'ଦେଶ ନୁହେଁ କଂଗ୍ରେସ ପାଇଁ ପ୍ରଥମ ହେଉଛି ପରିବାରବାଦ', ଏମିତି କହି ସଂସଦରେ ବର୍ଷିଲେ ପ୍ରଧାନମନ୍ତ୍ରୀ

ଅର୍ଗସ ବ୍ୟୁରୋ: 'ସବ୍‌କା ସାଥ୍, ସବ୍‌କା ବିକାଶ' । ଏହା ଆମ ସରକାରର ମୂଳମନ୍ତ୍ର । କଂଗ୍ରେସ ପରିବାରବାଦ ଓ ତୁଷ୍ଟିକରଣ ରାଜନୀତିରେ ତିଷ୍ଠି ଥିଲା । ଏମିତି କହି ବିରୋଧୀ କଂଗ୍ରେସକୁ କଡ଼ା ସମାଲୋଚନା କରିଛନ୍ତି ପ୍ରଧାନମନ୍ତ୍ରୀ ମୋଦି । ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ଆଲୋଚନାରେ ଭାଗ ନେଇ ରାଜ୍ୟସଭାରେ ପିଏମ୍ ମୋଦି କହିଛନ୍ତି, ରାଷ୍ଟ୍ରପତିଙ୍କ ଅଭିଭାଷଣକୁ ଯିଏ ଯେମିତି ବୁଝିଲେ, ଗୃହରେ ସେମିତି ବୁଝାଇଲେ । 'ସବ୍‌କା ସାଥ୍, ସବ୍‌କା ବିକାଶ' ଉପରେ ସମସ୍ତେ ବହୁତ କିଛି କହିଛନ୍ତି । ଏହା ହିଁ ତ ଆମ ଦାୟିତ୍ଵ । ଏଇଥିପାଇଁ ତ ଦେଶ ଆମ ସମସ୍ତଙ୍କୁ ବସିବାର ସୁଯୋଗ ଦେଇଛି ।

କଂଗ୍ରେସ କ୍ଷେତ୍ରରେ ପାଇଁ 'ସବ୍‌କା ସାଥ୍, ସବ୍‌କା ବିକାଶ' ଏକ ବଡ଼ ଭୁଲ୍ ହୋଇଯିବ । ଏହା କଂଗ୍ରେସର ଚିନ୍ତା, ଚେତନାର ବାହାରେ । ତାଙ୍କ ରୋଡ୍‌ମ୍ୟାପକୁ ଏହା ମଧ୍ୟ ସୁହାଉ ନାହିଁ । ଏତେ ବଡ଼ ଦଳ, ଗୋଟିଏ ପରିବାର ପାଖରେ ସମର୍ପିତ । ଏଥିପାଇଁ 'ସବ୍‌କା ସାଥ୍, ସବ୍‌କା ବିକାଶ' ସମ୍ଭବ ନୁହଁ । କଂଗ୍ରେସ ରାଜନୀତିର ଏକ ଏମିତି ମଡେଲ୍ ତିଆରି କରିଥିଲା, ଯେଉଁଥିରେ ଛଳନା, ଦୁର୍ନୀତି, ପରିବାରବାଦ, ତୁଷ୍ଟିକରଣ ସବୁ ଏକାଠି ଥିଲା । ଏସବୁ ଯେଉଁଠି ଥିବ ସେଠି ସମସ୍ତଙ୍କ ବିକାଶ ହୋଇ ପାରିବନି । ତାଙ୍କ ପରିବାର ଆଗ, ଏଥିପାଇଁ ତାଙ୍କ ରୀତିନୀତି ଓ ବାଣୀ ସବୁ ଏକ ପ୍ରକାର ।

୨୦୧୪ରେ ଦେଶବାସୀ ଆମକୁ ସେବା କରିବା ଲାଗି ସୁଯୋଗ ଦେଲେ । ଦେଶବାସୀ ଲଗାତାର ତୃତୀୟଥର ଲାଗି ସେବା କରିବାର ସୁଯୋଗ ଦେଇଛନ୍ତି । ଏଥିପାଇଁ ଆମେ କୃତଜ୍ଞ । ଦେଶର ଜନତା ଆମର ବିକାଶ ମଡେଲକୁ ଦେଖି, ବୁଝି ସମର୍ଥନ ଦେଇ ତୃତୀୟଥର ନିର୍ବାଚିତ କରିଛନ୍ତି । ଆମ ପାଇଁ ରାଷ୍ଟ୍ର ପ୍ରଥମ । ଆମ ନୀତି ଓ କାର୍ଯ୍ୟକ୍ରମରେ ଦେଶକୁ ଆଗରେ ରଖି କାମ କରୁଛୁ ।

ମୁଁ ଗର୍ବ ଓ ସନ୍ତୋଷର ସହ କହିବାକୁ ଚାହେଁ, ପ୍ରାୟ ୫ରୁ ୬ ଦଶନ୍ଧି ଧରି ଦେଶ ପାଖରେ କୌଣସି ବିକଳ୍ପକୁ ମାପିବା ପାଇଁ କୌଣସି ବିକଳ୍ପ ନଥିଲା । ୨୦୧୪ ପରେ ଦେଶକୁ ଗୋଟିଏ ବିକଳ୍ପ ମଡେଲ୍ ଦେଖିବାକୁ ମିଳିଥିଲା । ଆଉ ଏହି ନୂଆ ମଡେଲ୍ ତୁଷ୍ଟିକରଣ ନୁହେଁ ସନ୍ତୁଷ୍ଟିକରଣ । କଂଗ୍ରେସ ସମୟର ମଡେଲ ତୁଷ୍ଟିକରଣ ଆଧାରିତ ଥିଲା । ତାଙ୍କ ରାଜନୀତିର ଔଷଧ ଥିଲା ତୁଷ୍ଟିକରଣ । ତାଙ୍କ ନୀତି ଥିଲା କିଛି ଲୋକଙ୍କୁ ଅଳ୍ପ ଦେଇ ଅନ୍ୟମାନଙ୍କୁ ଉପେକ୍ଷିତ କରି ଭଣ୍ଡାଇବା । ନିର୍ବାଚନ ବେଳେ ଦେଖାଇ ହେଉଥିଲେ ସମସ୍ତଙ୍କୁ ମିଳିବ ।

ଲୋକଙ୍କ ଆଖିରେ ପଟି ବାନ୍ଧି କଂଗ୍ରେସ ରାଜନୀତି କରୁଥିଲା । ନିର୍ବାଚନ ସମୟରେ ଭୋଟ୍ ଫସଲ କରୁଥିଲା କଂଗ୍ରେସ । ଆମ ପ୍ରୟାସ, ଦେଶର ସମସ୍ତ ସମ୍ବଳର ଉପଯୋଗ ହେଉ । ସମୟର ବରବାଦ ନକରି ସମୟର ଉପଯୋଗ ଦେଶର ପ୍ରଗତି ଓ ଲୋକଙ୍କ ଉନ୍ନତି ଲାଗି ହେଉ ।

ପ୍ରଧାନମନ୍ତ୍ରୀ କହିଛନ୍ତି, ଗତ ଦଶନ୍ଧିରେ ଆମେ ସରକାରକୁ ଗ୍ରାଉଣ୍ଡକୁ ନେଇଛୁ । ଯାହା ପରିବର୍ତ୍ତନ ଆସିଛି, ଲୋକେ ଅନୁଭବ କରୁଛନ୍ତି । ଆମର ମୂଳମନ୍ତ୍ର 'ସବ୍‌କା ସାଥ୍, ସବ୍‌କା ବିକାଶ' । ଆମ ସରକାର ଏସ୍‌ସି, ଏସ୍‌ଟି ଆକ୍ଟକୁ ମଜଭୁତ୍ କରିଛି । ସେମାନଙ୍କ ସୁରକ୍ଷାପ୍ରତି ସରକାର ପ୍ରତିବଦ୍ଧତା ଦେଖାଇଛନ୍ତି । ଆଜି ଜାତିବାଦର ବିଷ ବୁଣିବାକୁ ପ୍ରୟାସ କରଯାଉଛି ।

କିନ୍ତୁ ୩ ଦଶନ୍ଧି ଧରି ସମସ୍ତ ଓବିସି ସାଂସଦ ଦାବି କରୁଥିଲେ ଓବିସି ଆୟୋଗକୁ ସାମ୍ବିଧାନିକ ମାନ୍ୟତା ମିଳୁ । ଏ ଦାବିକୁ ଅଗ୍ରାହ୍ୟ କରି ଦେଇଥିଲେ । କାରଣ ସେ ସମୟରେ ତାଙ୍କ ରାଜନୀତିକୁ ଏହା ସୁହାଉ ନଥିଲା । କାରଣ ପରିବାରବାଦ ଓ ତୁଷ୍ଟିକରଣ ରାଜନୀତିରେ ଏହା ଚର୍ଚ୍ଚାକୁ ବି ଆସୁ ନଥିଲା । କିନ୍ତୁ ଆମେ ଓବିସି ଆୟୋଗକୁ ସାମ୍ବିଧାନିକ କରିଛୁ । କେବଳ ଦାବି ପୂରଣ କରିନୁ ସେମାନଙ୍କ ମାନ ସମ୍ମାନ ଆମ ପାଇଁ ମହତ୍ତ୍ଵପୂର୍ଣ୍ଣ ।

ଯେବେ ଯେବେ ଦେଶରେ ସଂରକ୍ଷଣ କଥା ଆସିଛି । ସେତେବେଳେ ସତ୍ୟକୁ ସ୍ଵୀକାର କରି ବନ୍ଦୋବସ୍ତ ଆକାରରେ ସମସ୍ୟାର ସମାଧାନ କରିବାର ପ୍ରୟାସ ହୋଇନି । ଦେଶରେ ବିଭାଜନ, ଉତ୍ତେଜନା ପାଇଁ ବାଟ ଆପଣା ଯାଇଛି । ଦେଶ ସ୍ଵାଧୀନ ହେବା ପରେ ଯେତେଥର ପ୍ରୟାସ ହୋଇଛି ଏମିତି ହୋଇଛି । ଆମ ସରକାର 'ସବ୍‌କା ସାଥ୍, ସବ୍‌କା ବିକାଶ' ମନ୍ତ୍ରର ପ୍ରେରଣାରେ ସାମାନ୍ୟ ବର୍ଗର ଗରିବଙ୍କୁ ବିନା ଉତ୍ତେଜନାରେ ୧୦ ପ୍ରତିଶତ ସଂରକ୍ଷଣ ଦେଇଛୁ । ଆମ ନିଷ୍ପତ୍ତିକୁ ସମସ୍ତେ ସମର୍ଥନ ଦେଇଛନ୍ତି । କିଛି ବି ଅଶାନ୍ତି ସୃଷ୍ଟି ହୋଇନି, ସମଗ୍ର ଦେଶ ଏହାକୁ ସ୍ଵୀକାର କରିଛି ।

ଆମ ଦେଶରେ ଦିବ୍ୟାଙ୍ଗଙ୍କ କଥା ଯେମିତି ଶୁଣିବା କଥା ହେଉ ନଥିଲା । ଆମେ ଦିବ୍ୟାଙ୍ଗଙ୍କ ଲାଗି ସଂରକ୍ଷଣ ଆଣି ସେମାନଙ୍କ କଲ୍ୟାଣ ଲାଗି ଅନେକ ଯୋଜନା କରିଛୁ । ତୃତୀୟ ଲିଙ୍ଗୀଙ୍କ ଅଧିକାର ଲାଗି ମଧ୍ୟ କାମ କରୁଛୁ । ଭାରତର ବିକାଶରେ ନାରୀ ଶକ୍ତିଙ୍କ ଯୋଗଦାନ ଅପରିହାର୍ଯ୍ୟ । ସେମାନେ ନୀତି ନିର୍ଦ୍ଧାରଣରେ ସାମିଲ୍ ହେଲେ ପ୍ରଗତି ବିସ୍ତାରିତ ହେବ । ଏଥିପାଇଁ ନୂଆ ସଂସଦର ପ୍ରଥମ ନିଷ୍ପତ୍ତି ଥିଲା ନାରୀଶକ୍ତି ବନ୍ଦନ ଆଇନ୍ ।