା କହିବା ହାସ୍ୟାସ୍ପଦ ।

ଅନ୍ୟପଟେ ମୋଦିଙ୍କ ଅଭିଭାଷଣରେ ଝଲସିଛି ନୂଆ ଭାରତର ଛବି । ବିଶ୍ବରେ ବଢ଼ୁଥିବା ଭାରତର ନେତୃତ୍ବକୁ ନିଜ ଅଭିଭାଷଣରେ ଉଲ୍ଲେଖ କରିଛନ୍ତି ପିଏମ ମୋଦି । ଭାରତ ବିଶ୍ବ ବନ୍ଧୁର ପରିଚୟ ବହନ କରିଛି । ଗ୍ଲୋବାଲ ସାଉଥର ସ୍ବର ସାଜିଛି ଭାରତ । ଆଜି ସାରା ବିଶ୍ୱ ଭାରତର ଟ୍ରେଡ୍ ଡିଲ୍‌କୁ ପ୍ରଶଂସା କରୁଛି । ୟୁରୋପୀୟ ୟୁନିୟନଠାରୁ ଆରମ୍ଭ କରି ଆମେରିକା ପର୍ଯ୍ୟନ୍ତ, ଭାରତର ବାଣିଜ୍ୟିକ ଚୁକ୍ତି ଆଜି ଚର୍ଚ୍ଚାର ବିଷୟ । ଏହାଦ୍ୱାରା ଭାରତୀୟ ଯୁବପିଢ଼ିଙ୍କ ପାଇଁ ବିଶ୍ୱ ବଜାରର ଦ୍ୱାର ଖୋଲିଯାଇଛି ।