PM Modi Paper Leak Statement / ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳୁଥିବା ସବୁ ମାଫିଆଙ୍କୁ ମିଳିବ କଠୋର ଦଣ୍ଡ: PM ମୋଦି

ପ୍ରଶ୍ନପତ୍ର ଲିକ୍‌ ମାମଲାରେ ପ୍ରଧାନମନ୍ତ୍ରୀଙ୍କ କଡ଼ା ଆଭିମୁଖ୍ୟ । NDA ସଂସଦୀୟ ଦଳର ବୈଠକ ମଙ୍ଗଳ ମିଳନରେ କହିଲେ ମୋଦି । ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳୁଥିବା ଦୋଷୀଙ୍କୁ ମିଳିବ କଠୋର ଦଣ୍ଡ । ଯୁବବର୍ଗଙ୍କ ସ୍ୱାର୍ଥ ସହ କୌଣସି ଆପୋଷ ବୁଝାମଣା ହେବ ନାହିଁ । ପେପର ଲିକ୍‌ ରୋକିବାକୁ ସରକାର ପ୍ରତିଶ୍ରୁତିବଦ୍ଧ ବୋଲି କହିଛନ୍ତି ମୋଦି ।

ସେହିପରି ପ୍ରଧାନମନ୍ତ୍ରୀ କହିଛନ୍ତି ଯେ, ପରୀକ୍ଷା ପ୍ରକ୍ରିୟାରେ ସ୍ୱଚ୍ଛତା ଆଣିବା ଏବଂ କଠିନ ପରିଶ୍ରମ କରୁଥିବା ଯୋଗ୍ୟ ଛାତ୍ରଛାତ୍ରୀଙ୍କୁ ନ୍ୟାୟ ଦେବା କେନ୍ଦ୍ର ସରକାରଙ୍କ ପ୍ରାଥମିକତା । ପ୍ରଶ୍ନପତ୍ର ଲିକ୍ ଘଟଣାରେ ସମ୍ପୃକ୍ତ ଥିବା କୌଣସି ବି ଦୋଷୀଙ୍କୁ ଛଡ଼ାଯିବ ନାହିଁ ଏବଂ ସେମାନଙ୍କୁ ଦୃଷ୍ଟାନ୍ତମୂଳକ ଦଣ୍ଡ ଦିଆଯିବ । ଏଥିସହ, ପେପର ଲିକ୍ ଏବଂ ପରୀକ୍ଷାରେ ହେଉଥିବା ଅନିୟମିତତାକୁ ରୋକିବା ପାଇଁ ସରକାର ନୂଆ ଓ କଠୋର ଆଇନ ଆଣିଛନ୍ତି । ଏହି ଆଇନ ବଳରେ ବେଆଇନ କାର୍ଯ୍ୟରେ ଲିପ୍ତ ଥିବା ଗ୍ୟାଙ୍ଗ୍ ଏବଂ ଅପରାଧୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ଦେଶବାସୀଙ୍କୁ ଆଶ୍ୱାସନା ଦେଇଛନ୍ତି ।

ଅଧିକ ପଢ଼ନ୍ତୁ: ବିବାହର ୨ ମାସ ପରେ ପ୍ରେମିକ ସହ ଫେରାର ସ୍ତ୍ରୀ, ଫେରାଇବାକୁ କହିଲେ ସ୍ୱାମୀଙ୍କୁ ହତ୍ୟା ଧମକ

ମଙ୍ଗଳ ମିଳନ ବୈଠକରେ ପ୍ରଧାନମନ୍ତ୍ରୀଙ୍କ କଡ଼ା ଆଭିମୁଖ୍ୟ ନେଇ ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ କିରଣ ରିଜିଜୁ । ସେ କହିଛନ୍ତି, NEET ପରୀକ୍ଷାରେ ଅନିୟମିତତା ସୂଚନା ମିଳିବା ମାତ୍ରେ ସରକାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଏହି ମାମଲାରେ ୧୩ ଜଣ ଅଭିଯୁକ୍ତଙ୍କୁ ଗିରଫ କରାଯାଇ ଜେଲ୍ ପଠାଯାଇଛି । ପରୀକ୍ଷାର୍ଥୀଙ୍କ ଭବିଷ୍ୟତକୁ ଆଖିଆଗରେ ରଖି ବିନା କୌଣସି ବିଳମ୍ବରେ ପୁନଃ-ପରୀକ୍ଷା ସଫଳତାର ସହ ପରିଚାଳିତ କରାଯାଇ ଫଳାଫଳ ପ୍ରକାଶ କରାଯାଇଛି । ଭବିଷ୍ୟତରେ ଯେପରି ପ୍ରଶ୍ନପତ୍ର ପ୍ରକାଶ/ଲିକ୍ ନହୁଏ, ସେଥିପାଇଁ କଠୋର ଆଇନଗତ ଓ ବୈଷୟିକ ପଦକ୍ଷେପ ନିଆଯାଉଛି । ଦୋଷୀଙ୍କୁ କଠୋର ଦଣ୍ଡ ଦେବା ସହ ଏକ ତ୍ରୁଟିଶୂନ୍ୟ ବ୍ୟବସ୍ଥା ଗଢ଼ି ତୋଳିବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଛନ୍ତି ।

ସେହିପରି ଚାଲୁରହିଥିବା ମୌସୁମୀ ଅଧିବେଶନରେ NDA ଏକ ଗଠନମୂଳକ ଭୂମିକା ଗ୍ରହଣ କରିବ । ଦେଶର ହିତ ପାଇଁ ଆଗତ କରାଯାଉଥିବା ବିଲ୍‌ ଓ ଆଇନଗତ କାର୍ଯ୍ୟସୂଚୀକୁ ପାରିତ କରିବା ପାଇଁ NDA ଦୃଢ଼ସଂକଳ୍ପ । ଭିନ୍ନ ଭିନ୍ନ ଦଳର ଚିନ୍ତାଧାରା ଅଲଗା ହୋଇପାରେ, କିନ୍ତୁ ଦେଶ, ଦେଶର ଭବିଷ୍ୟତ ଏବଂ ଯୁବପିଢ଼ିଙ୍କ ସ୍ୱାର୍ଥ ପାଇଁ ଏକାଠି ମିଶି କାର୍ଯ୍ୟ କରିବାକୁ ରିଜିଜୁ ବିରୋଧୀ ଦଳଗୁଡ଼ିକୁ ଆହ୍ୱାନ ଜଣାଇଛନ୍ତି ।